الظاهر بيبرس البندقداري 30 الأخيرة

(30) السلطان المملوكي "الظاهر ركن الدين بيبرس البندقداري"، واحد من أعظم حكام مصر اللي سابوا بصمة قوية في تاريخها، مش بس بحكمه وإنجازاته، لكن كمان بحكاياته الشعبية اللي اتنقلت من جيل لجيل، وكانت بتتغنى على الربابة في ليالي السهر وفي صندوق الدنيا زي سيرة أبو زيد الهلالي. 

الناس مشافتش في السلطان "الظاهر بيبرس" حاكم عادي، لكن شافته بطل خارق قادر على مواجهة الأخطار، دايما عادل، وبيفكر بذكاء خارج عن المألوف. حكايات كتيرة اتقالت عنه، بعضها حقيقي عن شجاعته الحقيقية، وبعضها من خيال الناس اللي فضلوا يحكوا عنه كأنه رمز للحكمة والقوة والكرامات. الناس كانوا دايما بيتخيلوا "بيبرس" بطل ما حدش يقدر يهزمه، وساحر زي اللي في الحواديت. 

في المقال ده، هنغوص مع بعض في أشهر الحكايات والأساطير اللي بتحكي لنا جانب تاني من حياة "بيبرس"، وبتخلينا نشوفه بعين الناس البسيطة اللي شافوا فيه صورة البطل الشعبي الخارق الأسطوري.

أول حكاية خيالية: "بيبرس وتنين الشام"، ألفوها أهل الشام، بتقول إن كان فيه "تنين" بيطلع في الشام، بيرعب الناس وبيخطف الأطفال. فراح "الظاهر بيبرس"، وقالهم إنه هيتصرف. خد سيفه ورِكِب حصانه وراح يدور على التنين. الناس قعدت مستنية والكل خايف إنه مش حيقدر على التنين، لكن "بيبرس"، اللي معروف بشجاعته، قدر يقتل التنين ورجع بالسلامة. القصة دي خلقت في ذهن الناس صورة إن "بيبرس" مش مجرد حاكم، لأ ده كمان بطل بيمثل الأمان وبيحمي الناس من الوحوش.

تاني حكاية خيالية: "بيبرس والعدالة". "الظاهر بيبرس" كان مشهور بالعدل، بس القصص الشعبية بتحكي حكايات بتبرز عدله بشكل خيالي. الحكاية بتقول إن فيه واحد فقير أتظلم من أمير مملوكي كبير، وكل ما يروح المحكمة يتحكم ضده. ولما قدر الفقير يوصل مظلمته للسلطان، راح "بيبرس" بنفسه للمحكمة وهو متنكر في شكل فقير وسأل عن الحكاية. ولما عرف الظلم اللي بيحصل، اتدخل وخلى القاضي يحكم بالعدل للفقير، ومن يومها الناس فضلت تتغنى بعدله، لدرجة إنهم افتكروا إنه دايما بيبقى متنكر بين الناس عشان يحافظ على حق المظلومين.

ثالث حكاية خيالية: "بيبرس وحيلة الحصون". الحكايات دي كانت بتتقال عن ذكاء بيبرس في الحروب. واحدة من القصص دي بتقول إنه لما حصن كبير من حصون الأعداء صعب على الجيش إنه يدخلوه، قرر "بيبرس" يستخدم حيلة ذكية. بعت رسالة للحاكم يقول فيها إنه جاي يسيطر على الحصن بجيش كبير، وإنه قدامه خيارين، يا إما يسلم الحصن، أو يتعرض للهجوم. الحاكم اللي كان مرعوب سلم الحصن بدون أي معركة. طبعا القصة بتبين قد إيه الناس كانوا شايفين "بيبرس" مش بس شجاع، كمان ذكي وحكيم وبيعرف يستخدم عقله في الحروب، وكان مرعب ومخيف للأعداء.

رابع حكاية خيالية: "حكاية الكرامات". زي ما بعض الناس شافوا فيه الشجاعة والعدل، كمان شافوا فيه بركة وكرامات، وقالوا إنه كان قادر يتواصل مع الأولياء الصالحين. بيقولوا إنه في مرة كان محتاج يخوض معركة صعبة، وقعد يصلي ويدعي لحد ما شاف رؤية بتقوله إنه هينتصر، وطلع "بيبرس" للمعركة وفعلا انتصر. القصة دي من الأساطير اللي دخلت جزء من التدين والتصوف ـ وهو في الحقيقة كان حنفي ملوش في الصوفية ـ في شخصية "بيبرس"، وإنه بطل مش بس في القوة، لكن كمان في الروح.

خامس حكاية خيالية: "بيبرس وذكاء الحرب". ودي من القصص الغريبة واللي فضلت داخلة في سيرته وكأنها حقيقة. الحكاية بيتحكي إن "بيبرس" كان في معركة صعبة، وجيشه كان تعبان من شدة المعارك الكتيرة، والأعداء كانوا كتير، وأمله ضعيف إنه ينتصر. ففكر في حيلة ذكية، قسم جيشه على مجموعات صغيرة وراحوا يضربوا العدو من كل جهة، فحس الأعداء إنهم متحاصرين من كل ناحية. الأعداء اضطروا للهرب، وفاز "بيبرس". دي كانت من القصص اللي بتبين دهاءه العسكري، وإنه بيعرف يحط خطط مش بس تعتمد على القوة.

