مُمَهِّدُ النصر الملك العادل نور الدين محمود 1
(1) الموصل، فجر الأحد 17 شوال 511 هـ / 10 فبراير 1118 م. سكونٌ يلف أزقة المدينة القريبة من نهر دجلة، هدوءٌ يسبق شروق الشمس، ينكسر بصراخ مولود يدخل العالم في أكثر أوقاته اضطراباً.
في البيوت البسيطة والمباني العتيقة، كان الكل لسه نايم أو بيستعد لصلاة الفجر، إلا البيت ده الحركة فيه ما وقفتش طول الليل. القوابل داخلين طالعين، والهمس شغال، لحد ما الصوت الصغير ده شق الهدوء وحسم الأمر.
بره الأوضة، كان واقف شاب في الثلاثينيات من عمره، أسمر، أسود الشعر واللحية، حاد الملامح، عينيه واسعة وثاقبة فيهم شدة ويقظة، وكان وشه جاد رسمته سنين الخدمة العسكرية في أروقة الدولة السلجوقية، نادر ما تشوف على وشه الابتسامة. طويل القامة، قوي البنية، مفتول العضلات، له هيئة هيبة ووقار.
أول ما سمع صوت المولود، فتح الباب بالراحه، ودخل بخطوات ثقيلة وموزونة وقرب من الفراش. شال المولود الصغير بين يديه. أيد اتعودت تشيل السيف وتحكم لجام الخيل، دلوقتي شايلة حتة منه صغيرة ملفوفة في القماش. رفع المولود قريب من صدره، تأمل في وشه الأسمر الصغير، كأنه بيدور في الملامح الصغيرة دي عن امتداد لدمه ولحمه، عن سند لأخوه الكبير "سيف الدين غازي" اللي بيجري بره في أروقة البيت.
قرب منه، وقرأ في أذنه الآذان بنبرة هادية وبصوت رخيم، ولما خلص، بص لنور الشمس اللي بدأ يطلع، ونطق الاسم اللي اختاره له "نور الدين محمود بن عماد الدين زنكي بن أق سنقر".
رجع حطه في مهده، وكأنه أدى مهمة سريعة في أجندة يومه المليان. ما كانش فيه وقت للراحة أو للمشاعر الطويلة؛ الدنيا بره بتغلي، والسياسة في البلاط السلجوقي ما بترحمتش حد، والصليبيين على بعد خطوات في الشام بياكلوا في أرض المسلمين حتة حتة.
خرج "عماد الدين زنكي" من الأوضة، ورجع لورقه وسلاحه. وفي المهد الصغير، فضل "نور الدين محمود" ساكت، يفتح عينيه الصغيرين لأول مرة على زمن اتخلق له مخصوص، واستنشق مع أول أنفاسه رائحة غبار الخيل، وسمعت اذنه صليل السيوف في نغمة عشقها طوال حياته.
وهنا زي ما عودتكم الباحثة مروة طلعت بـ "عدسة التاريخ" في صفحتكم "عايمة في بحر الكتب"، لما بنرجع بالزوم لنشأة العظماء: نكتشف إن "نور الدين محمود" كان نبت صالح طالع من عيلة صالحة، كانت العيلة الزنكية عيلة تشرف من الأب للجد. عشان نفهم العرق اللي طالع منه الطفل الصغير «نور الدين محمود»، لازم نرجع بالزمن شوية لورا.. نرجع لراجل كانت حكايته هي البذرة الأولى لده كله. الراجل ده اسمه "آق سنقر الحاجب".
من اسمه كده، تقدر تعرف إنه طالع من قلب قبائل الأتراك، وتحديداً من قبيلة ليها وزن وهيبة كبيرة عند السلاجقة اسمها قبيلة «ساب يو»، وتعود جذورها التاريخية إلى منطقة حوض البحر الأسود وشمال القوقاز.
"آق سنقر" مكنش مجرد فارس عادي؛ ده كان من أقرب الناس لقلب وعين السلطان السلجوقي "ملكشاه بن ألب أرسلان".. السلطان العظيم اللي كانت حدود دولته ممدودة من أطراف الصين شرقاً لغاية آسيا الصغرى غرباً. "ملكشاه" كان حاكم عادل وسيرته حسنة، وطبيعي الراجل الصالح ما يقرّبش منه إلا الصالحين اللي شبهه. يكفيك تعرف إن وزيره الأولاني كان أسطورة الوزراء في تاريخ الإسلام "نظام الملك"، والحاجب الخاص بتاعه وكاتم أسراره، كان "آق سنقر" والد "عماد الدين زنكي"، وجد الطفل اللي لسه مولود "نور الدين محمود". سبحان من يسّر للملك العادل بطانة صالحة تعينه.
