السلطانة شجر الدر 4
بعدما تخلصت المماليك البحرية من الملك المظفر"توران شاه بن الصالح نجم الدين أيوب"، بسبب تصرفاته الطايشة ونكرانه لجميلهم وجميل زوجة أبوه "شجر الدر"، ونسي انه لولا المماليك كانت مصر بقت تحت الاحتلال الصليبي، ولولا "شجر الدر" ودورها في حماية العرش مكنش وصل وبقي الملك بعد أبوه بالساهل كده. وبسبب اللي عمله معاهم واللي حكيناه في الجزء اللي فات - هتلاقوا اللينك اخر المقالة - قرروا القضاء عليه وبتحريض صريح من "شجر الدر"، فمات محروق غريق مقتول في يوم الاتنين 9 محرم 648 هجري 2 مايو 1250م.
بعد ما المماليك خدوا بتارهم من "توران شاه" وشفوا غليلهم. بصوا حواليهم كده، ملقوش حد يقعد علي العرش. قلت قبل كده ان المماليك دول صنيعة "الملك الصالح نجم الدين أيوب"، هو اللي حولهم من مجرد عبيد بيتباعوا أطفال في سوق الرقيق لفرسان وأمراء في جيشه، فكان عندهم ولاء وانتماء وحب جارف ليه. فمكنش لسه عندهم استعداد يطلعوا من تحت عباية البيت الأيوبي تقدير واحترام للملك الصالح. يعني تخيل يا مؤمن لو كان "توران شاه" ظبط الاداء وسمع بنصيحة ابوه ومغدرش بيهم، كانت المماليك دي هتبقي خاتم في صباعه، أو علي الاقل كان تأني في حركاته لحد ما يتمكن، وكان استمر سلسال البيت الايوبي أطول من كده، بس نقول ايه أصحاب العقول في راحة.
أمراء المماليك اتجمعوا، وتناقشوا وتحادوا، بس كانوا متفقين ان العرش ميخرجش بره البيت الأيوبي. بس مين في البيت الأيوبي اللي ينفع يحكم مصر. راح واحد منهم قام وقايل "أم الخليل". كله اندهش وقالك ازاي "أم الخليل" - اللي هي "شجر الدر" - مش من البيت الايوبي، قالك ازاي وهي زوجة "الصالح نجم الدين" وام ابنه المرحوم "الخليل" يعني شالت الدم الأيوبي. قالوله بس دي ست، قالهم نفس الست دي حكمتكوا طول ما كان "الصالح" في حروبه بره مصر يعني عندها خبرة بأمور البلد والحكم، والست دي برده هي اللي حكمتكوا وهي مفهمانا ان "الصالح" عايش، وبعدين دي ست عقلها يوزن بلد وايديها فرطة وخيرة وجيوبنا لسه عمرانا من فلوسها.
وبعد مناقشة وجدل اقتنع المماليك ان انسب حاكم لمصر في الفترة دي هي "شجر الدر أم الخليل"، ويبقوا كده مطلعوش برة البيت الأيوبي. وخرج "عز الدين أيبك الرومي" من الاجتماع طلع علي قلعة الجبل، كرسول من المماليك، رايح ل "شجر الدر" يبلغها بقرارهم، بتوليتها عرش مصر، لتصبح "السلطانة شجر الدر".
طبعا "شجر الدر" سمعت القرار ده وطارت من الفرحة. ولم أمراء المماليك نفسهم وجابوا معاهم القاضي "تاج الدين بن بنت الأعز" بالعافية لأنه كان كاره ورافض فكرة ان ست تتولي الحكم. وبايعوها بالسلطنة، ولبست "شجر الدر" خلعة السلطنة. وزي ما تقاليد تنصيب مبايعة السلطان، باس الأمراء الأرض قدامها، بس كان من ورا ستارة زي ما "ابن اياس" قال.
ومن بعدها خطب الائمة علي المنابر في كل محافظات مصر بإسم السلطانة "شجر الدر" ويقولوا : "واحفظ اللهم الجهة الصالحية ملكة المسلمين عصمة الدنيا والدين أم الخليل المستعصمية صاحبة السلطان الملك الصالح نجم الدين ايوب". لكن "شجر الدر" رغم مبايعة المماليك والقضاة وخطبة الأئمة ليها، موصلتهاش خلعة الخلافة العباسية ورفض مبايعتها عشان ست، رغم انها أضافت علي ألقابها لقب المستعصمية، نسبة للخليفة العباسي المستعصم، مسح جوخ يعني بس الكلام ده برده مكلش مع الخليفة العباسي.
أول ما تولت "شجر الدر" السلطنة سكت الدنانير والدراهم عليها اسمها المستعصمية أو الصالحية - نسبة للصالح نجم الدين ايوب جوزها - أو ملكة المسلمين أو أم الخليل. واضح طبعا انها كانت بتراعي تقاليد العصر وأصرت انها متكتبش اسمها "شجر الدر" عشان اسم الست عورة وكده، بس كان ممكن تكتب ش د مثلا، مكنتش كرييتف لسه.
