إسماعيل صديق باشا المفتش
_ هي الدنيا جري فيها ايه.
_ مالك؟.
_ هي الناس ليه بقت وحشة اوي كده؟.
_ ايه اللي حصل ؟ ومتردش السؤال بسؤال.
_ واحد قريبي كان ليه صاحب قريب منه اوي لدرجة انهم زي الاخوات واكتر من عشرين سنة٬ وفجأة قريبي اترفد من شغله واكتشف ان صاحبه واخوه ده هو السبب٬ طيره وأذاه لما حس ان قريبي العقبة اللي قصاده في انه يوصل لكرسي الادارة.
_ لا حول ولا قوة الا بالله. ربنا يعوض عليه.
_ يعوض عليه لقمه عيشه ولا يعوض عليه صدمته وجرحه من اعز الناس.
_ ماهو لو قريبك فهم واتعلم من الماضي واللي كان مكنش زعل وكان حرص ولا خونش.
_ ماضي ايه.
_ الدنيا طول عمرها كده٬ الغدر فيها والطمع والخيانة. من ايام قابيل لما غدر بأخوه هابيل٬ والخديوي اسماعيل لما غدر ب اسماعيل صديق المفتش٬ وهارون الرشيد لما غدر ب جعفر البرمكي٬ وجمال عبد الناصر لما غدر ب عبد الحكيم عامر. كل العلاقات دي كانت صداقة واخوية وانتهت بالغدر.
_ طب قابيل وهابيل٬ وعبد الناصر وعبد الحكيم عارفينهم مين بقي اسماعيل صديق ده. استني كده انا فاكر الاسم ده٬ مش ده اسامة عباس في مسلسل بوابة الحلواني.
_ ايوه صح اتلعب دوره في مسلسل بوابة الحلواني.
_ ياعم ده كان مفتري.
_ هو الاصح انه كان مفتري عليه. اتعمل عليه عمليه تشويه تاريخية زي ما تعملت علي عبد الحكيم عامر عشان الناس تقول احسن يستاهل.
_ طب وايه هي الحقيقة.
_ إسماعيل صديق باشا المفتش هو أخو الخديوي اسماعيل في الرضاعة٬ وصديقه الصدوق٬ ده كمان كان ايام حكم الخديوي اسماعيل كانت الناس عارفة اسماعيل المفتش باسم رجل الدولة التاني.
حياته مغطيها غموض كتير نظرا لعملية التشويش علي تاريخه بعد وفاته. بس بعد التقليب في الاقوال المختلفة واستخلاص الكلام المنطقي المتماشي مع الأحداث والعصر٬ نقدر نقول ان اسماعيل المفتش اتولد سنة ١٨٣٠ _ ودي سنة تقريبا بما أنه اخو الخديوي في الرضاعة يبقي اتولد في نفس السنة _ وبرده حصل اقاويل كتير عن مولده ونسبه بس اكتر حكاية قريبة للحقيقة أنه اتولد في اسيوط، أبوه هو "دونالى مصطفى أغا باشا" من قادة الجيش. وأمه هي كبيرة وصيفات القصر و صديقة شخصية ل"خوشيار هانم" والدة الخديو إسماعيل _ فاكرنها طبعا اتكلمنا عنها في حكاية الضرة مرة ولو كانت جرة _ ده مش بس سنة مولده اللي غامضة ده كمان تعليمه اتشوه وقالوا عنه انه جاهل يادوب بيفك الخط ومبيتكلمش غير عربي٬ لكن لما جم فرزوا بيته لقوا فيها مكتبة ضخمة مليانة علوم دينية من فقه وسيرة وتاريخ اسلامى وكمان كتب بالغات الفرنسية و الانجليزية والتركية وغيرها.
_ طب وليه خلوا سيرته غامضة بالشكل ده عمل ايه لده كله.
_ انا اقولك٬ الراجل ده كان عبارة عن الصندوق الاسود للخديوي اسماعيل٬ قبل تولي الخديوي الحكم كان اسماعيل صدقي اظهر نبوغ وحنكة وذكاء في المناصب الرسمية اللي وكلت ليه وكانت أول وظيفة تولاها المفتش ( مسير الركائب ) للوالي عباس٬ يعني رئيس الاسطبلات ، وبعدين مفتش بالدائرة السنية بمديرية الشرقية _ عشان كده اتسمي المفتش _ وبلغت أملاكه 130 فدانا وبعدين انتقل الى مدينة ( السنطة ) ، ومنها بقي مفتش عموم الدائرة السنية حتى مارس 1863 ، وانعم عليه برتبة الباشوية ونال النيشان العثماني من الدرجة الثالثة ، ووصلت أطيانه ل 805 افدنة ، وكان صعوده الحقيقي مع تولى الخديو اسماعيل حكم مصر.