قرب "آق سنقر" من قلب السلطان "ملكشاه" وصل لدرجة ما حدش حلم بيها؛ أنعم عليه بلقب عجيب وله رنة هيبة، سماه "قَسِيمُ الدَّوْلَةِ"! يعني كأن السلطان بيقوله: انت بتشاركني وتقتسم معايا إدارة البلد وشؤونها.. ودي منزلة رفيعة ومكانة مميزة.
وفي الوقت ده، كانت الشام بتغلي وتتقطع من الصراعات السياسية الصعبة، وبالذات مدينة حلب اللي كانت زي الجوهرة اللي الكل بيتخانق عليها. كان فيه ثلاث قوى نازلين ضرب في بعض عشان يسيطروا عليها: القوة الأولى: "مسلم بن قريش العقيلي"، صاحب الموصل وحلب. والقوة الثانية: "تتش بن ألب أرسلان"، أمير دمشق. و"تتش" ده يبقى أخو السلطان "ملكشاه"، بس سبحان الله، كان راجل خبيث وفاسد عكس أخوه تماماً، وطلعوا أولاده من بعده "رضوان" و"دقاق" ألعن منه وعلى نفس شاكلته. القوة الثالثة: "سليمان بن قتلمش"، المؤسس العفي لإمارة سلاجقة الروم، ووالد "قلج أرسلان الأول". ودخلت الثلاث قوى دول في طاحونة صراع مأساوية؛ انتحرت فيها النخوة، وانتهت المعركة بمقتل "مسلم بن قريش" على إيد "سليمان بن قتلمش".
أول ما اتقتل "مسلم"، بقى الطريق لمدينة حلب مفتوح ومفروش بالورد قدام "سليمان بن قتلمش" عشان يدخلها ويمتلكها. بس أهل حلب كان لهم رأي تاني خالص.. رفضوا تماماً يسلموا مدينتهم لـ"سليمان"، وعملوا حركة ذكية؛ بعتوا بسرعة للسلطان العادل "ملكشاه" يستنجدوا بيه ويقولوله: تعالى استلم حلب واحمينها.
السلطان "ملكشاه" مكدّبش خبر، وافق فوراً، وتحرك بجيشه الجرار على حلب. وفي السكة والجيش متحرك، كانت الأحداث بتجري زي النار في القش؛ "تتش بن ألب أرسلان" خاف من "سليمان" ياخد الكعكة لوحده، فهجم على "سليمان بن قتلمش" وقتله. وانطلق "تتش" زي المجنون يطير بخيوله عشان يلحق يستولي على حلب قبل أي حد. بس يا مولاي كما خلقتني، وصل أسوار حلب في نفس اللحظة اللي كانت فيها الرايات السوداء والبيضاء لجيش أخوه "ملكشاه" ظاهرة من الأفق. وقف "تتش" وهو راكب على فرسه، وبص على الجيش العملاق اللي طالع له زي السيل، عرف لحظتها حجمه وإن العين ما تعلاش على الحاجب، وإنه لا طاقة له بالجيش ده. شرب حسرته، ولم ديله في سنانه وانسحب فوراً من المشهد، وساب حلب يدخلها أخوه السلطان "ملكشاه" بالفوز والتمكين.
أول ما السلطان "ملكشاه" حط رجله جوه حلب، بص حواليه واتصدم.. المدينة كانت متدمرة، الصراعات الدموية اللي طحنت المنطقة هدّت حيل البلد وقطعت أنفاسها. "ملكشاه" قرر أن المهمة دي مش عايزه أي حد، دي مهمة عايزه راجل بمواصفات خاصة؛ راجل بيجمع بين العقل، والأخلاق، والوعي، والقدرة الصارمة.. والمواصفات دي تنطبق على دراعه اليمين "قَسِيمُ الدَّوْلَةِ آقْ سُنْقُرْ الحَاجِبْ".
وفي شهر شوال سنة 479 هـ / يناير 1087 م، سلم "ملكشاه" مقاليد حلب لـ"آق سنقر"، وبكده بدأ رسمياً الحكم السلجوقي للمدينة. ووسّع صلاحياته وأداه معاها مدن تقيلة في المنطقة زي حماة، ومنبج، واللاذقية. استلم "آق سنقر" حلب وهي في أتعس حالاتها.. حالة مزرية من الفوضى والاضطراب. الأمراء والحكام اللي وُردوا عليها قبله كان كل همهم الصراع والكرسي، محدش فيهم فكر يهتم بالأمور الداخلية، ولا الحياة الاقتصادية اللي ماتت. الموارد والتجارة تراجعت للحضيض، وعشان يغطوا عجزهم فرضوا ضرائب باهظة كتمت نفس السكان. ونتيجة الطبيعية للغلاء والفقر الأسعار ولعت، اللصوص وقطاع الطرق انتشروا في كل حارة وزقاق، الأمن انعدم تماماً، حركة التجارة وقفت، والزراعة بارت وأرضها جفت، المجتمع كله كان بينهار ويدوب كل يوم.
