خماراوية
زمان قالوا يخلق من ضهر العالم فاسد، وكمان يخلق من ضهر العاقل فاجر. لو جينا نشوف صحة المقولة دي في التاريخ مش هنلاقي انسب من "خماروية بن أحمد بن طولون".
مصر ياما مر عليها حكام وأمراء وملوك ودول أشكال وألوان. بعد الفتح الاسلامي فضلت مصر تحت حكم الخلافة الاسلامية من الخفاء الراشدين ثم الخلافة الأموية ثم الخلافة العباسية. لما ضعفت الخلافة العباسية سمح ضعفها ده للولاه بالاستفراد بحكم الولايات. يعني يستقلوا بحكم الولاية لكن الاسم تحت رعاية الخلافة العباسية.
وكان أول استقلال لمصر علي يد "أحمد بن طولون" اللي اخد حكم مصر وأسس الدولة الطولونية. وأنشأ عاصمة جديدة وهي القطائع. وسك عملة جديده خاصة بيه مختلفة عن عملة الدولة العباسية. وبني أثر ضخم وعظيم وهو جامع أحمد بن طولون. وكان "أحمد بن طولون" حاكم قوي مهاب الركن، قال عنه "ابن الأثير": «وكان عاقلاً حازمًا، كثير المعروف والصدقة، متدينًا، يحب العلماء وأهل الدين، وعمل كثيرًا من أعمال البر ومصالح المسلمين. وقال عنه "شمس الدين الذهبي": «كان بطلًا شجاعًا، مقدامًا مهيبًا، سائسًا، جوادًا، ممدحًا، من دهاة الملوك.».
يشاء السميع العليم ان الراجل ده اللي قلبه ميت وكسر كل التابوهات٬ واول من يستفرد بحكم ولاية عظيمة زي مصر وكمان يمد جناحاته وسطوته علي الشام٬ انه يخلف شخص زي "خمارويه" ويستلم من بعده الحكم.
- ليه بس ماله "خمارويه"....
- مش هقولك هخليك تشوف وتسمع بنفسك تعالي معايا.
القطائع سنة ۲٧۹ هجريا. "أحمد بن طولون" كان سايب بلد قوية أقتصاديا وأجتماعيا وعسكريا، بذكاؤه وقوته وبلوماسيته سد البحر بأيديه حرفيا، يعني مصر راحت لخليفته "خماراوية" بيضة مقشرة ومالوضع فيها مستقر، مفيش حتي أعداء متربصين. يعني نقدر نقول أن "خماراويه" كان حاكم محظوظ، حكم في عصر رخاء بلاد مستقرة، وده خلاه متفرغ تماما لحياة العز والبغددة.
تعالي نتمشي كده شويه، شايف جامع الرفاعي والسلطان حسن اللي في ميدان القلعة، عاوزك تشيلهم بخيالك وتحط مكانهم قصر "خماراويه"، أيوه قصره كان هنا بالظبط، وشيل كمان القلعة ماهي ساعتها ماكنتش موجودة. قصر "خماراويه" كان حطانه من الدهب، وعلي الحيطان صور ل"خماراويه" لوحده أو صوره مع جواريه. شايف بقي ميدان القلعة ده كله وخد معاهم منطقة الدرب الاحمر والخليفة وشارع السيوفية واللي حواليه لحد جامع ابن طولون، كل ده كان عبارة عن حدائق بديعة تحس فيها انك في الجنة من جمالها. عاوزة اقولك ان الاشجار دي منقولة مخصوص من بلاد الهند والشام وخراسان ومكة واليمن. وفيه من كل أنواع الفواكه والرياحين وكل انواع الزرع النادر واللي مكنش موجود قبل كده في مصر، وخصص "خماراويه" مهندسين مخصصين لتصميم نظام ري خاص يناسب كل نوع نبات لوحده. تعالي نخش جوا الحديقة كده، هتلاقي ورق الرياحين مقصوصة ومتظبطة كأنها حروف وكلمات، فيها اللي مكونة آيات قرآنية وفيها مكونة أشعار تمجيد ل"خماراويه". وطبعا في جناينية مخصوصة بمقصات مخصوصة من الدهب والفضة مهمتها تقليم أوراق الرياحين دي يوميا. ده غير أنه عمل أول حديقة حيوان في العالم، مليانة غزلان وطواويس وطيور من بلاد كتيرة مختلفة، ده غير الجزء المخصص للحيوانات المفترسة من أسود وفهود ونمور، لدرجة يقال أن "خماراويه" كان ليه أسد مستأنس معاه في كل حتة وأسمه "زريق" عشان عينيه زرقا، بس موضوع "زريق" ده بشك فيه حساه من جو ألف ليلة وليلة أكتر.
