توفيق باشا اندراوس

الأقصر .. الاربعاء 27 اغسطس سنة 2021

تحركت الجرافات والحماية المدنية ومجلس الحي ناحية قصر "توفيق باشا اندراوس" علي كورنيش الأقصر واللي قصاد معبد الأقصر بالظبط، وسط تجمهر وغضب من الأهالي اللي أتسببوا في تأخير قرار الهدم لمدة أربع ايام، حاولوا فيها الأهالي منع إزالة القصر الأثري العريق بكل قوة، لكن مفيش فايدة. وقصاد عيون الأهالي الغضبانة ضربت الجرافات أياديها في حيطان القصر اللي شال دليل تاريخ بلد لمدة 125 سنة.

_ لا حول ولا قوة إلا بالله، عليه العوض ومنه العوض.

_ أنتوا ليه يا بابا زعلانين علي القصر ده اوي كده، عشان شكله حلو يعني.

_ لا يا بني مش عشان كده وبس، القصر ده تاريخ كبير، قيمة أثرية ومعمارية وفنية متتعوضش.

_ طب ليه بيهدوه.

_ عشان احنا في زمن فضة المعداوي، عشوائية وعدم تقدير ولا تمييز. الراجل صاحب القصر ده يا بني ليه فضل كبير علينا، وكان بطل وقف في وش الباطل من غير خوف.

_ ازاي يا بابا احكيلي...

الأقصر سنة 1879م، واقف "ليسي باشا أندراوس" أكبر تجار الصعيد، علي كورنيش الأقصر بعد ما نزح من بلده قوص في قنا، علي الأقصر وأختار يستقر فيها بعائلته وتجارته. وأختار كمان موقع متميز ملاصق لمعبد الأقصر قصاد النيل عشان يبني فيه قصره الجديد. 

بعد ما خلص بناء القصر اللي كان تحفة فنية علي أحدث طراز معماري. جاب الباشا أولاده "توفيق وياسا" اللي أتولدوا في قنا، عشان يعيشوا في قصرهم الجديد في الأقصر. دخل "توفيق وياسا" مدرستهم الابتدائية في الأقصر، ولما جه أوان دخولهم التوجيهية _ الثانوية _ سافر الأخين علي القاهرة، ودخلوا مدرسة التوفيقية الثانوية بشبرا واتخرجوا منها. كم أنتي عظيمة يا شبرا ❤️❤️

خلص "توفيق" دراسته الثانوية، وبما أنه سليل باشوات وأكابر التجار، الأطيان والفلوس عندهم يمين وشمال، كان من الطبيعي يسافر يكمل تعليمه بره، خصوصا في الوقت ده كانت الأمور دي متيسرة، حتي لعامة الشعب عن طريق بعثات وزارة المعارف. "توفيق" سافر أنجلترا وأخد شهادته من جامعة أكسفورد، ومن بعدها أتعين قنصل لمصر في أوروبا. رجع "توفيق" لقي البلد سياسيا علي آتون مشتعل، والناس نازلة تلم من بعضها توقيعات لترشيح الزعيم "سعد باشا زغلول" لتمثيل الشعب المصري في مؤتمر الصلح في باريس ليعرض عليه قضية استقلال مصر.

"توفيق باشا أندراوس" كان حسه الوطني عالي، ومحب لبلده جدا، عشان كده راح ل "سعد باشا زغلول" وطلب منه ينضم للوفديين ويكون في خدمتهم لمصلحة مصر في أي وقت. وأتنفي "سعد باشا زغلول"، وقام الشعب بثورة 1919م اللي بتطالب برجوعه. ساعتها عرف "توفيق باشا" أن أم المصريين "صفية هانم زغلول" بتعاني من فراغ خزينة الوفد، ومش معاها فلوس تمول بيها الحركات الوطنية. علي الفور باع "توفيق باشا أندراوس" 700 فدان من أطيانه وبعت فلوسهم تحت تصرف "صفية هانم".

_ ده راجل وطني جدا.

_ في الوقت ده كان الوطن عند الشرفاء المخلصين أغلي من أي شئ، معدن المصري الأصيل بيبان في وقت الشدة. بس مش هو ده السبب في حب أهل الأقصر ل "توفيق باشا".

