الغول

 مين فينا ملعبش وهو صغير وغني أمنا الغولة طقطقي الفولة بتعملي ايه؟؟. ومين فينا مسمعش حكاية ست الحسن، وسمع الغولة وهي بتقولها لولا سلامك قبل كلامك لكلت لحمك قبل عضامك. كل أم كانت بتقول اتغطي كويس عشان امنا الغولة هتاكل رجلك لو خرجت من تحت البطانية. كنت زمان بخاف اوي من فيلا مهجورة جنب المدرسة كانوا العيال مطلعين عليها بيت امنا الغولة، وكنت اجري من جنبها بسرعة قبل ما تطلع امنا الغولة. لو ملاحظ ان موضوع الغول ده مسيطر بشكل كبير علي حكاياتنا الشعبية باشكال مختلفة. هتلاقي ذكره في الف ليلة وليلة وفي الشعر كمان.

قال عنترة : 

والغُولُ بينَ يديَّ يخفى تارة

ويعودَ يَظْهَرُ مثْلَ ضَوْءِ المَشْعَلِ

قال جرير : 

فَيَوْماً يُوافِيني الهَوى غير حاضر

ويوماً ترى منهنّ غُولاً تَغَوَّلُ

طيب ياتري ايه هو الغول؟. الغول هو مخلوق اسطوري من الاساطير العربية القديمة، وضعه العرب في المثل اللي بيقول المستحيلات ثلاثة الغول والعنقاء والخل الوفي - اتكلمنا عن العنقاء في مقال سابق - وكلمة غول مشتقة من كلمة غالو وهو اسم كائنات شيطانيةضخمة ومخيفة. قال العرب ان الغول كائن متوحش، بشع الخلقة، جسمه متغطي بالوبر، كائن نصه حيوان ونصه بشري، عنده رجلين الحمار  له قرون ماعز وعيونه حمرا مشقوقة ولونها أسود مرعب وحجمه ضخم جدا وعنده حاسة الشم قوية جدا يقدر يشم ريحة الانسان عشان بيتغذي علي الانسان سواء حي او ميت ومكان سكنه في المقابر. اما بالنسبة لامنا الغولة اللي هي انثي الغول، فتزيد علي الغول في بشاعته ان لها نهدان مرتخيان وكبيران إلى درجة أنها بترميهم فوق كتفيها عشان ميعطلوش حركتها، وليها شعر كثيف طويل بينقط زيت. وطبعا الغول او الغولة بيقدروا يتحولوا في اشكال بشرية، وخصوصا الغولة بتتحول لست جميلة عشان تقدر تصطاد فريستها. ولما بتنام يخرج من بطنها أصوات صياح بشر ونهيق حمير وغيرها من الكائنات اللي اكلتها وهي صاحية. 

طبعا حكايات الغول ظهرت في الاساطير العربية لان حياتهم كانت في الصحرا، والدنيا اغلبها فاضية من حواليهم وديان مجهولة، والانسان من طبعه بيخاف من كل مجهول، ده غير الحيوانات المفترسة اللي في الليل بتزود الخيال، كانوا بيتخيلوا أن الغول بيتحول لست جميلة تحاول إغاوئهم في طريقهم وتقدر تاخدهم لكهفها فتقتلهم وتاكلهم.اما بالنسبة لامنا الغولة فليها حكاية مشهورة في الحكايات الشعبية.

إلحكاية بتقول ان فيه غولة حبت راجل عادي بسيط وحبها بشكلها البشري من غير مايعرف حاجة عن حقيقتها، واختارت هي  تعيش معاه حياة عادية وطبيعية جدا. وخلفت أمنا الغولة ولدين وفي يوم من الايام اكتشف الزوج بالصدفة أن زوجته بتخرج من البيت بالليل و ترجع قرب الفجر وتنام  كأن محصلش حاجة، طبيعي لعب الشك براسه وقرر يخرج وراها عشان يعرف الحقيقة. تاني يوم نفذ خطته وعمل نفسه نايم واستناها تخرج وراح قايم خارج وراها، لقاها خرجت من قريتهم لقرية جنبهم عشان تقابل اختها، اللي فجأة بيتحولوا لكائنات بشكل قبيح مخيف رهيب كان يسميه العرب سلعوة. وبعدها انطلقوا إلى المقابر ينبشوا القبور، وياكلوا الجثث ويكسروا الرقاب والعضام، طبعا هو شاف كده لف وطلع يجري لبيته مرعوب من اللي شافه ومن ان الغولة دي تبقي مراته وام ولاده .ولما رجعت مراته في ميعادها قرب الفجر زي العادة، طلب منها كوباية ماية - ياقوة قلبك يا جدع - لكن رفضت وقالتله أن صوت الماية بيخوفها. وده عشان الماية حسب الاسطورة بتأذي الغيلان وممكن تموتهم، بس السؤال هنا امال زوجة وأم ازاي من غير ماية مفيش عندهم مواعين. ماعلينا، وبكل بجاحة وجبروت قالها ازاي خايفة من صوت الماية ويفرحك صوت قرقعة الرقاب. ففهمت امنا الغولة ان سرها انكشف، وانا مفهمتش جاب قوة القلب اللي تخليه يكلم غولة بالشكل ده منين.  المهم انها طلعت برده اصيلة وقالت له أنه لولا عيالها لكانت قتلته وكلته - ده اقل واجب ياست الكل -  وراحت ماشية واختفت للأبد مع أختها، تلاقيها بس كانت راجعة شبعانة.

 وكالعادة اسطورة الغول سافرت ولفت ودخلت جوا اساطير حضارات كتيرة زي ما حصل مع اسطورة العنقاء. فعندك مثلا اسطورة الغول اخدت حيز كبير في الاساطير الغربية اللي فضلوا ينطقوا اسمه بالنطق العربي، غول. بس هناك اندمجت مع حكايات اكلي لحوم البشر فقالوا ان أي إنسانٍ يأكل لحم البشر يبقي مش قادر يبطل اكله، ومع الاستمرار في اكل لحوم البشر يتحول إلى غول وحشي مع الوقت فيكبر جسمه وتطلع له الحوافر والأنياب وتختفي صفاته الآدمية مع الوقت ويقل ذكاءه  لكنه يقدر يخطط لاصطيلد الفرائس البشرية لنفسه، يقدر يستخبي ويخطف ضحاياه ويحتجزهم في  مخبأه ويقتلهم وياكلهم، وقالوا أن الغول لا يقتله غير إشعال النيران فيه. وفيلم wrong turn واخد الحكاية دي كويس.

ودي كانت حكاية الغول اول مستحيلات العرب.

مروة طلعت

6/5/2022

#عايمة_في_بحر_الكتب