تعالي نخش جوا كمان هتلاقي بحيرة عملاقة في منتهي السحر والجمال.ايه مستغرب شكل المية اللي فيها، احب ابهرك واقولك ان دي مش ماية، ده زئبق. ايوه زي ماسمعت كده البحيرة العملاقة دي مليانة بالزئبق الغالي جدا ومليان بالعطور النفيسة، عشان "خمارويه" كان عنده ألم في المفاصل وأرق شديد مكنش بيعرف ينام، فالأطباء نصحوه في الأول بالمساج قبل النوم، لكن "خماراويه" كان عنده وسواس قهري مبيحبش اللمس، فأقترحوا عليه موضوع فراش من جلد أنعم من الحرير علي سطح الزئبق والعطور وريش النعام ينام عليها ومن هدهدة الفراش علي الزئبق يسترخي وينام، ياوعدي.
"خمارويه" زي ما انت شفت من حديقته كده كان سفيه. وبالتالي هنفهم اكتر انه ناحل وبر الناس عشان يعيش هو في عز وجاه وفخفخة زايد عن اي حدود.
تعالي نقرب كده من القصر هنلاقيه فيه مظاهر فرح وعواميد النور بتزغرد. يلا نلف ناحية قسم الحرملك٬ سامع فيه طبل وغنا٬ تعالي قرب أكتر اسمع بيغنوا بيقولوا "ياحنة ياحنة ياحنة ياقطر الندي". عقبال عندك دي حنة "أسماء بنت خمارويه" الشهيرة باسم قطر الندي. اهي الجوازة الحلوة دي مش بس فلست مصر كلها لا دي بيعت المصريين هدومهم.
تعالي اقعد بقي واحكيلك الموضوع. الخليفة العباسي من ساعة ما استقل "أحمد بن طولون" بحكم مصر٬ وهو متغاظ وحاطط في قلبه وساكت لقلة حيلته وعدم مقدرته علي مواجهه ابن طولون. ابن طولون برده مكنش سايبه كان بيراضيه كل سنة بمبلغ معين من خراج أرض مصر٬ وارتضوا علي كده والدنيا ماشية. لما جه "خماراويه" وشد السلخ ع المصريين في الضرايب عشان الفخفخة الكدابة. ولما علا سقف الصرف علي النفيس والغالي٬ راح مقلل خراج الخليفة العباسي "المعتضد بالله" لتلت المبلغ المتفق عليه. طبعا الكلام معجبش الخليفة "المعتضد"٬ وخصوصا ان بصاصيه بلغوه بالعز والسفه والنعيم اللي عايش فيه "خماراويه"، فأكل الحسد قلبه وقرر اعلان الحرب علي "خماراويه".
