الفاطميين 3
(4) درسنا في التاريخ أن الدولة العباسية كانت متقسمة زمنيا لنصين، النص الاول فيها كانت دولة قوية وليها تأثير حتي أن عصر "هارون الرشيد" 1 مُحرَّم 149 هجري ـ - 30 جمادى الأولى 193 هـجري، و"المأمون" 15 ربيع الأوَّل 170هـجري - 18 رجب 218 هـجري، أتسمي بالعصر الذهبي للتاريخ الاسلامي كله، النص التاني ده كان عصر الضعف وبقت بالتدريج لدولة بركة كدة زي الراجل البركة اللي لا بيهش ولا بينش مجرد أسم منور الصحبة الحلوة.
في النص الاول لفترة حكم الخلافة العباسية، حصل فيها فظائع بسبب رغبتهم في تثبيت أركان حكمهم، والقضاء علي كل الأعداء أو اللي فيه منهم تهديد علي شرعية حكمهم. ومن ضمن الفظائع والجرائم دي القضاء علي نسل سيدنا "علي بن أبي طالب"، أو المواليين لهم. وكانت النتيجة هروب الناجيين من المذابح دي لأقاصي البلاد في الجنوب والغرب.
مرت السنين وبعد ما كانت أي خلافة بتعتز بأصلها العربي الهاشمي، وبترفض أي جنس تاني ياخد أي منصب أداري، لدرجة وصفهم بالعصبية والعنصرية تجاة باقي الأجناس، أتغير الحال وكانت البداية عند "هارون الرشيد" اللي أدي الفرصة البسيطة للفرس والبرامكة في الدخول للمناصب الادارية، لكنه كان خليفة قوي وعينه في وسط راسه. الفكرة أنها كانت نقطة بداية لما بعده في ضعف الدولة العباسية. مرت الأيام والسنين الكتيرة وأتزايد وجود العناصر غير العربية في الحكم من الترك والفرس، وواحدة واحدة بقت أصلا العنصر العربي شبه غير موجود غير في الخليفة وأسرته اللي أتحول لأيه، أيوه برافو عليك لراجل بركة.
والتدخلات دي مكنتش مجرد تدخلات للتحكم في السلطة وبس لا، ده كان وراها حقد وغل ورغبة في الانتقام من الجنس العربي اللي كان بيعاملهم بطريقة دونية وتكبر، واللي عاشوا سنين بيتعاملوا علي أنهم أقليات مهمشة علي الرغم من أنهم مسلمين زيهم. ومن هنا حصل التهلهل والتفسخ في الخلافة، وكل مجموعة شافت في نفسها القوة تقدر تاخد ممجموعة بلاد وتستقل بيها والاسم أنهم تابعين للخلافة العباسية. يعني هتلاقي السلاجقة في ايران والطولونية في مصر وبعدها الاخشيدية في مصر والشام وهكذا. طيب اذا كان اللي منهم واللي معاهم أستقلوا وعملوا كده، أمال بقي أعداؤهم والمطاردين والفاريين وكل من له تار هيعمل ايه.
في ظل ظروف الهيمنة العباسية الأولي، بدأت الحركة الاسماعيلية علي شكل تنظيم ثوري سري، ومن نص القرن التالت الهجري بدأ دعاة الاسماعيلية النشطين ينتشروا في كل مكان في العالم الاسلامي، وخصوصا أطرافها وده لبعدهم عن قلب دولة الخلافة، ةزي ما هو معروف البعيد عن العين بعيد عن القلب، فالناس اللي في أطراف العالم الاسلامي بيقل الاهتمام بيهم من ناحية التوعية الدينية المستمرة وبيغيب الاهتمام بالتنمية الحضارية، فتلاقي الأطراف غلب علي أهلها الجهل والفقر، وده أستغله داة الاسماعيلية أحسن أستغلال. وعشان كده هتلاقي الاسماعيلية ودعاتها متركزين في إيران وخراسان والمغرب الافريقي واليمن، وعن اليمن طرف العالم الاسلامي من ناحية الجنوب هنلاقي "أبو العلاء المعري" وصفها وقال: (معدنا للمتكسبين بالتدين والمحتالين علي الحق بالتزين). وقال "القاضي النعمان" في رسالة أفتتاح الدعوة عن اليمن: ( أصل الدعوة وإليها أرسل الداعي ومنها نفذ إلي المغرب وعن صاحب دعوتها أخذ وبآدابها تأدب ).
ومن هنا نفهم أن أرض اليمن هي الأرض الخصبة اللي تطورت فيها الدعوة الاسماعيلية وأتعجنت وأتخبزت علي نار هادية، لحد ما جه الوقت المناسب اللي سمح فيه الوضع المتدني والمهلهل للعباسيين، أن الاسماعيليين ياخدوا فرصتهم بمد حبالهم لبلاد المغرب العربي اللي هي طرف العالم الاسلامي برده بس من ناحية الغرب.