علق بعض المرخين علي الاحداث الفريدة دي بقولهم: "انها نالت بذلك من الدنيا ما لم تنله امرأة قبلها ولا بعدها". طبعا يقصدوا في العصر الاسلامي. حكمت "شجر الدر" مصر 80 يوم كانوا من أحسن الايام اللي مرت عليهم. أدت الوظايف السنية للأمراء وفرقت الاقطاعات علي المماليك البحرية وبسطتهم اخر انبساط، وراضت الكل. واهتمت كمان بالرعية وفتحت بابها للشكاوي والالتماسات، ودايما في مجلس الشكاوي يبقي جنبها قاضي القضاة وفقهاء الشريعة الاسلامية، عشان تحرص علي الحكم بالعدل.
عينت "شجر الدر" في وظيفة أتابك العساكر "عز الدين أيبك الجاشنكير". ولقب الجاشنكير ده معناه اسم وظيفة كان بيقوم بيها مع "الملك الصالح نجم الدين أيوب" وهي اللي بيدوق الأكل قبل السلطان ما ياكل عشان مايكنش فيه سم، ولو فيه يبقي قدره بقي كده. والغريب بقي أن "شجر الدر" ترقي الجاشنكير" لأتابك العسكر حتة واحدة، حتي ابن اياس قال: "وهذا أمر غريب لم يقه بالديار المصرية". وعينت الأمير "حسام الدين بن أبي علي الهذباني" نائب السلطنة، والامير "بهاء الدين علي بن محمد المعروف بابن حنا" عينته وزير.
كمان اهتمت "شجر الدر" بالبنيان والمعمار، فعملت بستان ودار الخلافة وحمام كان معروف ب "حمام الست" - في الفترة دي الناس كانت بتروح تستحمي في حمامات خاصة مش في البيوت حاجة زي حمام التلات كده - بس للأسف كل الحاجات دي اتهدت مع الزمن واندثرت. لكن فضل من منشآت "شجر الدر" لحد دلوقتي ضريحين. الأولاني لو خطغت رجلك لشارع المعز هتلاقيه هناك معروف بالقبة الصالحية أو ضريح الصالح نجم الدين أيوب.
كان "الملك الصالح نجم الدين أيوب" قبل ما يموت ب 7 سنين، بني مدرسة إسمها المدرسة الصالحية. فجت "شجر الدر" بنت في مدرسته ضريح لزوجها الحبيب بعد موته، مكان قاعة شيخ الطريقة المالكية. طبعا احنا قلنا لما توفي "الملك الصالح" هربت جثمانه في السر في عز الليل لقلعة الروضة، وفضل فيها لحد يوم الجمعة 27 رجب 648 هجري 25 أكتوبر 1250م، واتنقل لضريحه اللي حطت فيه رايات السلطان جعبته وقوسه وسهامه - عدة الصيد - وأوقف علي الضريح وقف بايد الوزير "بهاء الدين بن حنا" - يعني يفضل فيه قراء القرآن ويطلع منه الصدقات الجارية - وفضل الوقف ده متناقل في أسرة الوزير لسنين طويلة اوي لاكتر من قرنين. كانت ست محبة لجوزها ومخلصة بجد.
أما عن الضريح التاني فكان ضريح ليها، موجود لحد الآن في شارع الخليفة جنب جامع السيدة نفيسة وأمام مشهد السيدة رقية رضي الله عنهم. ورغم ان الضريح ده ل "شجر الدر" لكن منقوش عليه أدعية ليها ولزوجها "الصالح نجم الدين أيوب" برده بتقول فيها: "بسم الله الرحمن الرحيم عن الستر الرفيع والحجاب المنيع عصمة الدنيا والدين والدة الملك المنصور خليل بن مولانا السلطان الملك الصالح نجم الدين أبي المظفر ايوب ابن مولانا الملك الكامل ناصر الدين أبي المعالي محمد بن أبي بكر بن أيوب خليل أمير المؤمنين قدس الله روحه ونور ضريحه. التي خطبت الأقلام بمناقبها علي المنابر الطروس وشهدت لها المغافر بالمجد الثابت في أعلي العز بين الوري وأصبحت شموس المملكة بها طالعة وأراء الأمراء لأمرها مطيعة سامعة وأعز الله أنصارها وضاعف اقتدارها وأعلي منازلها وجعل النيرين في العلا الأعلي خدامها ولم تزل مؤيدة منصورة علي مر الليالي والأيام بمحمد وآله وصحبه الطيبين الطاهرين الكرام".
وغالبا الضريح ده اتبني قبل موت "توران شاه". والضريح ده موجود في الأصل جوا مسجد صغير كان أصله مدرسة وهي برده اللي أنشأتها وكان معروف بجامع شجر الدر أو جامع الخليفة. وفوق الضريح فيه قبة تعتبر من أقدم القبب المعروفة في مصر مبنية علي الطراز الايوبي.
ده كان شكل حكم "السلطانة أم الخليل شجر الدر" والموج لسه هادي. تفتكر ايه اللي هيحصل بعد كده؟ ده اللي هنعرفه الحلقة الجاية.
تعليقات
إرسال تعليق