عايمة في بحر الكتب

 _  بتحب أفلام الرعب؟. يبقي اكيد شفت افلام عن الزومبي.  _ ايه ده يا مروة انتي هتحكي عن الزومبي ملقتيش غيره. _ اعمل ايه منا شايفة الولاد معجبين اوي بيه وبيلعبوا العاب عن الزومبي. قلت لما نحكي فيه ونعرف أصله. واهو منها تغيير ومنها اسطورة جديدة. تعرف ايه بقي عن الزومبي؟. _ اعرف ان الزومبي معناه الميت الحي، وده بيحصل لما بيتصابوا بفيروس نادر فبيتحولوا لزومبي، ولو عض حد بيتحول زيه. _ اه ده زومبي هوليوود ده. صناعة الافلام الامريكاني. انا هحكيلك عن الزومبي الحقيقي.  في سنة 1937م، ظهرت واحدة ست اسمها ( فليسيا مينتور ) في شوارع هاييتي في جزر الكاريبي، مفروض انها ماتت رسميا سنة 1907، يعني من 30 سنة. والقرويين شافوها كذا مرة وهي رايحة جاية في الشوارع بس الكل من الرعب مكنش بيتعرضلها. وفي سنة 1980م، ظهر واحد في نفس القرية هاييتي اسمه ( كورليس نارسيز )، واللي مفروض انه مات في مستشفي هاييتي سنة 1962م واندفن، يعني من 18 سنة. لكن المرة دي اتكلم وقال أنه فاكر كويس لحظة موته، وكان شايف وش الدكتور اللي غطي وشه بعد إعلان موته، بس كان مصاب بالشلل التام مش قادر يعلن أنه موجود، وقال أن فيه واحدة ست هي اللي رج

  انتهيت من قراءة الجزء الرابع من سلسلة لاشين - خلف قسم اللبان، للكاتبة شيرين هنائي، في طبعتها الاولي، الصادرة عن دار كتوبيا، بعدد صفحات 141 صفحة. من جديد يعود لاشين بعد رحلاته في الجزء الاول عهد الدجالين، والجزء الثاني أبناء ديهيا، والجزء الثالث كاهنة الأوراس. وهاهو بالجزء الرابع خلف قسم اللبان. ولمن لايعرف لاشين فهو ذلك الرجل الذي أخذ عهد الدجالين ارث غصبا عن والده. فأصبح ذلك الشيطان ذو القلب الرحيم، شيطان بمشاعر انسانية، يضع للسحر والشرور في عالمه قانونه الخاص، وفي محمل شخصيات السلسلة دائما تحافظ الكاتبة علي فكرة في داخل كل انسان جانب ابيض وجانب اسود، فلا يوجد ملائكة طاهري الذيل علي الارض، كما لايوجد شخص غريزته شريرة الا بسبب دفعه لذلك. تنتمي تلك السلسلة الي ادب الرعب، فيها يرتبط لاشين من الجزء الاول ببرنامج بعد منتصف الليل وضيفته الدائمة سهير زاهر، التي تستطيع من خلال كاميرتها الفوتوغرافية رؤية الاشباح والارواح الماورائية. في الجزء ده تواري لاشين قليلا،وترك المغامرة لسهير رامز بعد اكتساحة للثلاث اجزاء السابقة، واكتفائه بدور الراوي.  من وجهه نظري، هذا الجزء هو أقوي اجزاء السلسلة حتي

  كان يا ماكان، في سالف العصر والأوان، في بلاد اليمن السعيد، بيت صغير عاش فيه اسرة سعيدة. لفت ودارت الايام بيهم، لحد ما القدر قال كلمته، ورحل الأب والأم. وفضل عايش في البيت زهرة وأخوها جابر. وفضل البيت منقاد بمحبتهم لبعض وخوفهم علي بعض. كانت زهرة أم أخوها، وكان جابر أبو اخته. فضل جابر يطلع كل يوم يسعي علي أكل عيشه، وزهرة قاعدة تاخد بالها من أمور البيت، تنضف وتغسل وتطبخ وتستني أخوها يرجع ياكل معاها ويطمن علي أحوالها ويحكيلها عن يومه. وفضلت الايام ماشية بيهم هادية سعيدة ملهمش دعوة بحد ومفيش حد بيتدخل في شئونهم. لحد ما في يوم قرر جابر انه يتجوز. وراح لأخته وقالها عن رغبته في الزواج، طارت زهرة من الفرحة، وقالتله ده يوم المنا، فرحتك ياخويا هي فرحتي. ومكدبتش زهرة خبر وبدأت تدور لاخوها علي عروسة، ماهي مش بس اخته دي كمان بقت امه. لحد ما اتوفقت زهرة وقدرت تجيب لاخوها عروسة، وكتبوا الكتاب وعلوا الجواب. وجت العروسة تسكن في البيت مع زهرة وجابر، وزاد عدد الاسرة واحد. لكن مرات جابر معجبهاش ان زهرة تفضل ساكنة معاهم، لكنها رضيت في الاول بس عشان تتمكن وبعدها تتحكم. عدت الايام لحد ما اتأكدت ان قلب جابر