لما أضطهد العباسيين العلويين من أبناء "علي بن أبي طالب" كرم الله وجهه، هرب الناجيين منهم وخصوصا أبناء "الحسن بن علي" رضي الله عنه لأقصي مكان وهي بلاد المغرب الافريقي وقعدوا وأتمركزوا فيها، لكن وجودهم مكنش ثورة علي الخليفة العباسي، كان مجرد هروب وتخفي من الاضطهاد والتصفية، وبكدة كانت أرض المغرب مهيأة لأنتشار المذهب الشيعي الاسماعيلي من قبل دخولهم رسميا ب 135 سنة.
بدأ التسلسل الاسماعيلي علي المغرب علي استحياء كده يتسرسبوا مجموعة صغيرة ورا التانية في سرية وبزحف مش ملحوظ من الخلافة، ناس نفسها كان طويل جدا وعندهم خطة بعيدة المدي وعندهم أستعداد جيل يسلم التاني الحلم والهدف، ومش مهم يتحقق علي حياة عيني ممكن يتحقق علي ايد حفيد حفيدي عادي المهم الفكرة متموتش.
"إبن حوشب" كبير دعاة الاسماعيلية في اليمن، جهز الداعية "الحسين بن أحمد بن محمد بن زكريا" والمعروف ب "أبو عبد الله الشيعي" وطلب منه يتوجه للمغرب. نفذ "أبو عبد الله" الأمر وخرج من اليمن، وفي سكته دخل مكة في وقت الحج، قابل هناك قافلة حجاج من كتامة بالمغرب، وبعد ما خلص موسم الحج، ركب "أبو عبد الله" في قافلة كتامة ورجع معاه علي المغرب.
نجح "أبو عبد الله الشيعي" في نشر الدعوة الاسماعيلية في كتامة بشكل مذهل، كانت دعوته بتصيب الناس زي النار في الهشيم. ومن دلايل نجاحه الكبير في كتامة، أن "المهدي لدين الله" - واحد من اللأئمة الشيعة المستورين - قرر يستقر في كتامة ويلم شمل معظم الاسماعيلية فيها. وبعد رحلة طويلة وأحداث كتيرة حصلت في السكة، دخل "المهدي" كتامة يوم الجمعة 21 ربيع التاني سنة 297 هجري / 15 يناير 910 ميلادي، ووقف "عبد الله الشيعي" يعرف الناس بمولاه وقال: ( هذا مولاي ومولاكم وولي أمركم وإمام دهركم ومهديكم المنتظر الذي كنت أبشر، قد أظهر الله عز وجل أمره كما وعده ). وأخد "المهدي" البيعة من "أبو عبد الله" وكل أهل كتامة، وبعدها كافئ "المهدي" داعيه المخلص المتضرع بأنه قتله هو وأخوه.
تطورت الدعوة وبقت دولة في قلب كتامة، وأتكلل نجاح تنظيم الدعاة اللي أستمر بصبر 150 سنة. وبعد إعلان الخلافة الأموية في الأندلس، أعلن الشيعة الخلافة الفاطمية في أفريقيا سنة 297 هجري/ 910 ميلادي. وبكدة أصبح في العالم الاسلامي في الوقت ده 3 خلافات ماشاء الله، الخلافة العباسية في بغداد والخلافة الأموية في قرطبة والخلافة الفاطمية في المغرب. وعلي الناحية التانية من البحر فيه الدولة البيزنطية في القسطنطينية بتسقف وتشجع اللعبة الحلوة وبتشمر كمها وبتستعد للأنقضاض بعد ما تفسخت الدولة الاسلامية وتعرت بين خلافتين سنية وواحدة شيعة.
(يتبع)
مروة طلعت
20 / 5 / 2024
الجزء الأول
https://www.facebook.com/share/p/QAr1BJLtRE5vf8mq/?mibextid=oFDknk
الجزء التاني
https://www.facebook.com/share/p/JpWNfU6iD2RWv5j4/?mibextid=oFDknk
الجزء التالت
https://www.facebook.com/share/p/RE3dqs6dXnpbyhPQ/?mibextid=oFDknk
#عايمة_في_بحر_الكتب
#الحكاواتية
#بتاعة_حواديت_تاريخ
#الفاطميين
المصادر:
اتعاظ الحنفا بأخبار الأئمة الخلفا ج1 - المقريزي.
الكامل ج 8 - ابن الأثير.
سير أعلام النبلاء الطبقة العشرون - الذهبي.
النجوم الزاهرة في ملوك مصر والقاهرة ج4 - ابن تغري بردي.
الدولة الفاطمية في مصر تفسير جديد - د/ أيمن فؤاد سيد.
تعليقات
إرسال تعليق