العنقاء

 قال العرب زمان: المستحيلات ثلاثة، وهم الغول والعنقاء والخل الوفي. النهارده هنتكلم عن العنقاء، ولينا لقاء تاني مع الغول، اما الخل الوفي ده بقي هنسيبه للزمن. 

المتابع لسلسلة افلام هاري بوتر اكيد شاف العنقاء pheonix مع دمبلدور. ولو تفتكر كانت العنقاء بدموعها هي السبب في شفاء هاري من سم التعبان. طب انت عارف ان العنقاء دي اصلها عربي وفيه ناس تانية بتقول اصلها مصري قديم.

ايه هي بقي العنقاء. دي اسطورة قديمة جدا، انتشرت بين اغلب الحضارات القديمة، بسبب اختلاط الحضارات وتناقل الاساطير. هتلاقي ذكرها في أماكن مختلفة بتغيرات بسيطة بين كل قصة والتانية.

بالنسبة للعرب أصحاب الاسطورة الاصليين، العنقاء او طائر النار هو طائر جميل جدا، سموه العنقاء عشان كان عنقه طويل اوي، له منقار طويل مستقيم، وعلي راسه ريشتين راجعين لورا. والعنقاء كان عايش في مكان أشبه بالجنة، وده لان وصف المكان بيقول ان بوابة السماء الضخمة بتفتح وتدخل نور الشمس من خلالها علي المكان ده، وأدام البوابة شجرة ضخمة دايما مخضرة. مكان كله جمال مفيهوش أمراض ولا شيخوخة ولا موت ولا شر ولا خوف ولا حزن. اشارت بعض الروايات ان المكان ده هو اليمن اللي كان معروفة دايما بين العرب باسم اليمن السعيد، سبحان مقلب الاحوال.

العنقاء كانت تصحي كل يوم الصبح تبدأ في ترديد أغنية بصوت رائع. وبعد ألف عام،وفي عز الجمال والخلود ده، تقرر العنقاء انها تتمرد وتنهي خلودها عشان تتولد من جديد - زهقت وعاوزة تعيش المغامرة - وانتقلت لفينيقيا اللي هي سواحل لبنان حاليا، واختارت نخلة عالية جدا واصلة للسما، وبنت عليها عشها. وبعد ما تخلص دورتها في الحياة، تموت محروقة في النار، لحد ما تتحول لرماد، ومن رمادها يخرج دودة بيضا زي اللبن، وبعدها تتحول لشرنقة، ومن الشرنقة تخرج ايه ؟ لا مش فراشة، تخرج عنقاء جديدة تطير وهي شايلة بقايا رماد جسدها القديم، لحد ما توديه لمذبح الشمس في هليوبوليس بمصر اللي هو دلوقتي منطقة عين شمس. وهناك يخرج المصريين لتحية العنقاء قبل ما تطير تاني وترجع لموطنها الاصلي وجنتها.

دي كانت الاسطورة الاصلية للعنقاء. هنلاقي الاسطورة دي راحت للصين ودخلت جوا اساطيرهم، مع حتة التاتش بتاعهم. العنقاء الصينية ليها رأس ديك، وعنق افعي، وفم عصفور - مش عارفة ايه فم عصفور ده مش كان منقار باين - وظهر سلحفاة، وديل سمك، وملون بالوان البغبغان، وطوله حوالي مترين، وعلي راس العنقاء مكتوب كلمة أخلاق، وعلي جناحيه مكتوب كلمة طاعة، وعلي ضهره مكتوب كلمة اخلاص، وعلي بطنه كلمة صدق، وعلي ديله كلمة رحمة. والصينيين اعتبروا العنقاء رمز للبركة والحظ السعيد.وزي ماهو مذكور في الاسطورى العربية برده العنقاء بعد فترة حياتها بتتحرق، وتتحول لرماد، وتخرج من الرماد عنقاء جديدة.

والاسطورة برده هنلاقيها وسط الاساطير الاغريقية. متاخدة زي ماهي من الاسطورة العربية بكل تفاصيلها بس زودوا عليها ان العنقاء مخلوق يتغذي كل يوم الصبح علي قطرات الندي، ودم العنقاء بلسم للشفاء من اي مرض.

رغم ان العنقاء اسطورة او حدوتة قبل النوم بشهادة العرب نفسهم أصل الاسطورة لما حطوها من ضمن المستحيلات التلاتة. الا ان العجيب ان فيه شخصين اصروا وأكدوا انهم شافوا العنقاء. الاول اسمه بليني قال انه شافه ايام حكم الامبراطور الروماني كلوديوس. والتاني اسمه كليمونت قال انه شافه في القرن الاول قبل الميلاد. بس معروف الغرض من كلامهم ده، عاوزين يركبوا الترند الروماني.

طبعا الاسطورة هي عبارة عن فكرة بداية الخلق والبعث والحياة الاخري. وهي دليل علي ان مهما اختلفت الديانات والمعتقدات ففطرة الانسان شاهدة علي الحقيقة.

مروة طلعت

4/5/2022

#عايمة_في_بحر_الكتب