بدر الجمالي 12

(12)  "بدر الجمالي" كان راجل قوي ومسيطر، هو اللي كان ماسك كل حاجة في الدولة الفاطمية، واللي بفضله الفاطميين استقروا بعد الشدة المستنصرية واللي كانت بسبب الصراعات الداخلية. "بدر الجمالي" كان وزير الخليفة الفاطمي "المستنصر بالله"، وهو اللي مسك الجيش وضبط الأمن والإدارة، مكنش سهل، كان قائد عسكري أصله أرمني واتدرج لحد ما بقى الوزير اللي بيحكم البلد حرفيا.

في كل خطوات حياة "بدر الجمالي" كان معاه رجالته المخلصين، من أهمهم ولاده الاتنين، الكبير "الاوحد أبو الحسن مظفر الدولة" والتاني "الأفضل شاهنشاه"، لكن المقرب ل"بدر الجمالي" أكتر ودراعه اليمين كان "الأوحد". "الأوحد أبو الحسن" كان بكري أبوه وبير أسراره ودراعه اليمين، وفي كل خطوة كان "بدر الجمالي" بيعملها كان "الأوحد" مشترك معاه. "الأوحد" كان قائد جيش الأرمن لما دخلوا مصر، وحارب جنب أبوه في الوجه البحري وأسكندرية، وحارب معاه في الصعيد، وأشترك معاه في بناء القاهرة، وإعادة الطرق التجارية، وتأمين الحدود والمواني. "الأوحد أبو الحسن" كان قائد عسكري، في حين "الأفضل شاهنشاه" كان راجل سياسي عشان كده كانت مهمته إدارية عكس أخوه الكبير. والأتنين الحقيقة ورثوا من أبوهم صفات كتيرة، منها الطموح والحزم والعناد، يمكن "الأفضل" ورث الذكاء أكتر من "الأوحد" وده هنعرف سببه دلوقتي. 

"الأوحد أبو الحسن مظفر الدولة بن بدر الجمالي" واضح إنه كان شايف نفسه حاجة كبيرة، مش مجرد ابن وزير، كان طموحه إنه يبقى الحاكم الفعلي، مش مجرد وارث لاسم أبوه. وده برده كان نفس طموح "الأفضل شاهنشاه"، لكن كل منهم سلك طريق مختلف لتحقيق الطموح ده.

"الأوحد" بدأ يحس إنه مش واخد المكانة اللي يستحقها في الدولة. هو صحيح قائد عسكري كبير وابن أقوى راجل في مصر والدولة الفاطمية ككل، بس كان شايف إن أبوه مسيطر على كل حاجة وما بيديش لحد فرصة يتصرف منفرد عنه، وخصوصا إنه كان معروف إن "بدر الجمالي" حاسم ومبيعرفش الحال العوج، ومكنش بيسمح لحد يعارضه حتى لو كان أقرب الناس ليه. وهنا قرر "الأوحد" أنه يتمرد على أبوه عشان يحقق طوحه ويشبع أطماعه.

في سنة 477 هجرية / 1084 ميلادية، "الأوحد" أستغل مكانه ومنصبه وجمع قوة عسكرية من الموالين ليه، سواء من اللي شايفين إن "بدر الجمالي" بيسيطر على البلد بقبضة حديدية ومدايقين من السيطرة دي، أو من اللي شايفين فرصة في دعم ابن الوزير لإنه ممكن يكون أكتر مرونة من أبوه. جمع "الأوحد" جيشه الخاص وطلع على الإسكندرية. وقتها كانت الاسكندرية مدينة مهمة جدا، وكان ليها وضع خاص، بعيدة شوية عن السيطرة المباشرة للقاهرة، وفيها عناصر ممكن يتم استغلالها في أي تمرد أو ثورة. 

"الأوحد" قدر يسيطر على الوضع ودخل في حرب مع والي الاسكندرية، اللي مقدرش على جيش "الأوحد" وأنهزم قصاده. بعدها أعلن "الأوحد" نفسه حاكم الإسكندرية، وده كان تمرد صريح على والده الوزير السيد الأجل أمير الجيوش "بدر الجمالي". واللي زاد الطين بله أن أهل اسكندرية نفسهم تحالفوا مع "الأوحد" وأعلنوا ولائهم ليه. تخيل الموقف، ابن الوزير اللي المفروض يكون واثق في حكم أبوه ويدعمه، وأبوه واثق فيه ثقة عمياء ثقته في نفسه شخصيا، قرر يتمرد عليه ويواجهه بجيش!.

