الحاكم بأمر الله وقبر الرسول

تفتكر مين اللي ممكن يفكر يخرج أو يسرق جسد رسولنا الكريم صلي الله عليه وسلم من قبره. حاجة برا العقل صح، لكنها منطقية تحصل علي ايد أعداء الإسلام والحاقدين عليه. وعشان كده حصلت علي مدار تاريخنا الإسلامي 4 محاولات لنبش قبر الرسول صلى الله عليه وسلم، وكلها كانت محاولات فاشلة. اتكلمنا قبل كده عن أشهر محاولة وهي المحاولة التالتة اللي كانت علي ايد الصليبيين في أيام الملك العادل "نور الدين محمود بن عماد الدين زنكي" هتلاقي لينك الحكاية أخر المقال👇. طيب وباقي التلات محاولات؟. المحاولة الرابعة كانت علي ايد الروم وبرده فشلت، سواء الصليبيين أو الروم طبيعي تيجي منهم، محاولات منطقية نابعة من غيرة وحقد ورغبة في التدنيس لقهر المسلمين كلهم. أما المحاولة الأولي والتانية بقي فكانت علي ايد الدولة العبيدية الفاطمية، فكرة مجنونة متجيش الا من دماغ زي دماغ "الحاكم بأمر الله الفاطمي".

"المنصور بن العزيز بالله نزار بن المعز لدين الله معد بن المنصور إسماعيل بن القائم بأمر الله محمد بن عبيد الله المهدي"، ولقبه "الحاكم بأمر الله". الحاكم الفاطمي السادس، وأغرب حاكم مر علي مصر. قال فيه "الإمام الذهبي" في كتابه سير أعلام النبلاء: ( كان شيطانا مريدا جبارا عنيدا ، كثير التلون ، سفاكا للدماء ، خبيث النِّحلة ، عظيم المكر ، له شأن عجيب ، ونبأ غريب ، كان فرعون زمانه ، أمر بسب الصحابة رضي الله عنهم ، وبكتابة ذلك على أبواب المساجد والشوارع ). "الحاكم بأمر الله" عاوزله سلسلة لوحده بصراحة من كتر العجايب اللي كانت في زمانه، وأوردت في كتابي "حدوتة مصرية" جزء من عجايبه في قصته مع "غبن" وحكايته مع وزيره "برجوان".

في يوم من الأيام، قعد "الحاكم بأمر الله" في مجلس حواليه بعض الزنادقة _ زي ماوصفهم المؤرخ "السمهودي" _ وقال له فكرة أنه يخصص مكان في القاهرة ينقل فيه جسد الرسول صلى الله عليه وسلم من المسجد النبوي بالمدينة، وبكده الناس هتشد رحالها للقاهرة بدل المدينة، وتصبح القاهرة عاصمة روحية ودينية مهمة ويرتفع شأن الفاطميين العبيديين ويعملوا علي الخلافة العباسية أكتر وعلي السنة عموما.  

الفكرة عجبت "الحاكم بأمر الله" جدا، وبدأ بتنفيذها بأنه شيّد بين الفسطاط والقاهرة 3 مشاهد ينقل فيها رُفات الرسول صلى الله عليه وسلم، ورُفات أبي بكر الصديق، وعمر بن الخطاب رضي الله عنهما. وده غريب لأن العبيديين والشيعة من أشد الناس كره ل "أبي بكر الصديق وعمر بن الخطاب" فلو ده صحيح وكانت النية أنهم يتنقلوا معاه أكيد كانت هتبقي مشاهدهم للرجم مثلا، فالحمد لله أنها كانت محاولة فاشلة.

في الوقت ده كانت الخلافة العباسية السنية في أشد حالات ضعفها، وكان ده وقت سيطرة الشيعة علي العالم الإسلامي زي ما المؤرخين واصفين. بمعني أن الدولة الفاطمية كانت واخدة بلاد شمال افريقيا كلها ومسيطرة علي اجزاء من الشام وعلي أرض الحجاز كمان مكة والمدينة. فبعت "الحاكم بأمر الله" رسالة لأمير مكة "أبي الفتوح الحسن بن جعفر الحسني" يأمره بتنفيذ مخططه وهو نبش قبر الرسول صلى الله عليه وسلم وسرقة جثمانه الشريف. 

الحقيقة أن "أبو الفتوح" كان مرعوب من المحاولة دي، لكن في نفس الوقت ميقدرش يخالف أوامر خليفته الفاطمي، وكمان ده مش أي خليفة، ده "الحاكم بأمر الله" حاجة كده زي "كيم جونغ" بتاع كوريا الشمالية دلوقتي.

