الخلافة الفاطمية في مصر

 مين فينا ميعرفش شارع المعز في القاهرة. تقريبا مفيش حد في القاهرة معداش عليه٬ سواء زيارة للآثار الإسلامية العريقة اللي فيه٬ أو مجرد فسحة وقعدة في كافيهاته الحلوة. 

بس انت عارف مين هو المعز اللي اتسمي الشارع بإسمه؟. تمام هو "المعز لدين الله الفاطمي". طيب احنا خدنا في منهج التاريخ إن "المعز" ده هو اللي أمر ببناء القاهرة علي يد قائد جيوشه "جوهر الصقلي". وبالمناسبة كان شارع المعز ده أكبر وأهم شارع في قاهرة المعز. 

تعالي نقعد كده علي الكافية الحلو ده٬ واحكيلك شوية كده عن الفاطميين أصحاب اللبنة الأولي في القاهرة. غمض عينيك٬ يلا فتح بص حواليك ايوه احنا في الصحرا٬ متتخضش احنا رجعنا لسنة ۳٥٧ هجريا مكنتش القاهرة موجودة. تعالي بقي نركب مع القافلة دي اللي رايحة الفسطاط عاصمة الدولة الإخشيدية واللي بناها زمان "عمرو بن العاص" بعد فتح مصر٬ ايوه الله ينور عليك هي فعلا في أيامنا اسمها مصر القديمة.

يلا ادينا وصلنا٬ هتعرف تنزل من ع الجمل ولا هتفضحنا😄. تعال نشوف المنادي ده بيقول ايه٬ ده بيقول ان "كافور الإخشيد" مات. انت عارف اننا دلوقتي في وقت من أوقات تاريخ مصر السئ. "كافور الإخشيد" ده هو رابع وآخر حكام الدولة الإخشيدية في مصر وكان حاكم قوي جدا. لدرجة انه كان واقف حجر عثرة أدام طموح الفاطميين للاستيلاء علي مصر. واللي كانوا جايين من المغرب في محاولات كتيرة من بداية سنة ۳۰۱ هجري للاستيلاء علي مصر وكلها باءت بالفشل.

طب مين هم الفاطميين٬ اختلفت المصادر التاريخيَّة حولين تحديد نسب الفاطميين، فمعظم المصادر الشيعية بتؤكد صحة اللي قاله الإمام عُبيد الله بن المهدي بالله وهو الفاطميين يرجعون بنسبهم إلى محمد بن إسماعيل بن جعفر الصادق، وبكده يبقوا من سلالة الرسول محمد صلي الله عليه وسلم عن طريق ابنته السيدة فاطمة الزهراء رضي الله عنها وأرضاها وابن عمه الإمام علي بن أبي طالب كرم الله وجهه. وفي المقابل، أنكرت مصادر أخرى النسب ده وقالوا ان أصل عُبيد الله المهدي فارسي أو يهودي اصلا. 

والخلافة الفاطمية هي واحدة من الخلافات الإسلامية والوحيدة بين دول الخلافة اللي كان المذهب الشيعي مذهب رسمي ليها. قامت الدولة دي بعد نشاط الدعاة الإسماعيليون في دعوة الناس إلى القتال باسم الإمام المهدي المنتظر، واللي تنبؤوا بظهوره والكلام ده كان ايام الخلافة العباسية٬ وقدر الفاطميين يوصلوا دعوتهم للأقاليم البعيدة عن مركز الحكم بالتحديد عشان طبعا العباسيين اللي بدأوا يخاربوهم ويطاردوهم واضطهادهم في كل البلاد، فانتقلوا للمغرب اللي قدروا فيها تحقيق جماهيرية ليهم وسط قبيلة كتامو البربرية بالذات، وأعلنوا قيام الخلافة الفاطمية فيها. وواحده واحدة بدؤا يتوسعوا في مراكز نفوذهم لحد ما شملت مناطق وأقاليم واسعة في شمال أفريقيا والشرق الأوسط، لحد ما بقت دولتهم أكبر دولة استقلت عن الدولة العباسية، والمنافس الرئيسي ليها على زعامة الأراضي المقدسة وزعامة المسلمين. وده كان خطر رهيب خصوصا انها دولة شيعية قصاد الدولة العباسية السنية.

بص كده تعالي إسمع التاجر ده بيقول ايه٬ بيقول ان اخر محاولة للفاطميين لدخول مصر القائد "جوهر الصقلي" قال: "اذا زال الحجر الأسود ملك مولانا المعز لدين الله الأرض كلها٬ وبيننا وبينكم الحجر الأسود" اللي هو "كافور الإخشيد" لأنه كان شديد سواد اللون وكان قائد صلب فسموه الحجر الأسود. ودلوقتي مات الحجر الأسود وموته سبب تدهور اقتصادي وسياسي وعسكري فظيع٬ وبقت مصر للفاطميين فاتحة دراعاتها.

وأمر "المعز لدين الله الفاطمي" جيشه بالتحرك الي مصر بقياده "جوهر الصقلي" بغرض ضمها الي الخلافة الفاطمية٬ وكتب "المقريزي" في كتابه "اتعاظ الحنفا بأخبار الأئمة الخلفا": (وكان رحيله في رابع عشر ربيع الأول منها٬ ومعه ألف حمل مال٬ ومن السلاح والخيل والعدد ما لا يوصف٬ فقدم جوهر الي مصر ووصلت البشارة بفتحها في نصف رمضان سنة ثمان وخمسين٬ فسر المعز سرورا كثيرا). 

يلا فوق معايا كده واشرب كوباية المانجا دي. ايوه احنا رجعنا علي الكافية. حمد الله ع السلامة. هو انت فاكرني هكمل كده بالساهل أولا حاسبلي علي المانجة ثانية أعملي لايك وشير وأدعوا اصحابك علي صفحة عايمة في بحر الكتب عشان الصفحة كده تكبر وأحكي أكتر وبنفس😉 يلا اعمل مستني ايه.

مروة طلعت

۲٤ / ٧ / ۲۰۲۱

#عايمة_في_بحر_الكتب