في الوقت ده كان "أبا عبد الله بن سعد" قائد جيوش "خمارويه" طالب ايد بنته "قطر الندي"، ف "خماراويه" قاله اخرج انت بس حارب جيش "المعتضد بالله" ولما ترجع نبقي نتكلم. فحس"ابن سعد" ان "خماراويه" ملوش غرض في الجوازة. فخرج بفريق من جيشه وبدل ما يحارب "المعتضد" اتحالف معاه ضد "خماراويه". لكن للأسف "المعتضد بالله" محسبهاش صح، لان "خماراويه" كان في موقف قوي، الخير عنده كتير وخزاينه مليانه يقدر يسلح جيشه كما ينبغي علي عكس الخليفة العباسي اللي بقت دولته كسيحة. وكانت النتيجة لما خرج "خماراويه"بنفسه للحرب انهزم "المعتضد بالله". لكن "خماراويه" برده عمل بأصله ورجع "المعتضد بالله" لبغداد معزز مكرم رغبة منه في التقرب للخليفة وفرض السلام بينهم مع وعد بمضاعفة الخراج السنوي، ومش بس كده ده قاله يشرفني اني اناسبك وتجوز بنتي "قطر الندي" لابنك. فكان حلم "خماراويه" ان يكون له حفيد من الأسرة الطولونية خليفة للمسلمين.
رجع "المعتضد بالله" لبغداد وقلبه مغلول من "خماراويه"، وقعد يفكر في عرضه. لقاها فرصه مناسبة لسحب "خماراويه" لفخ يلف فيه حبل نهايته بايده حوالين رقبته. بعت رده ل"خماراويه" بأنه موافق يخطب "قطر الندي" بس لنفسه مش لابنه، وبعت ل "خماراويه" مهر "قطر الندي" ألف ألف دينار بمعني مليون دينار. طبعا "المعتضد" لعب علي نقطة ضعف "خماراوية" وهي حب المظاهر الكدابة، فلما بنته تتجوز خليفة المسلمين بنفسه أكيد هيطلع كل غالي ونفيس في جهاز بنته للتفاخر والمنظرة. وقد كان...
بدأ "خماراويه" في تجهير العروسة "قطر الندي" بنت ال 14 سنة، واللي كان مشهور عنها بحسنها وجمالها الباهر وزادها العز والفخفخة جمال فوق الجمال. عشان تتجوز خليفة المسلمين "المعتضد بالله" اللي في مقام جدها في بغداد. وجهاز "قطر الندي" مكنش زي اي جهاز، لاكان فيه قبله ولا بعده ولا يخطر علي بال انس ولا جان.
على سبيل المثال، ذكر "ابن تغري بردي" في كتابه "النجوم الزاهرة في ملوك مصر والقاهرة"، بعض من تفاصيل جهاز قطر الندى، فقال: "وكان من جملة جهازها أربع قطع من ذهب عليها قبة من ذهب مُشبّك، في كل عين من التشبيك قرط معلق فيه حبة من جوهر لا يعرف لها قيمة، ومائة هاون من الذهب".
أما "المسعودي" فقد ذكر في كتابه" مروج الذهب"، أنه كان من بين جهاز قطر الندى: "عشرون صينية ذهبية في عشرة منها مشام الصندل زنتها أربعة وثمانون رطلاً، وعشرون صينية من فضة في عشر منها مجامر وزنها نيف وثلاثون رطلاً، ومن الثياب ما ثمنه عشرة آلاف دينار ذهبي".
و"تقي الدين المقريزي" وصف الجهاز بقوله: "جهاز ضاهى به نعم الخلافة، فلم يبق خطيرة ولا طرفة من كل لون وجنس إلا حمله معها..."، وذلك في كتابه الخطط المقريزية، في حين حدد الذهبي القيمة الإجمالية لجهاز قطر الندى، بألفي ألف دينار. يعني 2 مليون دينار.
يكتفي بكده "خماراويه" لا طبعا ده حتي يبقي عيب. أمر ببناء قصور في محطات استراحة الأميرة "قطر الندي" من مصر لبغداد. عشان تستريح فيها من السفر، دي بنت "خماراويه" مش اي كلام. والقصور دي نفسها اللي هتبات فيها ليلة ولا اتنين متجهزة بفرش من الدهب والفضة والحرير.
