الزومبي

 _ بتحب أفلام الرعب؟. يبقي اكيد شفت افلام عن الزومبي. 

_ ايه ده يا مروة انتي هتحكي عن الزومبي ملقتيش غيره.

_ اعمل ايه منا شايفة الولاد معجبين اوي بيه وبيلعبوا العاب عن الزومبي. قلت لما نحكي فيه ونعرف أصله. واهو منها تغيير ومنها اسطورة جديدة. تعرف ايه بقي عن الزومبي؟.

_ اعرف ان الزومبي معناه الميت الحي، وده بيحصل لما بيتصابوا بفيروس نادر فبيتحولوا لزومبي، ولو عض حد بيتحول زيه.

_ اه ده زومبي هوليوود ده. صناعة الافلام الامريكاني. انا هحكيلك عن الزومبي الحقيقي.

 في سنة 1937م، ظهرت واحدة ست اسمها ( فليسيا مينتور ) في شوارع هاييتي في جزر الكاريبي، مفروض انها ماتت رسميا سنة 1907، يعني من 30 سنة. والقرويين شافوها كذا مرة وهي رايحة جاية في الشوارع بس الكل من الرعب مكنش بيتعرضلها.

وفي سنة 1980م، ظهر واحد في نفس القرية هاييتي اسمه ( كورليس نارسيز )، واللي مفروض انه مات في مستشفي هاييتي سنة 1962م واندفن، يعني من 18 سنة. لكن المرة دي اتكلم وقال أنه فاكر كويس لحظة موته، وكان شايف وش الدكتور اللي غطي وشه بعد إعلان موته، بس كان مصاب بالشلل التام مش قادر يعلن أنه موجود، وقال أن فيه واحدة ست هي اللي رجعته الحياة وعملت منه زومبي. وعشان الناس تتأكد منه أن هو نفس الشخص اللي مات سألوه عن حياته وعيلته، وجاوب عن كل الأسئلة واتاكدوا فعلا أنه كورليس، اللي أصبح زومبي عائد للحياة. 

حسب الفلكلور الهاييتي، الزومبي هم عبيد لاسيادهم. يعني لو حد حب يسيطر علي واحد أو واحدة، ويخليه خاضع ليه، يقدر عن طريق سحر الفودو _ اللي هو عبارة عن قوة خارقة من السحر الاسود ووصفات عشبية معينة _ السيطرة علي روحه فيتحول بدون إرادة أو وعي أو احساس، والحل الوحيد للخلاص من اللعنة دي أنه يأكل ملح اللي بيقدر يرجع للزومبي وعيه وشعوره.

هنا بقي العلماء والأطباء والباحثين اجتمعوا، وقالوا الموضوع فيه سر ولازم نفهمه، من امتي الميت بيرجع، لو أبو الهول غمض وبلعناها، فالميت بقي مش هيرجع، مش هبل احنا بقي يا عصام.

في سنة ١٩٨٢م، سافر الباحث الفلكلورية ( ويد ويفز ) لهاييتي، وبعد بحث كتير في وسط حكايات الزومبي، قال إن عملية تحويل الشخص الزومبي بتم عن طريق مساحيق خاصة بتختلط بدم الضحية باحداث جرح في جسمه. الاول هو tetrodotoxin ، اللي بيسبب حالة زي الموت، والتاني hallucinogens، وده مخدر قوي بيأثر علي النظام العصبي للضحية، زي الانفعالات والمشاعر. وعشان يثبت كلامه قدر يجمع مجموعة مساحيق، ولما اتحللت لقوا فيها بعض المواد الطبية اللي بتسبب حالة شبيهة بالموت عند استعمالها. 

ورغم أن ناس كتير بتأيد كلام ويفز. لكن فضلت طريقة تحويل الشخص لزومبي مجهولة، وفضل سر من اسرار سحر الفودو.

_ يعني الزومبي مبياكلش الناس ولو عض حد مش هيخليه زومبي زيه.

_ خالص ده غلبان اوي، لو شوفته ابقي اديله حبة ملح تكسب فيه ثواب.

مروة طلعت

١٨/٥/٢٠٢٢

#عايمة_في_بحر_الكتب

#دنيا_ الاساطير