سادس حكاية خيالية: "عائشة البشناتية"، الحكاية دي عاوزة قاعدة وتربيعة، فيه قصتين أتقالوا وأتروجوا عن "عائشة البشناتية". في البداية كده "عائشة البشناتية"، تبقى زوجة "الظاهر بيبرس" الأثيرة وأقرب زوجاته لقلبه، وعشان كده قصتها معاه مليانة حكايات وأساطير شعبية. 

في القصص الشعبية، بيحكوا إن "عائشة البشناتية" كانت بنت من عيلة كبيرة ومرموقة، وليها مكانة في المجتمع حتى قبل ما تتجوز "بيبرس". قالوا إنها كانت مشهورة بجمالها وأدبها وذكائها، وكان عندها نوع من "الجاذبية" اللي خلت "بيبرس" يهتم بيها. الحكايات كمان بتقول إنها كانت عارفة بأمور السياسة والحكم، وده اللي خلى "بيبرس" يقدرها من أول ما اتعرف عليها. بس تفضل حاجات زي دي فيها شوية خيال وتضخيم، لأن الناس في زمانها حبوا يخلوا قصتها تبدو مشوقة وملحمية.

كانوا بيقولوا إنها كانت ست ذكية ودايما ليها رأي وقيمة كبيرة في القصر، ولما ب"يبرس" اتجوزها، بقت لها مكانة خاصة. هي مش بس كانت من أصل شريف، لكن كمان كانوا بيشيدوا بحكمتها وشجاعتها، و"بيبرس" نفسه كان بياخد رأيها في حاجات كتير، لدرجة إن بعض الناس كانوا شايفين إنها شريكة له حتى في قرارات الحرب والسياسة.

في حكاية من الحكايات الشعبية، بيحكوا إن واحد من الوزراء اللي كانوا عايزين يوقعوا بين "بيبرس" و"عائشة"، راح ل"بيبرس" وحاول يوقع بينه وبينها، وقال له إنها بتخطط لحاجة ضده. "بيبرس" كان معروف إنه لما يسمع كلمة عن خيانة ممكن يغضب على طول، لكن في المرة دي، بسبب حبه ليها ورفض عقله تصديق مؤامرتها، قرر يتأكد بنفسه من صحة الكلام. ساعتها اكتشف إن الوزير ده هو اللي بيحاول يعمل مؤامرة، وعرف إن "عائشة" بريئة. بعد الموقف ده، احترام بيبرس ل"عائشة" زاد جدا، وبقى يسمع كلامها أكتر، لحد ما الناس سموها "أم الملوك" كنوع من التقدير لحكمتها.

الحكاية التانية عنها بتقول، إنها كانت فارسة مسلمة اتشهرت بشجاعتها وفدائيتها وجهادها ضد الصليبيين في طرابلس بفخر واعتزاز. ولما شافها السلطان "الظاهر بيبرس" وعرفها، نشأت بينهم علاقة طيبة، والموضوع ده دايق وأشعل غيرة أخوها "المقدم حسن"، فحاول يقتل "الظاهر بيبرس" كذا مرة، لكنه فشل. وبعد حوارات كتيرة تخدم الخط الدرامي للقصة وخيال السهرانين، أخيرا تزوج السلطان "الظاهر بيبرس" منها. العامة عظموا من "عائشة البشناتية" لدرجة أن أهل طرابلس بلدها الأصلية أعتبروها ولية من أولياء الله الصالحين وبنيين لها مقام وجامع.

بس إن جيتوا للحق مفيش دخان من غير نار وأدام فيه قصص كتيرة كده عليها، فده يأكد أنها كانت فعلا ست قوية وذكية وكان ليها تأثير في حياة واحد من أعظم السلاطين.

سابع حكاية خيالية: "موت بيبرس الغامض". آخر حكاية بتحكي عن موته. الناس كتير اتكلمت عن موت بيبرس بإنه مات مسموم. في بعض الروايات الشعبية، اتقال إنه كان في حد غدار من اللي حواليه ـ قالوا قلاوون ـ حاول يسممه عشان يتخلص منه. الحكاية بتقول إنه حس بالسم في أكلته ومرض، ومات بعدها بفترة قصيرة. ولحد النهارده، ما فيش دليل قاطع عن اللي قتله، وده خلا وفاته جزء من غموض قصصه، وزود من الأسطورة الشعبية اللي اتخلقت حواليه. لكن موته أحنا قلنا قبل كده، أقرب حكاية منطقية فيه أنه مات نتيجة وصفة طبية خاطئة، خطأ طبي يعني، وده شئ بيحصل في كل العصور.