وسط التدهور الرهيب ده في كل مناحي الحياة، "آق سنقر" شمر عن ساعديه وبدأ يشتغل بنشاط وهمة تنطح السحاب. الحلو فيه إن نظريته للإصلاح كانت شمولية؛ ما مسكش جنب وساب التاني، ولا قال أصلح الاقتصاد وأنسى الأمن، ده دخل على المشاكل كلها جملة واحدة. أول خطوة حاسمة كانت الحالة الأمنية الخطيرة اللي بتنهك حلب، أقرب ردع كان تطبيق الحدود الشرعية بكل حزم. طارد اللصوص وقطاع الطرق في جحورهم، قضى عليهم، وتخلص تماماً من رؤوس الفساد والمتطرفين فيه. وبجانب إنه بنى جهاز شرطة قوي وعادل، هدفهم حماية الناس والدفاع عن حقوقهم مش التسلط عليهم، ابتكر "آق سنقر" سياسة أمنية داهية وعجيبة جابت ثمار أسرع من الخيال. أقر مبدأ المسؤولية الجماعية لكل قرية أو حي في المدينة.
يعني إيه؟ يعني لو عدت قافلة أو إنسان غريب في نطاق قريتك واتهاجم، أهل القرية كلهم مسؤولين عن الدفاع عنه. ولو اتسرقت فلوسه؟ يجتمع أهل القرية كلهم يدفعوا من جيبهم ويعوضوه عن فلوسه اللي اتسرقت منه. وبكدة المعادلة اتغيرت في ثواني؛ الأمن ما بقاش شغلانة الشرطة لوحدها، الأمن بقى شغلانة كل فرد في البلد. لو حد شك في حرامي أو عصابة، ما بقاش يسكت أو يطنش، كان يروح يبلغ فوراً؛ لأن أي جريمة هتتحسب على جيب أهل المنطقة كلهم. والفكرة الذكية دي لها أصل في الشريعة الإسلامية، وهو مبدأ «العاقلة»؛ بمعنى إن أفراد العيلة أو القبيلة أو القرية الكبيرة، يتعاقلون ويتعاونوا بينهم عشان يجمعوا الدية أو يسددوا الدين عن حد منهم، وبكده الحقوق ترجع لأصحابها كاملة مهما كانت كبيرة، وأمان الشوارع يرجع من تاني.
وبسبب السياسة البارعة دي، والتطبيق الدقيق الشديد ليها، واستخدام جهاز الشرطة في المكان الصحيح وللغرض الصح، وبعد شهور قليلة كان الأمن والأمان بيسري في كل شبر وكل ربوة في الإمارة. الهدوء اللي سكن الشوارع انعكس فوراً على حركة الزراعة والتجارة؛ التجار اللي كانوا بيخافوا يمشوا بضايعهم بقوا يروحوا ويجوا وهم مطمنين. الحركة المالية اشتغلت، البضائع اتدفقت في الأسواق، والاقتصاد تحسن بشكل ملموس جداً. الأسعار المرتفعة نزلت، المنتجات بقت متوفرة في كل دكان، وحلب بعد ما كانت بتغرق في الفوضى، بقى ليها شأن عظيم ووزن يرهب المدن المجاورة كلها.
وهنا ييجي سؤال بيجي في بال ناس كتير.. "آق سنقر" كان حريص تمام الحرص إنه يقيم الحدود الشرعية، ناس مقطوعة إيديها من السرقة، وناس مقتولة في القصاص، وزناة محصنين مرجومين، وزناة غير محصنين ومشارب خمر مجلودين في الشوارع. هل تطبيق الحدود دي هيخلق مجتمع مشوه؟
الحقيقة والواقع كانوا عكس التخيل ده تماماً، تطبيق الشريعة بحزم مع مجرم أو اتنين كان كفيل إنه يطير العقل من رأس باقي المجرمين ويكون رادع مرعب للكل. المصادر التاريخية نقلت إن الأغلبية العظمى من المجرمين وقطاع الطرق ارتدعوا تماماً ورجعوا عن جرائمهم أول ما شافوا الجدية والحزم. فأصبحت حياة حلب، وأمنها، وعزها، وانتعاش اقتصادها، وعلو شأنها بين الدول، سرّها كله كان في القصاص، وفي الالتزام بالحدود الشرعية والتطبيق الحرفي لكتاب الله وسنة رسوله صلى الله عليه وسلم.