وفي نفس الوقت أقام الولائم والعزائم في حنة "قطر الندي" لمدة 40 يوم حنة. ووزع العطايا علي الناس ووزع الحنة اللي كفت بنات القطائع كلهم والقري المجاورة وفاضت. والعزف والغناء والاحتفال مبطلش طول ال 40 يوم دول. وطبعا الذكري الفظيعة دي سابتلنا أثر باقي لحد اليوم وهي أغنية "ياحنة ياحنة ياحنة ياقطر الندي". بس الغريب ان الاغنية رتمها حزين، متفهمش بقي الناس كانوا بيغنوها وهم مقهورين علي حالهم وفلسهم، ولا الجواري غنتها حزن علي الطفلة اللي هتترمي في بلاد غريبة في حضن راجل عجوز، كأنها سلعة وقايض بيها أبوها لمصلحته ومجده اللي بيحلم بيه.
وانطلق موكب زفاف الأميرة "قطر الندي" من القطائع بكل جهازها وشوارها من القطائع الي بغداد، وفضل الموكب مسافر لمدة سنتين. ولما وصل أخيرا لبغداد، دخلت العروسة بالليل وسط ألاف الشموع والمشاعل اللي كانت مستنياها. وبرده الخليفة "المعتضد بالله" مأثرش في الاحتفالات اللي فضلت بغداد برده فاكراها لقرون لأنهم ماشفوش ولا اتذكر زيها في تاريخهم.
طبعا بعد ماخلصت الحكاية وراحت العروسة لعريسها. اكتشف "خماراويه" المصيبة اللي حط نفسه فيها، والفخ اللي وقعه فيه "المعتضد بالله". فأشار "الذهبي" إلى تلك المسألة بقوله: "قيل أراد أن يفقره بجهازها". فعلا خزاين مصر فضيت ودخل البلد في مأزق اقتصادي وافلاس رهيب. وكان ده السبب وراء القضاء علي "خماراويه". ففي أثناء مقام خمارويه بدمشق، طالبه قادة جيشه بالنفقة والرواتب والعطايا، وطبعا مكنش في خزاينه اللي يسد الفلوس دي، فاتفق القادة علي قتله، وعشان يطلعوا نفسهم منها أشاعوا أنهم قتلوه بسبب أخلاقي، وهو ممارسته الفاحشة مع أحد الغلمان في قصره. وكانت دي نهاية "خماراويه" اللي ضيع نفسه وضيع البلد بسبب سفهه وحبه للمظاهر والبغددة.
أما بالنسبة ل "قطر الندي" اللي كانت ضحية تانية لأبوها. فعلي عكس احلام "خماراويه" دخلت في صراع الضراير، اللي كانوا غيرانيين منها ومن جهازها والهيلمان اللي دخلت بيه. وهي لسه كتكوت صغير مطلعلوش ريش وسطهم اتاكلت وانزوت واهملت في حجرتها لحد ماماتت من الوحدة والقهر وهي عندها 22 سنة.
من بع "خماراويه" حكم أبناؤه، اللي كانوا أضعف من أبوهم كمان، وبعيدين كل البعد عن قوة وعظمة جدهم "أحمد بن طولون"، فالأمور تحولت من سئ الي أسوأ ومن ضعف لهزال. وكل عز وفخفخة وأبهة وقصور وحدائق "خماراويه" اللي كان فاكر نفسه مخلد فيها، أتدمرت بعد وفاته ب 10 سنين بس علي أيد العباسيين.
مروة طلعت
10/7/2024
#عايمة_في_بحر_الكتب
#الحكاواتية
#بتاعة_حواديت_تاريخ
المصادر:-
النجوم الزاهرة في ملوك مصر والقاهرة - ابن تغري بردي.
سير أعلام النبلاء الطبقة 15 و 16 - الإمام الذهبي.
الكامل في التاريخ ج7 - ابن الأثير.
مروج الدهب ومعادن الجوهر - المسعودي.
وفيات الأعيان وأنباء أبناء الزمان - ابن خلكان.
تعليقات
إرسال تعليق