طائر الرخ

 بلغني ايها الملك السعيد ذو الرأي الرشيد، ان السندباد لما قرر ركوب البحر والعمل في التجارة، وسافر مع مجموعة من التجار للسعي ورا لقمة العيش، وشالتهم الامواج وحطتهك من جزيرة لجزيرة، لحد ما وصل لجزيرة مجهولة، نزل التجار والبحارة ومعاهم السندباد، يشوفوا أهل الجزيرة جايز يبيعوا أو يشتروا أكل ومية. لكنهم اكتشفوا ان الجزيرة مهجورة مفيهاش صريخ ابن يومين. وبعد ما لفوا وداروا فيها وملوا من نهرها المية واخدوا من اشجارها الفاكهة، قعدوا يستريحوا شوية. وغلب السندباد النوم بعد ما أكل وشبع راح فارد جسمه وراح في سابع نومة. لما صحي السندباد بص حواليه اتفاجئ انه لوحده، التجار والبحارة نسيوه وركبوا سفينتهم ومشيوا. اتفزع السندباد مش مصدق انه لوحده، جري يمين، وجري شمال ينده ويصيح، لكن لاحياة لمن تنادي. وبعد ساعات من الجري وقع مغمي عليه. ولما فاق طلع فوق شجرة يشوف هيتصرف ازاي في بلوته التقيلة. في الوقت شاف علي بعد قبة بيضا عملاقة جدا. السندباد مكنش يعرف ايه الحاجة الغريبة دي بس كل اللي فكر فيه انها جايز تكون فيها نجاته. نزل السندباد بسرعة، وجري ناحية مكان القبة اللي شافها، ولما وصلها فضل يستكشف ويحسس عليها فلقاها ملساء ناعمة وعالية جدا، فضل يلف حواليها ملقاش ليها مدخل. ولما لف حواليها عد خطواته فلقاها خمسين خطوة. وفي عز ما هو محتار وبيفكر تطلع ايه البتاعة دي، فجأة الدنيا ضلمت وبقت كحل.بص السندباد للسما فاكتشف ان السواد اللي هجم ده ما هو الا ضل لطائر عملاق جدا جدا جدا نازل علي الجزيرة. فافتكر السندباد حكاوي البحارة عن الطائر ده واللي سموه "طائر الرخ"، وفهم ان القبة البيضا العملاقة دي ماهي الا بيضة طائر الرخ. فلما استقر الطار فوق بيضته خلع السندباد عمامته وربط نفسه حوالين مخلب من مخالب الطائر اللي كانت اد جذع شجرة، ولما الطائر طار اخد معاه السندباد بره الجزيرة.

بس قبل ما تدرك شهرزاد الصباح، هتقولكوا يطلع ايه بقي طائر الرخ ده. طائر الرخ من الطيور الاسطورية اللي اصلها عربي،واتذكر في الحكايات الشعبية والاساطير. وصفوا الرخ في الاساطير بانه طائر هائل الحجم، طول جناحه الواحد عشرين الف ذراع - مد دراعك كده وتخيل عشرين الف من نفس الطول ورا بعض كده - ويقدر يشيل فيل بالغ بمنتهي السهولة ويطير بيه، وطبعا هو طائر مفترس اكل للحوم.

وزي اي اسطورة عربية، طارت ولفت العالم وحلت جوا الحواديت الشعبية بتاعتهم بس بحتة تاتش زيادة عشان ميتقلش منحوتة. تقول الاسطورة الغربية واللي اتذكرت في كتاب ماركو بولو، وكذلك في كتاب رحلات ابن بطوطة، ان فيه رحالة غربي معاه تجار وبحارة علي سفينة نزلوا في جزيرة يطلق عليها اسم الرخ 

- ايه ده زي السندباد.

- طبيعي يا مولاي لان الرخ اصله عربي، بس الغرب زي اي حاجة بيحبوا ياخدوا مننا ويجودوا عليها.

 والجزيرة دي كانت عبارة عن جزيرة واسعة وكبيرة، فنزلوا فيها عشان الاكل والمية والحطب ومعاهم فؤوس حبال. وهم ماشيين لقوا قبة كبيرة لونها أبيض وكانت براقة ولامعة. وبهد استكشاف فهموا انها بيضة كبيرة وضخمة. ومن المنطقي لناس نازلة تدور علي اكل لما تلاقي بيضة حتي لو بيضة الرخ علي طول تتخيلها في الطاسة اومليت. علي طول ضربوها بالفؤوس والحطب مع الصخور والعصي وكل حاجة في ايديهم لحد ما  تشققت البيضة واتكسرت، فظهر فرخ الرخ اللي جوا البيضة. قالولك ياسلام اهو ده الكلام ده مش اومليت ياجدعان ده احنا عندنا زفر الليلة. ومكدبوش خبر وعاملوه معاملة الخروف ع الفحم. وبعد ما كلوا والاكل كبس علي نفسهم ناموا. وتاني يوم لموا حاجتهم وركبوا سفينتهم وبدأوا يتحركوا، لكن لا تأتي الرياح دائما بما تشتهي السفن. فجأة الدنيا ضلمت، فبصوا فوق لقوا طائر ضخم جدا جدا جدا. ومش بس كده ده كان شايل مجموعة من الصخور الضخمة. وراح حادف الصخور عليهم كلهم، بس من حسن حظهم قدروا يهربوا عشان السفينة كانت ماشية بسرعة فالصخر بقي يتحدف في البحر واتسبب في امواج رهيبة، لكنهم نجوا.

وفيه حكاية كمان عن طائر الرخ موجودة في الاساطير اليونانية. فكان الرخ هو عقاب الآلهة ل"بروميثيوس"، اللي سرق النار من الاوليمب، واداها للبشر. فكان عقابه انه يتربط في السما بين جبلين، ويجي طائر الرخ كل يوم ياكل كبده وهو حي، وسط ألم وعذاب. وبعديم يطلعله كبد جديد عشان تاني يوم يجي الرخ ياكل الكبد. وهكذا كل يوم الي ما لانهاية. طبعا قصة بروميثيوس دي لوحدها عاوزالها مقالة، لانها مليانة رموز ومعاني كتير محتاجة كلام كتير، فنكتفي المرة دي بالمختصر منها.

- طبعا طائر الرخ كائن اسطوري والحمد لله.

- اه هو كائن اسطوري لانه اتذكر في الحواديت والاساطير. بس مش عاوزة اصدمك يامولاي ان في القرن الواحد وعشرين اكتشفوا حفريات لطائر عملاق شبيه برسومات طائر الرخ في حزيرة مدغشقر، وعليها اثار ذبح وصيد، يعني ان طائئر الرخ مش اسطوري بشكل كامل، ده كان موجود بس انقرض بسبب البشر.

وهنا ادرك شهرزاد الصباح فسكتت عن الكلام المباح.

مروة طلعت 

6/5/2022

#عايمة_في_بحر_الكتب

#عالم_الأساطير