سنة 1921م، بعد رجوع "سعد باشا زغلول" والوفد بتاعه من المنفي، فكر "سعد باشا زغلول" أنه يعمل جولة في الصعيد ومعاه قيادات حزب الوفد بغرض كسب تأييد أهل الصعيد ليه في مشواره الثوري. وفعلا قام "سعد باشا" برحلته علي مركب نيلية. لكن مدير الأمن العام "بدر الدين بك" بعت إشارات مستعجلة لكل مراكز الأمن في كل محافظات الصعيد، برفض مركب الوفد أو نزول اللي فيها في أي محافظة يوصلولها. وفعلا فشل "سعد باشا زغلول" أنه ينزل في المنيا أسيوط أو سوهاج، وفضلت مركبه ماشية من غير مرسي. لحد ما وصلت مركب الوفد للأقصر، وهنا طلع "توفيق باشا أندراوس" وتحدي التعليمات وقال : "احنا حنرجع سعد بالقوة، وانا عندي رجالتي"، وخلا المركب ترسي قصاد قصره اللي علي النيل، وعشان مفيش حد يقرب من قصره من الأمن، أمر خدمه يرفعوا أعلام إيطاليا وبلجيكا وفرنسا اللي هو كان قنصل فيهم علي سطح القصر، كحماية أجنبية ليه فمحدش يقدر يتكلم معاه. 

وأتجمهر أهالي الأقصر كلهم في مظاهرة حب عظيمه ل "سعد باشا زغلول" حوالين قصر "توفيق باشا أندراوس"، قام الخدم بمد سلم خشبى كبير من السفينة إلى القصر، وأول ما نزل "سعد باشا زغلول" الناس بقت تهلل وتصقف وتهتف وتقول "يحيا سعد.. يحيا سعد". لكن الناس فوجأت ب "سعد باشا زغلول" بيرد عليهم ويهتف "يحيا توفيق أندراوس.. يحيا توفيق أندراوس".

لما القصر الملكي شاف أن "توفيق باشا أندراوس" حليف قوي ل "سعد باشا زغلول" وحزب الوفد، اللي كان "الملك فؤاد" من أشد أعداؤه. راح "أحمد حسنين باشا" ل "توفيق باشا" عشان يعرض عليه رغبة الملك أنه يبقي قنصل في لندن بشرط يسيبه من حزب الوفد خالص، لكن "توفيق باشا" رفض نهائي. ومن هنا بقي أسم "توفيق باشا أندراوس" يتردد ما بين الأهالي بكل أجلال وتقدير، وسموه سبع الصعيد. 

أنت عارف ايه اللي حصل بعد كده لحزب الوفد، "سعد باشا زغلول" دخل لحزبه الانتخابات علي مقاعد البرلمان، وأختار لكل دائرة واحد من أبرز رجال الوفد، وطبعا في دائرة الأقصر ملقاش أنسب من "توفيق باشا أندراوس" يرشحه في انتخابات البرلمان. وفعلا أعضاء حزب الوفد فازوا بأكتساح ضد رغبة الإنجليز والملك، ورغم كل الأساليب الملتوية والغير شريفة اللي اتعملت في الانتخابات، وده لأنه حزب الشعب، وأصوات الشعب كله وراهم. "توفيق باشا أندراوس" فاز ودخل البرلمان، مش بس مرة ولا اتنين ده طول عمره، كان نائب في مجلس النواب عن دائرته في الأقصر. 

أحنا نعرف أن فيه للأسف نواب، بمجرد ما يدخلوا المجلس بينسوا الوعود والأماني، والناس مبتشوفهمش تاني الا في انتخابات الدورة التانية، حتي في ساعات كتير الناس مبتبقاش عارفة إسم النائب ايه أصلا. لكن "توفيق باشا أندراوس" مكنش كده، كان وسط الناس، وقبل ما الناس تطلب كان هو بينفذ ويسعي لحياتهم الكريمة. 

يعني مثلا هنلاقيه سعي بكل جهده أنه يدخل المياة النقية والنور إلى الأقصر، وده حصل قبل حتي ما تدخل محافظة الجيزة. ورفض ووقف بكل عزم وشدة قصاد قرار نقل مقابر المسلمين من مكانها للجبل، وده عشان يحترم عوايد أهل البلد في نقل موتاهم عل أكتافهم وميثقلش عليهم. وقدم مساعدات لبعض الجمعيات زي الهلال الاحمر، وحسن الوحدات الصحية وملجأ الايتام، وعمل وقف بعشرة فدادين لخدمة المدرسة الصناعية، وبني مدرسة الأقباط، وبني مسجد المقشقش ومسجد المدامود. 