ووصل الأمن في حلب لمستوى متناهي ومذهل، لدرجة إن "آق سنقر" نادى في أهل حلب بأمر عجيب، قالهم: لو حد فيكم ماشي في الطريق ومعاه متاع أو بضاعة وعاوز يروح مكان بعيد ويرجع، ما يرفعش متاعه ولا يشيله، يسيبه في الشارع زي ما هو ويمشي من غير ما يحط عليه حارس واحد، وهو ضامن إن مفيش أي حاجة هتتسرق منه! كان أمن عجيب وساحر، بقى حديث الناس في الشرق والغرب، وكل مسافر يدخل حلب يرجع يحكي عن أرض العجائب اللي العدل فيها بقى أسلوب حياة.
في يوم من الأيام، كان "قسيم الدولة آق سنقر" بيمر بنفسه على قرية من قرى حلب، يتفقد أحوال الناس بعين الحاكم اللي بيراعي أدق التفاصيل. وهو ماشي، لمح فلاح بسيط طالع من حقله بعد ما خلص شغله الطويل. الفلاح مكنش يعرف شكل "آق سنقر" أصلاً؛ شاف راجل هيبة واقف قدامه. كان الفلاح بيستعد يحمل آلة من آلات الزراعة بتاعته على دابته عشان ياخدها معاه وهو راجع البيت، وكانت الآلة دي ملفوفة ومغلفة بالجلد. قرب منه "آق سنقر" وسأله بهدوء: «ألم تسمع مناداة قسيم الدولة بأن لا يرفع أحد متاعاً ولا شيئاً من موضعه؟» كأنه بيفكره إن الحاكم ضامن له حماية حاجته في مكانها وما حدش هيجرؤ يلمسها.
رد الفلاح بكل بساطة وفطرة، ومن غير ما يعرف إنه بيكلم الحاكم نفسه: «حفظ الله قسيم الدولة، وقد أُمِّنا في أيامه، وما نرفع هذه الآلة خوفاً عليها من السرقة، لكن هنا حيوان يُقال له ابن آوي تأتي الى هذه الآلة فتأكل الجلد الذي عليه، فنحن نحفظه منها ونرفعه لذلك!». الموقف ده هز "آق سنقر" من جواه، هو مكنش عاوز أمن بني آدمين حلب من بعضهم بس، ده عاوز يوصل بالأمن إنه يحمي حلالهم حتى من حيوانات البرية. أول ما رجع حلب، أصدر أمر فوراً لكل الصيادين في الإمارة كلها، إنهم يتتبعوا جحور ابن آوى في كل شبر وكل قرية، وفضلوا وراها لحد ما صادوها وأفنوها تماماً من المنطقة. كان أمن بيخرج عن حدود الواقع وبيدخل في زون الخيال المحض، أمن ما تحلمش بيه أي دولة!
إسهامات "آق سنقر" مش محصورة في الأمن والشرطة بس؛ ده إسهاماته العمرانية بتثبت إنه كان قائد متوازن لأقصى درجة، مهتم بكل كبيرة وصغيرة في إدارته. ومن أعظم الآثار دي إنه جدد منارة مسجد حلب الجامع، والجميل إن اسمه لسه منقوش ومحفور عليها لحد النهاردة يشهد على عصره.
أما بقى في المجال العسكري؟ فحدث ولا حرج! "قسيم الدولة" كان راجل منظم لأبعد حد. بنى جيش نظامي ثابت ومعظمه من التركمان الشجعان، وما اكتفاش بكده؛ ده عمل كمان جيش احتياطي قوي جداً خليط من العرب والتركمان، وكانت القوات الاحتياطية دي لوحدها بتبلغ عشرين ألف مقاتل على أتم استعداد للنزول للميدان في أي لحظة.
وهنا، ومن خلال عدسة التاريخ للباحثة مروة طلعت، بنستعد نتابع تفاصيل الحكاية: يا ترى إيه اللي حصل وخلى حلم الأمان ده يتهز؟ وإزاي "عماد الدين زنكي" هيطلع من قلب المعمعة دي عشان يشيل الراية؟ ده اللي هنعرفه سوا في الفصل اللي جاي ان شاء الله.
(يتبع)
.png)
تعليقات
إرسال تعليق