أول ثورة في العالم

ربنا يكفيك ثورة الجياع. أو زي ما نجيب محفوظ سماها ثورة الحرافيش.

الكلام ده بيحصل لما العدل بينمحي من البلاد، والكبير ياكل الغلبان، ومع زياده الضغط بيولد الانفجار، والانفجار ده مبيبقاش سلمية زي اللي شوفته قبل كده، نو نو ابسلوتلي، ده بيبقي ... أحم ماتيجي نشوف.

مصر سنة ٢٢٨٠ ق.م في عهد الأسرة السادسة في الدولة القديمة.

_ سيداتي سادتي في موقع الحدث وعلي خلفية الأحداث المتصاعده معانا "ايبور ور"، اللي واضح من همومه المقطعة والعلقة اللي باينة علي وشه أنه كان من أحد رجال الحكم. سيد "ايبور" من فضلك احكيلنا اللي حصل بالتفصيل.

"ايبور" يمسح الدم اللي نازل من راسه ويبص يمين وشمال في خوف.

_ بين يوم وليلة حصلت احداث غريبة اول مرة نسمع عنها في التاريخ كله.

_ ايوه ايه اللي حصل يا فندم وضح.

_ مجموعة من الغوغاء قاموا بخلع الملك.

_ خلعوه ازاي يافندم هو مسمار.

_ دول اقتحموا قصر الحكم وخدوه هيلا بيلا علي برا٬ ومش بس كده دول اقتحموا المقابر والاهرامات وانتهكوا حرمة الملوك الاموات وبعثروا اشلاؤهم وسرقوا ونهبوا كل شئ جه في سكتهم. وانقلب حال البلد في لحظة وبقت البلد مليانة بالبلطجية والعصابات اللي مهمتها كسر اي حد كان في السلطة او حتي كان مجاورهم. جواهم حقد وغل فظيع وصبوا انتقامهم علي الاغنياء فنهبوا القصور واحرقوها٬ وقعد اصحابها يولولوا ويعيطوا٬ في حين ان الشعب كان مبسوط وسعيد وبيرقص في الشوارع. تخيلي يا انسة الشعب بيرقص علي الخراب.

_ صادق يا فندم هو شعب رقاص ابا عن جد 🤣. كمل كمل.

_ الدنيا اتقلب حالها والقوالب نامت والانصاص قامت٬ اللي كانوا عندهم الخدم والحشم بقوا ماشيين زيي كده بهدوم مقطعة٬ واللي كانوا عريانيين بقوا لابسين افخر انواع الكتان. والاقرع اللي مكنش حيلته حتي الزيت بقي عنده احسن انواع العطور. واللي عمره ماشال في جيبة صرة فلوس بقي عنده صندق كبير مليان دهب.والست اللي كانت عشان تشوف وشها تروح تبص في الترعة بقي عندها المرايات اشكال والوان.

_ طيب يا فندم مش جايز لو كنت سعادتك انت والاسرة الحاكمة وفرتلهم الكتان والعطور والمرايات وخفيتوا من عليهم الضرايب٬ كنت فضلتوا بكرامتكم٬ وكان الشعب كمان شالكوا كرم اخلاقكم في انكم حفظتلهم انسيانيتهم.

_ انسانية مين دول عبيد احساننا واهو طلعوا فعلا لصوص مايستاهلوش الا الجلد.

_ اه تمام . يا حامورابي الحق الراجل ده كان من الاسرة الحاكمة. ايه ده الناس اتلمت وقطعوك اني آسف.

يلا بينا احنا نطير علي سنة ۱۱۹٥ ق.م ايوه هنا التاريخ ماشي بالعكس ركز معايا.

بعد الثورة الكبري اللي شوفناها حصلت طفرة في الوعي الجمعي وبقي كل حاكم يحكم عينه عليها ومش ناسيها وماشي بما يرضي الله والناس.

جه الملك رمسيس التالت واتأخر في دفع رواتب العمال والموظفين٬ فالناس عملت اضراب شامل عن العمل في عموم البلاد٬ راح الملك باعت وزيره قالهم ايه ده ازاي تضربوا عن العمل ده العمل عباده والايد البطالة نجسة واكيد جاب معاه كاهن من ترزية الدين قالهم اطيعوا ولي الامر هتغضبوا آمون. بس الناس وقفوا كده وبصولهم من فوق لتحت وقالوا " اذهب أنت والملك أكمل العمل".

طبعا الوزير طار علي الملك رمسيس التالت.

_ يا مولاي الناس بصتلي بصة فكرتني بالثورة الكبري.

_ ماتبالغش بس هم يومين والتالت هيلاقوا مفيش فايده هيرجعوا يشتغلوا عادي.

وفعلا فات يومين والتالت وعينك ما تشوف الا النور٬ الناس فجأة هجمت علي مخازن الملك ذات نفسه ياخدوا حقهم من فلوسه بالغصب. وحصلت مظاهرات قصاد معبد مرنبتاح تطالب بالحقوق المسلوبة لدرجة ان العمدة ومن غير تصريح فتح المخازن بنفسه للناس. قالك ياروح ما بعدك روح 😄.

واستمرت الاضطرابات لحد ما اخد العمال والموظفين حقوقهم كاملة٬ واتدفع كمان رواتبهم عن شهور الاضراب اللي مشتغلوش فيها. ايوه بقي 😎

من خلال الحكايتين دول هنلاقي ان الادعاء بان العمل في مصر القديمة كان بالسخرة ادعاء كاذب تماما.

وان مصر عرفت الاضرابات والمظاهرات من اقدم العصور مهواش شعب مسالم بطبعه زي ما كانوا مفهمينا.

واهم حاجة بقي طوبي للي ياخد التاريخ عبرة هيوفر علي نفسه كتير اوي. واخر حكمة هي اول حكمة ربنا يكفيكوا شر ثورة الجياع. اوعي الحرافيش 😂

مروه طلعت

۲۹/٦/۲۰۲۱

#عايمة_في_بحر_الكتب