حملة آبر كرومباي
وعمار يا اسكندرية ياجميلة يا ماريا. مدينة السحر والتاريخ. وقفت علي شاطئ خليج ابو قير قبل كده؟. روح هناك الريح هتخطفك هتشوف سفن أشكال وألوان اللي بأعلام رومانية واللي بأعلام بطلمية واللي بأعلام إنجليزية واللي بأعلام فرنسية واللي بأعلام تركية واللي بأعلام صليبية. هتسمع صليل السيوف ودوي البنادق والمدافع. عالم وأمم كتير جت وراحت. ياما خطت نعال علي رمل خليج أبو قير. وياما قامت معارك هنا غيرت مجري التاريخ.
_ اول مكان خطت رجلي فيه أرض مصر كان خليج أبو قير.
_ بسم الله الرحمن الرحيم. مولانا الوالي محمد علي باشا اللي جابك من قلعة الجبل؟!.
_ ايه شفتي عفريت.
_ لا سمح الله. بس استغربت انك قاطع المشوار ده كله وجاي مأنسني وواقف جنبي تتفرق علي موج أبو قير.
_ جيت استعيد الذكريات. كانت أحلي أيام، قدرت من هنا ابتدي في بناء مجدي.
_ طيب رجعني معاك لذكرياتك، انا شغوفة اعرف عملت مجدك ازاي ياباشا.
_ هناك ع الشط التاني في "قولة" اشتغلت زي ماكان والدي في تجارة التبغ والدخان. واتقربت من الحاكم اللي كان صديق شخصي لعائلتي، وجوزني بنته سنة ١٧٨٧م ومنها أنجبت أبنائي إبراهيم وطوسون وإسماعيل.
وفي سنة ١٧٩٨م دخلت الحملة الفرنسية مصر. طبعا انا كنت في وادي تاني ومكنتش اعرف مصر من الأساس ولا أسمع أي أخبار عنها. لحد سنة ١٨٠١م فوجئت بإن الجيش العثماني بيجمع جنود مرتزقة من كل ولاياته بغرض محاربة الفرنسيس في مصر. بيني وبينك انا قلت ما أشترك معاهم وأهي سبوبة حلوة برده خصوصا إن حمايا حاكم "قولة" جهز جيش بقيادة إبنه "علي"، فأشتركت معاهم. لكن واحنا بالمركب في الطريق لمصر بدأت ألاحظ إن "علي" مجبر علي قيادة فريق "قولة" وبيتمني يرجع وشايف أن الموضوع ملوش لازمة. فتقربت منه أكثر أشد من عزمه لحد ما عينني النائب بتاعه وإداني لقب كولونيل.
_ ماشاء الله رزقك في رجليك ياباشا.
_ وصلنا هنا في أبو قير علي رأس ٣٠٠ رجل من قولة في الخامس والعشرين من مارس، ومعانا باقي الأسطول العثماني من كافة الولايات بمجموع ٦ آلاف جندي. وأبتدت المواجهه بين الجيش العثماني بقيادة "قبطان باشا كوتشوك حسين" والجيش الفرنسي. وكان مساندنا الأسطول الانجليزي وندخل أبو قير رافعين علم الهلال العثماني جنب علم اتحاد جاك الانجليزي.
_ أه طبعا ماهي الحملة الفرنسية هي اللي لفتت نظر الإنجليز علي أهمية موقع مصر الجغرافي في طريق التجارة الدولية، فمن مصلحة الإنجليز أن فرنسا تطلع من مصر.
_ إيفيت كلها مصالح.
_ كمل ياباشا وبعدين.
_ بدأت المعارك بين كر وفر غلبة وانسحاب فالوضع ده تعب نفسية "علي" أكتر وازداد يأسه وقرر التخلي عن الأمر وفعلا إنسحاب من قيادة فرقة "قولة" وهرب.
_ وطبعا الفرقة بصت حواليها ملقتش القائد راحوا مسكوا في النائب وخلوه القائد. بختك يابو بخيت.
_ بصراحة الموضوع عجبني ولقيتها فرصة ذهبية. بعين التاجر اللي كنته مصر بالنسبة لي كانت تجارة رابحة للي يفوز بيها وخصوصا في أيام الضعف والتفكك دي. فقلت أنا قتيل البلد دي أكون أو لا أكون.
_ شوقتني عملت ايه؟!.
