سميراميس

_ علي باشا عامل ايه.

_ تمام والله اخبارك ايه ياريس.

_ في نعمة الحمد لله. انا حبيت أكد عليك فرح بنتي بكرة في فندق سميراميس اوعي تنسي ومتجيش.

_ لا ازاي ضروري هاجي ده فرح بنتي يا اخويا. بس ليه هتعملوه في فندق سميراميس بالذات ده حتي بعيد عنكوا.

_ معلش بقي ياسيدي تحكمات العريس، اكمنه عراقي فعجبه أنه يعمل فرحه في فندق سميراميس.

_ وايه العلاقة أنه عراقي يعني.

_ ليه هو انت متعرفش أن سميراميس ملكة آشورية. والحضارة الآشورية كانت في بلاد بين النهرين اللي هي العراق حاليا.

_ ايه ده بجد أول مرة اعرف المعلومة دي، طب وحكايتها ايه سميراميس دي.

 _ سميراميس دي كانت ملكة عظيمة، وليها انجازات اتحفرت في التاريخ الآشوري، ومن كتر تقديس الناس ليها خلقولها أسطورة تمجدها، فبقي ليها حكايتين واحده حقيقية والتاني خيال أسطورة. تحب تبتدئ بأي واحده.

_ طيب نسمع الاسطورة اصلي بحب الأساطير اوي.

_ ماشي ياسيدي. الأسطورة بتقول أن زمان في فجر التاريخ فاض نهر الفرات _ اللي في العراق _ وطلع السمك علي  وجت سمكتين كبار وحدفوا بيضة كبيرة علي الشط وشافتهم حمامة بيضة كبيرة صعبت عليها ياعيني البيضة راحت وخداها وطارت بيها بعيد وحطيتها وسط البيض بتاعها٬ لحد ما فقست وخرجت منها طفلة رائعة الجمال. وربتها الحمامة وسط ولادها كأنها فرد من العيلة.

_ دي طرزانة الحمام ولا ايه.

_ اه باين حكاية طرزان دي فاتت علي كل العصور بحكايات مختلفة. بس ان جيت للحق التاريخ الآشوري كان استاذ في خلق الاساطير.

_ طب وبعدين كمل.

_ لحد مافي يوم مر راعي اغنام علي عشة الحمام وشاف الطفلة٬ فجري وبلغ باقي الرعاة علي مكان البنت اللي لقاها٬ وراحوا معاه وفعلا اخدوها من وسط الحمام. وسموها "سميراميس" يعني محبوبة الحمام.

وقرر الرعاة انهم يبوعوها في سوق نينوي. وهناك اشتراها "سيما" مرابط خيول الملك وأخدها وراها عنده لأنه مكنش بيخلف واعتبرها بنته.وكبرت سميراميس وبقت عروسة زي القمر عينيها واسعة ورموشها كحيلة ونظراتها ودودة وجسمها رشيق وهيفاء الطول، وظهر عليها الذكاء والحكمة وقوة الشخصية والغموض.

وفي يوم شافها "أونس" مستشار الملك فأنبهر بجمالها ووقع في حبها، وفعلا اتجوزها وخلفوا طفلين. وحياتها كانت سعيده ومستقرة. لحد ما قرر الملك "نينوس" توسيع مملكته ودق طبول الحرب. وقرر "أونس" أنه ياخد معاه مراته "سميراميس" في المعركة، عشان بياخد دائما بنصيحتها لأن كان لها رؤية سليمة ودماغ عبقرية تتاقل بالدهب. وهناك لجل حظه الوحش، الملك "نينوس" يشوف "سميراميس" وينبهر بيها. وبعد ما رجعوا من المعركة بعت الملك لمستشاره وقاله انا عاوز اناسبك يا"أونس" فقاله في مين فرد الملك وقاله مراتك.

_ ايه جو فيلم الزوجة التانية ده هو الملك ده يبقي العمده عتمان.😂

_ لا ده العمده عتمان كان طيب كبيره لفق لابو العلا تهمة. إنما الملك "نينوس،" لما "أونس" رفض العرض، مسكه وخلعله عينيه فطلق وهو بيعيط من غير عينين.

_ ياستار.

_ امال ايه الملك يابني مبيهزرش. المهم اتجوز الملك "نينوس" من "سميراميس" ويوم زفافهم مات "أونس" من القهر. وخلفت "سميراميس" من الملك ولد اسمه "نيناس" وفضلت جنب جوزها الملك تحكم في الخفاء ورا زوجها الملك، بيسمع كلام مراته يعني،وفضلت تحكم معاه ٣٧سنة لحد ما مات الملك. ومن بعده حكمت "سميراميس" بلاد مابين النهرين لوحدها لمده ٥ سنين لحد وفاتها.

_ياسلام دي أسطورة جامده اوي أمال ياتري ايه هي الحقيقة.

_ الحقيقة أن كان فيه ملكة آشورية فعلا حكمت بلاد مابين النهرين كان إسمها "سمورامات" من بابل، واتجوزت ملك نينوي "شمسو حدد الخامس" وخلفت منه ابنها "حدد نيراني" وفضلت تحكم مع جوزها لحد ما مات وكملت بعده الحكم وكان مجموع سنين حكمها في الفترتين ٤٢ سنة زي ما الأسطورة قالت. والملكة "سمورامات" كان ليها إنجازات عظيمة فهي اللي بنت مدينة آشور بمعابدها وقصورها وأسوارها العالية. وعملت نفق من الحجر تحت نهر دجلة يوصل بين طرفين المدينة، وده كان انجاز عظيم محصلش قبل كده. وقامت بفتوحات كتيرة وسيطرت علي مصر والشام ووصلت للهند.

وكان فيه مسلة اكتشفوها في آشور مكتوب عليها "سمورامات ملكة سيد القصر، شمس حدد ملك الكون ملك آشور والد حدد نيراني ملك الكون ملك آشور وكنة سلمت نصر ملك الجهات الأربعة".

_ دي فعلا كانت ملكة عظيمة وتستحق تخلد بأسطورة "سميراميس".

مروة طلعت

١٨ / ٧ / ٢٠٢١

#عايمة_في_بحر_الكتب