زمان رحت مع بابا اعمل نضارة نظر، وكعادتي منذ الصغر عاشقة للحروف والكلمات كان لازم اقرا اسم مركز البصريات اللي احنا داخلينه، لقيت المركز اسمه "زرقاء اليمامة". استغربت الاسم، هو من امتي اليمام ازرق؟، مش منطقي. فسألت بابا واحنا قاعدين مستنين دورنا، يعني ايه زرقاء اليمامة؟. قالي دي بنت حلوة كانت بتاكل جزر كتير وعالجت عينيها بنضارة حلوة زيك كده، لحد ما رجعت تشوف احسن من الاول. واقتنعت بالكلام وسكت، واتاريه كلام ابهات عشان يراضيني ويخليني اتقبل النضارة، بس كان فيه جزء من الحقيقة. لما كبرت قابلتني اشعارالجاهلية والاسلام فيها ذكر لزرقاء اليمامة. قلت لا بقي الموضوع مش موضوع بنت بتحب تاكل جزر أكيد الحكاية أكبر من كده. ياتري انتي مين يا زرقاء اليمامة؟. هي بنت من منطقة اسمها اليمامة كانت موجودة في شبه الجزيرة العربية قبل الاسلام. وبالتحديد من قبيلة عربية انقرضت كانت اسمها جديس. قال "الزمخشري" في كتاب ( المستقصى في أمثال العرب)،   ان زرقاء اليمامة كانت اسمها الاصلي "عنز"، لكن اتسمت زرقاء لان عينيها كانت زرقا وواسعة وكمان كانت حادة البصر، لدرجة ضربوا بيها المثل وقالوا أ

  بلغني ايها الملك السعيد ذو الرأي الرشيد، ان السندباد لما قرر ركوب البحر والعمل في التجارة، وسافر مع مجموعة من التجار للسعي ورا لقمة العيش، وشالتهم الامواج وحطتهك من جزيرة لجزيرة، لحد ما وصل لجزيرة مجهولة، نزل التجار والبحارة ومعاهم السندباد، يشوفوا أهل الجزيرة جايز يبيعوا أو يشتروا أكل ومية. لكنهم اكتشفوا ان الجزيرة مهجورة مفيهاش صريخ ابن يومين. وبعد ما لفوا وداروا فيها وملوا من نهرها المية واخدوا من اشجارها الفاكهة، قعدوا يستريحوا شوية. وغلب السندباد النوم بعد ما أكل وشبع راح فارد جسمه وراح في سابع نومة. لما صحي السندباد بص حواليه اتفاجئ انه لوحده، التجار والبحارة نسيوه وركبوا سفينتهم ومشيوا. اتفزع السندباد مش مصدق انه لوحده، جري يمين، وجري شمال ينده ويصيح، لكن لاحياة لمن تنادي. وبعد ساعات من الجري وقع مغمي عليه. ولما فاق طلع فوق شجرة يشوف هيتصرف ازاي في بلوته التقيلة. في الوقت شاف علي بعد قبة بيضا عملاقة جدا. السندباد مكنش يعرف ايه الحاجة الغريبة دي بس كل اللي فكر فيه انها جايز تكون فيها نجاته. نزل السندباد بسرعة، وجري ناحية مكان القبة اللي شافها، ولما وصلها فضل يستكشف ويحسس عليها