من كل القصص دي، نقدر نقول أن الناس فضلوا يشوفوا "بيبرس" كرمز للشجاعة والعدل والدهاء. وبرغم إن كل الحكايات دي خيال شعبي، لكن بتبين قد إيه الناس كانت معجبة بيه وبتحترمه وبتحبه، وإنه ماكانش مجرد حاكم عادي في نظرهم، لكن بطل شعبي قدر يعيش في خيال الأجيال لحد النهارده. رحم الله البطل المغوار السلطان "الظاهر ركن الدين بيبرس البندقداري" وغفر له، وأتمنى من الله أني أكون قدرت أنصفه في السلسلة دي، وأوضح ليكم حقيقته بعيد عن المسلسلات اللي دمرت صورته في أذهان الناس. 

( تمت بحمد الله )

مروة طلعت

7/11/2024

الجزء الاول 

https://www.facebook.com/share/p/dHKjqH82wXYD8m56/?mibextid=oFDknk

الجزء الثاني 

https://www.facebook.com/share/p/TcGE4e5npC63CfwS/?mibextid=oFDknk

الجزء الثالث

https://www.facebook.com/share/p/3CWpLYExqUEheRfM/?mibextid=oFDknk

الجزء الرابع

https://www.facebook.com/share/p/LQpTcWvusxvUi8bE/?mibextid=oFDknk

الجزء الخامس

https://www.facebook.com/share/p/gyhwmTQVhHJVLZuS/?mibextid=oFDknk

الجزء السادس

https://www.facebook.com/share/p/4Z49Uto1wiWAQiSv/?mibextid=oFDknk

الجزء السابع

https://www.facebook.com/share/p/Yx4vD6KK4PKPKbPd/?mibextid=oFDknk

الجزء الثامن

https://www.facebook.com/share/p/ZCwCKUew3ysnQyT2/?mibextid=oFDknk

الجزء التاسع

https://www.facebook.com/share/p/guCAqC8dUmzW9E9h/?mibextid=oFDknk

الجزء العاشر

https://www.facebook.com/share/p/8kRo4aJVYmADB68K/?mibextid=oFDknk

الجزء الحادى عشر

https://www.facebook.com/share/p/46VfUKJyLsr4e8zK/?mibextid=oFDknk

الجزء الثانى عشر

https://www.facebook.com/share/p/2xEdCeUKXKVoCobu/?mibextid=oFDknk

الجزء الثالث عشر

https://www.facebook.com/share/p/cQe3udaX474RNsDz/

الجزء الرابع عشر

https://www.facebook.com/share/p/iRV6U6Q3NzrqLqyi/

الجزء الخامس عشر

https://www.facebook.com/share/p/BC757btSNUH6uLZU/

الجزء السادس عشر

https://www.facebook.com/share/p/DPovuQ8iNUw1wwTY/

الجزء السابع عشر

https://www.facebook.com/share/p/aUyQZGA3Np3Jr7mu/

الجزء الثامن عشر

https://www.facebook.com/share/p/7xjxyj7ntK6wutCW/

الجزء التاسع عشر

https://www.facebook.com/share/p/bDhd6HZdsMp5qLkb/

الجزء العشرين

https://www.facebook.com/share/p/adpd1s38r4vmsYhh/

الجزء الواحد والعشرين 

https://www.facebook.com/share/p/PG1WgEpwue2yu93s/

الجزء الثاني والعشرين

https://www.facebook.com/share/p/mgnfBALrYQiWkdMA/

الجزء الثالث والعشرين

https://www.facebook.com/share/p/15FVfHKsJW/

الجزء الرابع والعشرين

https://www.facebook.com/share/p/149ngTfh95/

الجزء الخامس والعشرين

https://www.facebook.com/share/p/15VERyVAmE/

الجزء السادس والعشرين

https://www.facebook.com/share/p/1ANMmnmXHD/

الجزء السابع والعشرين 

https://www.facebook.com/share/p/1McoaCkVHW/

الجزء الثامن والعشرين 

https://www.facebook.com/share/p/17rLR1U5Kb/

الجزء التاسع والعشرين 

https://www.facebook.com/share/p/15KJWoH5XK/

#عايمة_في_بحر_الكتب

#الحكاواتية

#بتاعة_حواديت_تاريخ

المصادر:

النجوم الزاهرة في ملوك مصر والقاهرة ج3،4 - ابن تغري بردي.

السلوك لمعرفة دول الملوك ج1 - المقريزى.

تاريخ الخلفاء - الامام السيوطى.

سير أعلام النبلاء الطبقة 34 - الامام الذهبي.

المواعظ والاعتبار في ذكر الخطط والآثار ج2 - المقريزي.

دولة الظاهر بيبرس في مصر - د/ محمد جمال الدين سرور.

دولة المماليك في مصر - سير وليم موير - ترجمة سليم حسن.

عصر سلاطين المماليك - أ.د/ عطية القوصي.

الظاهر بيبرس مؤسس دولة سلاطين المماليك بمصر - أ.د/ محمد مؤنس عوض.

النهج السديد في تاريخ المماليك - علي بن عبد الله بن أيوب النويري.

صبح الأعشى ج3 ـ أبو العباس القلقشندي.