_ اترقيت لرتبة بنباشي يعني قائد ألف رجل لما نسكت قيادة فرقة قولة، واشتركت في المعارك اللي دارت ببسالة وحطيت خطط حربية خداعية ساهمت في جعل الغلبة لينا قصاد الفرنسيس. وفي ٨ إبريل سقطت اسكندرية في أيدي العثمانيين وتراجع الفرنسيس. ويوم ١٠ إبريل سقطت رشيد في أيدينا واستمر الزحف داخل مصر. واتقسم الجيش العثماني الانجليزي لقسمين فريق سلك طريق دمنهور، وفريق خرج من رشيد وانضم ليه جيش المماليك. وفي العاشر من يونيو وصلنا علي مشارف القاهرة وحاصرناها جيش ثلاثي عثماني وانجليزي ومماليك.
_ وانت موقفك ايه هنا يا باشا.
_ انتبه قائد الجيش العثماني "قبطان باشا" للي قدمته في الحرب فكافئني برتبة "سيرششمي" بما يعادل رتبة لواء عندكم.
_ الزهر لما يلعب. كمل ياباشا.
_ في ٢٢ يونيو استسلمت فرنسا بشروط ووقعوا اتفاقية العريش. و في ١٤ يوليو غادر الفرنسيس القاهرة الي رشيد، وصعدوا السفن الإنجليزية للانسحاب في ٩ أغسطس سنة ١٨٠١م
_ هم خرجوا في سفن إنجلترا عشان الأسطول الفرنسي انجلترا دمرته قبل كده هنا برده في أبو قير سنة ١٧٩٨م مش كده.
_ تمام مذاكرة كويس.
_طيب كده الإنجليز هيخرجوا بإيه ولا مكانوش ناويين.
بصلي الباشا بطرف عينه وعلي شفتيه ابتسامة سخرية وقال:
_ يخرجوا بالساهل كده بعد ما عرفوا خطورة موقع مصر وأهميتها ليه هم عبط.
_ أمال حصل ايه.
_ قسم الجيش الانجليزي نفسه لثلاث فرق، فرقة ٢٤,٧٨٦ جندي قرب اسكندرية، وفرقة ٥,٤٩٨ جندي في رشيد، والباقي في فرقة في الجيزة وجزيرة الروضة.
_ انتشروا في البلد يعني كماشة حلوة. طيب والأتراك والمماليك كان موقفهم ايه.
_ الأتراك سألوا فرقة في إسكندرية تحت قياده "خورشيد باشا"، وفرقة في القاهرة تحت قيادة "خسرو باشا" اللي عاني وداق المر من تمرد الألبان عليه داخل الجيش.
أما المماليك كانوا في حتة كده لوحدهم زي الشوكة في الزور تحت قيادة باياتهم "عثمان البرديسي" و "محمد الألفي" و "الشيخ إبراهيم باي المجرب".
_ وياتري فضل الوضع كده كتير.
_ في ٢٥ مارس ١٨٠٢ وقعت انجلترا معاهدة آميان بالسلام مع فرنسا عشان تضمن أنها مترجعش مصر تاني. وفضل الأتراك والمماليك كل منهم مستني الفرصة يقضي فيه ع التاني. الأتراك عاوزين يرجعوا الوضع لما قبل الحملة الفرنسية ويفرضوا السيادة الكاملة علي مصر. والمماليك عاوزين عاوزين يرجعوا الوضع لما قبل دخول الاحتلال العثماني مصر وفرض سيطرتهم برده. وفي نفس الوقت عينهم علي الإنجليز وعندهم شك أن القعدة تحلا وتطول.
_ أه كل واحد مستني الفرصة يلعب فيها في الإعدادات ويعمل ريباك يعني.
_ ايه ريباك ده. مش فاهم بتقولي ايه.
_ لا متشغلش بالك كنت بكح بس. المهم معاليك كنت فين وسط ده كله.
_ لا كفاية عليكي المرة دي كده. نتقابل في وقت تاني ومكان جديد نستعيد فيه الذكريات.
_ اه واضح هوا البحر تعب عضمك ياباشا ألف لا بأس. طير أنت.
مروة طلعت
١٧ / ٩ / ٢٠٢١
#عايمة_في_بحر_الكتب
المصادر:
الفرعون الأخير محمد علي ل جيلبرت سينويه ترجمة عبد السلام المودني صفحة ٥٩ : ٦٤
الإمبراطورية المصرية فى عهد محمد علي والمسألة الشرقية ل محمد صبري السوربوني ترجمة ناجي رمضان عطية صفحة ٥٩
تعليقات
إرسال تعليق