أحنا شفنا الموقف ده قبل كده مع "أحمد بن طولون" لما تمرد عليه ابنه "العباس"، لكن "بدر الجمالي" مشافوش ومسمعش عنه. "أحمد بن طولون" وقتها كان شاب وقلبه لسه قوي، أنما"بدر الجمالي" وقتها كان 79 سنة. صحيح أن "بدر الجمالي" راجل عسكري محنك وعارف إزاي يتعامل مع الأزمات، وعارف إن أي تمرد، ممكن يهدد استقرار الدولة كلها، ولو سابه، حتى لو كان إبنه، ممكن ناس تانية تتجرأ وتعمل زيه. لكن الطعنة كانت شديدة أوي عليه. صحيح برده أنه أتصرف بحزم معروف عنه بسبب ثباته الانفعالي، ومدخلش المشاعر الشخصية في الموضوع، لكن الموقف ده هده حرفيا بعدها زي ما هنشوف.

"بدر الجمالي" مستناش كتير، جهز جيشه واتحرك على الإسكندرية بسرعة، لأنه كان عارف إن الوقت مش في صالحه، ولو ساب التمرد يكبر، ممكن يحصل انشقاقات أكبر. وبما إنه قائد عسكري من الدرجة الأولى، خطته كانت واضحة، يدخل الإسكندرية، يسحق التمرد، ويعيد السيطرة بدون أي تفاوض، يعني اقطع عرق وسيح دمه وأنسى أنه ابنك زي ما هو نسي في الأول أنك أبوه.

الإسكندرية بقت مسرح لمعركة بين قوات "الأوحد" وقوات أبوه "بدر الجمالي". محدش عارف "الأوحد" كان بيفكر في إيه وهو واقف قدام أبوه في ساحة القتال الند بالند، هل كان عنده أمل إنه يكسب؟ هل كان شايف إنه فعلا يستحق الحكم أكتر من والده؟ ولا كان شايف إنه بيحقق عدالة غائبة؟.

بس اللي حصل إن "بدر الجمالي" كان أقوى، ونجح في دخول الإسكندرية وهزيمة قوات الأوحد. التمرد ما استمرش كتير، وما كانش عنده فرصة ينجح قدام الخبرة العسكرية والسياسية ل"بدر الجمالي". لكن منسيش "بدر الجمالي" يعلم أهل الاسكندرية الادب، ويقرص ودنهم عشان ميغلطوش الغلطة الفظيعة دي تاني، وميخرجوش برة حظيرته. فرض عليهم حصار وعقوبات وقبض على كل اللي كانوا مع "الأوحد" وأعدمهم في ميدان عام.

بالنسبة ل"الأوحد" للأسف المصادر ما بتقولش بشكل واضح مصيره ايه بعد فشل التمرد. بعض الروايات بتقول إن "بدر الجمالي" سامحه، وبعضها بتميل لفكرة إنه اتعاقب، بس الواضح إن اسمه اختفى تماما بعد كده من المشهد السياسي، وكأنه مكنش له وجود، وده في حد ذاته بيقول إنه ما عدش له تأثير بعد اللي عمله، أو اتسجن، أو اتقتل والله أعلم.. بإيدي يا ولدي أطهرك من الخيانة.

تمرد "الأوحد" على والده "بدر الجمالي" بيقول حاجات كتير عن الصراعات السياسية في الدولة الفاطمية، وإنه حتى أقرب الناس لبعض ممكن يقفوا ضد بعض في سبيل السلطة. ابن الوزير القوي قرر يتمرد، لكنه اكتشف إن القوة الحقيقية مش بس في الطموح، لكن في الخبرة والسيطرة اللي كان أبوه متفوق فيها. في الآخر، القصة دي بتورينا إن مش كل ابن يقدر ياخد مكان أبوه، وإن السياسة لعبة مش مجرد قوة، لكن فيها تخطيط ودهاء، وده اللي "بدر الجمالي" كان بيفهمه أكتر من ابنه.

"بدر الجمالي" صحيح انتصر على ابنه "الأوحد" ورجع سيطرته ونفوذه في كل مكان بسهولة، لكن "الأوحد" هزم أبوه نفسيا وصحيا وعقليا. من بعد رجوع "بدر الجمالي" من الاسكندرية سلم كل حاجة ومناصبه كلها لابنه "الافضل شاهنشاه"، وأعتزل الناس والعالم في جامع بناه على المقطم، المعروف حاليا بجامع الجيوشي، وتفرغ تماما للعبادة.

في أواخر عهد الخليفة الفاطمي "المستنصر بالله"، بدأ "بدر الجمالي" يركز أكتر على الإشراف على الدعوة الفاطمية، وده مكنش عاجب بعض أتباع الدعوة خصوصا في اليمن والهند. وفي يوم 7 محرم سنة 479 هجرية / 25 إبريل سنة 1086 ميلادية، بعت "المستنصر بالله" سجل رسمي لدعاته في اليمن، بيأكد فيه إنه نقل سلطة "بدر الجمالي" لابنه "الأفضل شاهنشاه" في احتفال ضخم، وأمر إن الدعاء يبقى للخليفة الأول، وبعده ل"بدر الجمالي" زي ماهو، وبعدهم يضيفوا "الأفضل شاهنشاه". وفي نهاية السجل، جه نص صريح بيقول: "الأمر بإبطال ذكر الملقب كان بالأوحد من دعاء في خطبة أو ندى من الأندية وأن يمحى رسمه ويزال حكمه". وده معناه إن "الأوحد" تم عزله وشطبه تماما بعد محاولة تمرده الفاشلة.