أتجوز "توفيق باشا أندراوس" من السيدة "زاهية حبيب" بنت "حبيب باشا شنودة" عمدة أسيوط، وأنجب منها "جميل وجميلة وصوفي ولودي”.

وزي ما كل شئ له بداية له نهاية، مات "توفيق باشا اندراوس" سنة 1935م، وصادف يوم وفاته اجتماع عيد الفطر المبارك وعيد الميلاد المجيد فى يوم واحد، فتحولت الأعياد على أهالي الاقصر كلها لحزن شديد، وخرجت أهالب الأقصر وقوص وارمنت فى وداعه الحزين، وشهدت جنازته العديد من الشخصيات منهم "مكرم عبيد باشا" سكرتير الوفد و"توفيق دوس" وزير المواصلات ونقيب الأشراف "محمد ابو الحجاج الحجاجى" والعلم الجليل "الحسين الحجاجى".

بعد ثورة 1952، هاجر شقيق "توفيق باشا" وأسرته من مصر. وفضل بنات "توفيق باشا" قاعدين في قصرهم، بعد موت شقيقهم "جميل"، وبعد رفضهم للزواج نهائي. وفي عهد الرئيس "جمال عبد الناصر" أزال كل بيوت الأقصر القديمة اللي كانت محاولة القصر، لكنه أحتفظ بالقصر نفسه لقيمته التاريخية والمعمارية. لكن بعد كده واجهت بنات "توفيق باشا أندراوس" قرارات إزالة متتالية للقصر، بحجج مختلفة مرة توسعة لطريق المعبد ومرة القصر آيل للسقوط ومرة فيه معبد روماني تحت القصر، لكن كل مرة البنات كانت بتقف في وش أي حد يقرب من قصرهم ودافعوا عنه بكل قوة. وفي سنة 2011 بتموت أختهم الكبيرة "جميلة" وتفضل "صوفي ولودي" عايشين لوحدهم في القصر، منعزلين عن كل العالم. 

يوم ٧ يناير  سنة 2013، بيتصل دكتور "عماد قديس" بمحامي أسرة أندراوس "عريان عزيز"، بيبلغه أنه بقاله يومين بيتصل بالأختين أندراوس لمدة يومين وراحلهم يخبط عليهم ويرن الجرس محدش فتح. المحامي قلق وأتصل بالشرطة، اللي جهزت قوة بأمر نيابة أقتحمت القصر، عشان يفاجئوا كلهم بجريمة بشعة، يلاقوا فيها الأختين اللي جاوزوا ال 80 من العمر، واقعين في الأرض ومقتولين بآلة حادة، وبعد البحث أكتشفوا أن مفيش حاجة مسروقة من القصر المليان بالتحف والأنتيكات الباهظة أو من مجوهراتهم، يعني دافع القتل مكنش للسرقة. ورغم مرور 10 سنين علي الحادث البشع ده، لحد الآن محدش عرف القاتل أو الدافع من القتل. مات أبناء "توفيق باشا أندراوس" سايبين قصر مليان بالأنتيكات اتحطت في متحف الأقصر، وأراضي وعقارات قدرت بمليار جنية.

ومن بعدهم القصر بيتهد والحكاية بتخلص، والناس بتحزن والجيل اللي بعده بينسي.

مروة طلعت

30 / 8 / 2023

الحكاية دي نتيجة مجهود بحثي وذهني أقدمها للقراء بكل حب مجانا، فمتبخلش عليا بلايك وكومنت عشان الفيس يزود الريتش والحكاية توصل لغيرك ويبقي تقدير منك لمجهودي وطبعا لو الشير كمان يبقي ده تقدير كبير ❤️

#عايمة_في_بحر_الكتب

#الحكاواتية

#بتاعة_حواديت_تاريخ

المصادر:-

البشاير والأقباط متحدون 28/04/2010 - نصر القوصى

124 عامًا من الجدل..هدم قصر أندراوس التاريخي يثير ضجة في مصر _ cnn بالعربيه 25 أغسطس 2021.

قصر توفيق باشا أندراوس.. شاهد على حكايات وأيام مجيدة من عمر الحركة الوطنية _ الأهرام 8 يناير 2013.

بالصور.... مقتل بنات توفيق بك أندراوس باشا _ دنيا الوطن 8 يناير 2013

بدء إزالة قصر توفيق أندراوس التاريخي في مدينة الأقصر (صور) _ المصري اليوم 23 أغسطس 2021