عينه الخديو اسماعيل في وظيفة مفتش الاقاليم البحرية أي أقاليم الوجه البحري ، ونجح في ادارة تفتيشها وظبط كشوفاته اللي عجبت الخديو اوي فبعت نموذج من الكشوفات دي الى كل مديريات الصعيد عشان تكون نموذج لضبط وتنظيم كشوفاتهم ، وتوسعت سلطات المفتش ، فمنحه الخديو اسماعيل حق فصل وتعيين المستخدمين في المديريات الواقعة في ادارته حتى منصب الوكيل _ وكان ده من سلطة الخديو فقط يعني بقي ضل الخديو في البلد او الرجل التاني _وصار من حق المفتش تعيين وفصل العمد ومشايخ البلاد والمأمور والناظر ، وقام بإجراءات واسعة لصالح الأهالي ، فقد أجرى الاطيان بجهات الشرقية ودمياط على الأهالى وبلا تميز ، رغم أن الأوامر السابقة كانت عدم توزيعها على الاهالي حفاظا عليها من البوار، وأهم ما قام به أنه ضبط جميع اطيان وعقارات الأوروبيين في مصر ، فطلب من جميع المديريات الواقعة في نطاق تفتيشه تحرير كشوفات بما امتلكه الأجانب ، لأجل المراجعة والتأكد من موقفهم من العوائد والرسوم المقررة لمنع التهرب الذي حدث من بعضهم حفاظا على المال العام. وقام بتنظيم الأمور الخاصة بعمليات السخرة اللي كانت موجوده في حفر قناة السويس صحيح انه ملغهاش، ولكنه وضع لها حدود. والمفتش بني 4500 مدرسة ، في عهد الخديو اسماعيل ، ولما تولى "علي مبارك" نظارة المعارف _ وزارة التعليم _ أو ديوان المدارس في عام 1868 ، كانت البنية الأساسية للتعليم قد أقيمت علي يد اسماعيل المفتش. ولو بصماته الكتير اوي علي السكة الحديد٬ وكان من اشد المعاديين لعمل الاترك في المصالح الحكومية واستبدلهم بالمصريين.
_ طب ما الراجل حلو اهو امال فيه ايه.
_ صبرك بس بالله ومتستعجلش الدنيا زي المرجيحة يوم تحت وفوق.
ظهرت الايام اللي تحت بقي لما الخديوي اسماعيل اتزنق في الديون نتيجه بذخه الشديد علي المظاهر الكدابة. وفي سنة ۱۸٧٦ حاوطت الخديوي اسماعيل المراقبة الثنائية الانجليزية والفرنسية بحجة مراقبة تسديد ديون مصر ليهم. جه "اسماعيل المفتش" ورفض باصرار التدخل الاجنبي في الشئون الداخليه وعارض الخديوي بضراوة. وبما ان "اسماعيل صديق المفتش" كان ماسك نظارة المالية وهو مصدر سر بلاوي الخديوي وعمايله في بعزقه المال العام٬ حس الخديوي ان بمعارضة "المفتش" ليه ان كده ضهره هينكشف والفضايح والمستخبي هيبان٬ خصوصا لما طالبت المراقبة الثنائية محاكمة "اسماعيل المفتش". هنا اتحول "المفتش" من الأخ والصديق وحبيب الروح للشوكة اللي في ضهر الخديوي اسماعيل.
وبنفس مبدأ احمد ذكي مع هشام عبد الحميد في فيلم معالي الوزير٬ اتصرف الخديوي مع صديقه وصندوقه الأسود "اسماعيل المفتش".
استدعاه الخديوي إلي سراي عابدين، كعلامة على الثقة به، وهدأ روعه ، وتلطف في محادثته ، وخده إلي سراي الجزيرة علي اساس انه حبيبه زي ماكان وهيسهروا سوا، ولكن اول ما العربية اللي ركبوها دخلت حدائق السراي، وتقف أدام باب القصر، اختفى نبأ "المفتش" عن الناس، إذ عهد الخديوي إلي اتباعه بقتله، فقتلوه بطريقة بشعة اذ جذبه القاتل من خصيتيه بعنف وظل يضغط عليهما حتى لفظ أنفاسه فأُلقي في النيل، ولم يُعثر له على جثة وليس له قبر حتى الآن في نوفمبر ۱۸٧٦.
وطبعا لما الناس بدأت تدور وتسأل عليه اتقال انه سافر يتحاكم في اسطنبول واتنفي وبعدها مات. وبعد مقتل المفتش صدر مرسوم ۱۸ نوفمبر ۱۸٧٦ بفرض الرقابة المالية الثنائية علي مصر وأصبح التدخل الاجنبي أنر واقع وتمهيد للاحتلال.
وطبعا اتشوه كل سيرته واعماله علي يد مؤرخين النظام "عبد الرحمن الرافعي" و " علي مبارك". لدرجة ذكر اسماعيل صدقي باشا رئيس وزراء مصر الاسبق في مذكراته التي صدرت سنة 1950 أن والده ، سماه ( اسماعيل صديق ) تيمنا بالمفتش ، ولما انقلب الخديوي على المفتش ، راح والده اللي كان برتبة محافظ وقتها لتغيير اسم ابنه ليصبح ( اسماعيل صدقي ) عشان ميتصورش الخديو اسماعيل انه من المعجبين بالمفتش ويحسبه عليه.
ادي التاريخ وادي اللي كان وجاي تقولي قريبك وصاحبه ونفسنة شغل روح ياعم الله يباركلك.
مروه طلعت
۱٧/ ٦ / ۲۰۲۱
#عايمة_في_بحر_الكتب
تعليقات
إرسال تعليق