دخل "أبو الفتوح" المدينة، وراح علي المسجد النبوي وقعد في وسط جنوده وجماعة من أهل المدينة، وحضر معهم قارئ أسمه " الزلباني " ، فقرأ في المجلس: (وَإِنْ نَكَثُوا أَيْمَانَهُمْ مِنْ بَعْدِ عَهْدِهِمْ وَطَعَنُوا فِي دِينِكُمْ فَقَاتِلُوا أَئِمَّةَ الْكُفْرِ إِنَّهُمْ لَا أَيْمَانَ لَهُمْ لَعَلَّهُمْ يَنتَهُونَ * أَلَا تُقَاتِلُونَ قَوْمًا نَكَثُوا أَيْمَانَهُمْ وَهَمُّوا بِإِخْرَاجِ الرَّسُولِ وَهُمْ بَدَءُوكُمْ أَوَّلَ مَرَّةٍ أَتَخْشَوْنَهُمْ فَاللَّهُ أَحَقُّ أَنْ تَخْشَوْهُ إِنْ كُنتُمْ مُؤْمِنِينَ) التوبة/12، 13. وبعدها أعلن "أبو الفتوح" عن نيته، ونية "الحاكم بأمر الله". الناس سمعوا كده قاموا وهاجموا وكانوا عاوزين يقتلوا "ألو الفتوح" لولا جنوده حمته. قالهم "أبو الفتوح": (  الله أحق أن يخشى ، والله لو كان علي من الحاكم فوات الروح ما تعرضت للموضع ). وبعدها حاله ضيق في صدره ونفسه من شدة الموقف، وخرج من المسجد.

الناس مقدرتش تعمل حاجة عشان المدينة كانت تحت سيطرة الفاطميين وسيطرة جيش "الحاكم بأمر الله" فكانوا مغلوبين علي أمرهم، لكن "الحاكم" نسي الحي الذي لا يموت. اول ما خلص نهار نفس اليوم، أرسل الله ريح كادت الأرض تتزلزل من قوتها ، حتى الجمال والخيول بسروجها من شدة الريح بقوا يتدحرجوا زي الكور في الأرض ،ومات فيها ناس كتيرة وحيوانات وماشية، كان غضب الله حقيقي علي الأرض، ودفاعه العظيم عن جسد حبيبه. فرح "أبو الفتوح" جدا من اللي حصل، كانت نجدة من ربنا كمان ليه من غضب "الحاكم بأمر الله". وكتب رسالة وبعتله قاله فيها اللي حصل وخوفه من عاقبة الأمور.

الموضوع بقي يخلص علي كده؟ أبدا. وعلي رأي "سعد زغلول" لما قال مفيش فايدة، كرر "الحاكم بأمر الله" محاولته للمرة التانية، بس المرة دي معملهاش ع المكشوف، قالك يمكن دعوة حد من الصالحين هي السبب ولا حاجة. فبعت في السر رجلين للمدينة، اشتروا بيت ملاصق للمسجد النبوي ولحجرة دفن جسد رسول الله صلى الله عليه وسلم. وبدأوا يحفروا في الليل، لكن جارهم خد باله من الانوار في الليل وصوت الحفر، فخرج في الشارع يصرخ: ( إن نبيكم ينبش ). أهل المدينة كلهم صحيوا علي صريخه وطلعوا هجموا علي البيت، ونزلوا في الرجلين ضرب لحد ما ماتوا في أيديهم.

بعدها بطل "الحاكم بأمر الله" محاولاته البشعة الفاشلة، والله تعالى حافظ علي جسد نبيه صلى الله عليه وسلم من أن تصل إليه أيدي أعدائه بسوء.

مروة طلعت

6 /5 / 2024

محاولة نبش قبر الرسول صلي الله عليه وسلم في عهد الملك العادل "نور الدين محمود"

https://www.facebook.com/share/p/Phc4

WDLbkWwPc2sX/?mibextid=oFDknk

#عايمة_في_بحر_الكتب

#الحكاواتية

#بتاعة_حواديت_تاريخ

#الحاكم_بأمر_الله

#قبر_رسول_الله

المصادر:

وفاء الوفا ج2 - السمهودي.

سير أعلام النبلاء ج17 الطبقة 22 - الإمام الذهبي.

جغرافية مصر من كتاب الممالك والمسالك - أبو عبيد البكري.

اتحاف الورى بأخبار أم القرى - ابن فهد المكي.

الدرر الفرائد المنظمة - الجزيري.