وفي سجل تاني بعته "المستنصر بالله" للأمير "عبد المستنصر بن المكرم أحمد" في اليمن، قال فيه إنه وكّل "الأفضل شاهنشاه" بكل ما يخص الحكم، والجيش، وأمور السلطنة، وإن "بدر الجمالي" هيبقى مشرف على علوم الأئمة والدعوة الفاطمية بس. وعلشان كده مش غريب إن اسم "الأفضل شاهنشاه" ظهر في كتابة تاريخية مؤرخة سنة 482 هجرية/ 1098 ميلادية، كانت موجودة في المشهد النفيسي لكنها اتشطبت، ولكن نصها اتحفظ عند المؤرخين زي المقريزي والسخاوي. كمان ألقابه ظهرت في كتابة تانية في محراب الجامع الطولوني. وده معناه برده أنهم كانوا بيرمموا الجوامع السنية زي جامع أحمد بن طولون وجامع عمرو بن العاص عادي.

بعد كده "بدر الجمالي" أصيب بالفالج - الشلل الناتج عن سكتة دماغية أو تلف في الجهاز العصبي، وغالبا بيؤدي إلى فقدان القدرة على الحركة في جزء من الجسم - وده خلاه مش قادر يدير الأمور بنفسه، فاضطر "المستنصر بالله" إنه يصدر سجل جديد يأمر فيه إن الدعاء يبقى ل"الأفضل شاهنشاه" مع الخليفة على منابر القاهرة ومصر، وقلّده "أمور المملكة والنظر في سائر أمور الدولة وقضاياها وشرائعها وأحكامها". السجل ده اتقري رسميا في الإيوان بالقصر الفاطمي في العشر الأواخر من شهر ربيع الأول سنة 487 هجرية / يوليو 1094 ميلادية.

وبعدها بشهور قليلة، وفي نفس السنة (487 هجرية / 1094 ميلادية)، "بدر الجمالي" توفى وهو مكسور القلب والروح عن عمر 89 سنة، بعد رحلة طويلة كان فيها هو الحاكم الفعلي لمصر لسنين طويلة، وأعاد الاستقرار بعد الشدة المستنصرية، لكن في النهاية الأمور خرجت من إيده، وسابها لابنه "الأفضل شاهنشاه". وسبحان من له الدوام.

مروة طلعت 

1/2/2025

#عايمة_في_بحر_الكتب

#الحكاواتية

#بتاعة_حواديت_تاريخ

#بدر_الجمالي

#الشدة_المستنصرية

#الدولة_الفاطمية

المصادر:

النجوم الزاهرة في ملوك مصر والقاهرة ج5 - ابن تغري بردي.

اتعاظ الحنفا بأخبار الأئمة الخلفا ج2 - المقريزي.

سير أعلام النبلاء الطبقة 25 - شمس الدين الذهبي.

المواعظ والاعتبار بذكر الخطط والآثار ج2 - المقريزي.

تاريخ مصر في العصور الوسطي - ستانلي لين بول.

الدولة الفاطمية في مصر تفسير جديد - د/ أيمن فؤاد سيد.

السجلات المستنصرية - د/عبد المنعم ماجد.

الوزارة والوزراء في العصر الفاطمي - د/ محمد حمدي المناوري.

حياة العامة في مصر في العصر الفاطمي - د/ نجوى كيرة.

تاريخ الدولة الفاطمية - حسن ابراهيم حسن.

الفاطميون في مصر - محمد كامل حسين.

الجزء الاول

https://www.facebook.com/share/p/1EFFerD421/

الجزء الثاني

https://www.facebook.com/share/p/18jUMy2uw9/

الجزء الثالث

https://www.facebook.com/share/p/19GEkNWqbp

الجزء الرابع 

https://www.facebook.com/share/p/1AENGC8NXH/

الجزء الخامس

https://www.facebook.com/share/p/1BA8p11mjR/

الجزء السادس

https://www.facebook.com/share/p/18GzcW9peZ/

الجزء السابع

https://www.facebook.com/share/p/1cGTKmxZqW/

الجزء الثامن

https://www.facebook.com/share/p/197oUd2YvV/

الجزء التاسع

https://www.facebook.com/share/p/15af

GxjuUm/

الجزء العاشر

https://www.facebook.com/share/p/15tshY4emy/

الجزء الحادي عشر 

https://www.facebook.com/share/p/1XStNGiEjw/