  مين فينا ملعبش وهو صغير وغني أمنا الغولة طقطقي الفولة بتعملي ايه؟؟. ومين فينا مسمعش حكاية ست الحسن، وسمع الغولة وهي بتقولها لولا سلامك قبل كلامك لكلت لحمك قبل عضامك. كل أم كانت بتقول اتغطي كويس عشان امنا الغولة هتاكل رجلك لو خرجت من تحت البطانية. كنت زمان بخاف اوي من فيلا مهجورة جنب المدرسة كانوا العيال مطلعين عليها بيت امنا الغولة، وكنت اجري من جنبها بسرعة قبل ما تطلع امنا الغولة. لو ملاحظ ان موضوع الغول ده مسيطر بشكل كبير علي حكاياتنا الشعبية باشكال مختلفة. هتلاقي ذكره في الف ليلة وليلة وفي الشعر كمان. قال عنترة :  والغُولُ بينَ يديَّ يخفى تارة ويعودَ يَظْهَرُ مثْلَ ضَوْءِ المَشْعَلِ قال جرير :  فَيَوْماً يُوافِيني الهَوى غير حاضر ويوماً ترى منهنّ غُولاً تَغَوَّلُ طيب ياتري ايه هو الغول؟. الغول هو مخلوق اسطوري من الاساطير العربية القديمة، وضعه العرب في المثل اللي بيقول المستحيلات ثلاثة الغول والعنقاء والخل الوفي - اتكلمنا عن العنقاء في مقال سابق - وكلمة غول مشتقة من كلمة غالو وهو اسم كائنات شيطانيةضخمة ومخيفة. قال العرب ان الغول كائن متوحش، بشع الخلقة، جسمه متغطي بالوبر،  كائن نصه

  قال العرب زمان: المستحيلات ثلاثة، وهم الغول والعنقاء والخل الوفي. النهارده هنتكلم عن العنقاء، ولينا لقاء تاني مع الغول، اما الخل الوفي ده بقي هنسيبه للزمن.  المتابع لسلسلة افلام هاري بوتر اكيد شاف العنقاء pheonix مع دمبلدور. ولو تفتكر كانت العنقاء بدموعها هي السبب في شفاء هاري من سم التعبان. طب انت عارف ان العنقاء دي اصلها عربي وفيه ناس تانية بتقول اصلها مصري قديم. ايه هي بقي العنقاء. دي اسطورة قديمة جدا، انتشرت بين اغلب الحضارات القديمة، بسبب اختلاط الحضارات وتناقل الاساطير. هتلاقي ذكرها في أماكن مختلفة بتغيرات بسيطة بين كل قصة والتانية. بالنسبة للعرب أصحاب الاسطورة الاصليين، العنقاء او طائر النار هو طائر جميل جدا، سموه العنقاء عشان كان عنقه طويل اوي، له منقار طويل مستقيم، وعلي راسه ريشتين راجعين لورا. والعنقاء كان عايش في مكان أشبه بالجنة، وده لان وصف المكان بيقول ان بوابة السماء الضخمة بتفتح وتدخل نور الشمس من خلالها علي المكان ده، وأدام البوابة شجرة ضخمة دايما مخضرة. مكان كله جمال مفيهوش أمراض ولا شيخوخة ولا موت ولا شر ولا خوف ولا حزن. اشارت بعض الروايات ان المكان ده هو اليمن الل

  كل سنة وانتم طيبين. النهاردة أول يوم في عيد الفطر المبارك. ياتري صليت العيد؟، طيب أكلت الكحك؟، زورت أهلك وقرايبك ولا لسه؟  خدت عيدية ولا اديتها؟! كلها مظاهر جميلة ومبهجة بنحرص عليها في عيد الفطر وربنا ما يقطعها عادة. وبالمناسبة السعيدة دي، هاخدكم في جولة نركب فيها آلة الزمن، وفي جولة سريعة هنبص ونشوف شكل مظاهر الاحتفال بعيد الفطر في أزمان مختلفة. ها مستعد!!! طيب أربط حزام الأمان ويلا بينا. في أيام الخلافة العباسية ( 750 – 1517)، كانوا في ليلة العيد بيشعلوا المشاعل والقناديل بكثافة في كل شوارع وحواري وأزقة البلاد لدرجة بيتحول الليل كأنه نهار، وكان الخليفة العباسي يقعد في قصره يستقبل وفود الوزراء والأمراء وحكام كل الولايات اللي دايين يقدموا التهاني بالعيد بنفسهم للخليفة. ويفضل طول ليلة العيد يطوف فرق بالطبل والزمر، وتتحول لليلة كلها رقص وبهجة مفيهاش نوم لحد الفجر. فيطلع موكب الخليفة بوزراؤه وأمراؤه من القصر لحد المسجد، ويكون الخليفة لابس عمامة مكورة زي التاج، وعباية سودة ووشاح مرصع بالأحجار الكريمة، ويركب حصان أبيض. وعلي يمينه وشماله حملة النشاب اللي هم الرماة اللي معاهم اقواس وسهام، و