شبرا

ادينا بندردش ورانا ايه. نحكي ونفرفش ورانا ايه. ومنين يا بلدينا وبلدكوا وين. أحسن ناااااااس.

- مدام داليدا welcome to Egypt.

- ميرسي هبيبي. مصر وهشتني كتير.

- نورتي مصر.

- مصر منورة بأهلها الطيبين. اللي عشت معاهم أهلا سنين.

- لسه فاكرة أيامك في القاهرة.

- طبعا! مقدرش انسي مصر وشبرا وجيراني ومدرستي واصحابي فيها.

- جميلة شبرا.

- جميلة جدا، ناسها طيبين وبينهم دفا وهب وود مشوفتوش تاني في اي بلد في العالم.

- طب انتي عارفة يامدام داليدا ان شبرا دي اصلها كانت جزيرة في النيل زي جزيرة الوراق كده، وكانت اسمها جزيرة الفيل.

- ايه ده بجد؟! ازاي Please, tell me.

- شبرا زمان مكنش ليها وجود علي الخريطة ولا هي تبع القاهرة مجرد جزيره صغيرة مهجورة علي النيل لحد القرن ال 13 الميلادي، واللي حصل أن الجزيرة دي بالعوامل الطبيعية وترسبات طمي النيل _ أيام ما كان فيه طمي قبل السد العالي ما يحجبه _ بدأت جزيرة الفيل دي تلتحم بالأرض وعملتلها مكان جديد أشبه بالضاحية أيام الفاطميين تقريبا.

ومن هنا اطلق الناس علي المكان الجديد ده اسم "شبرو" وهي كلمة قبطية معناها الكوم أو التل. ومع مرور الزمن وانحراف لسان المصريين بلهجات مختلفة اتحرف اسمها ل "شبرا".

- ولما ظهرت الارض الهلوة دي الناس راحت سكنت فيها مش كده.

- لا ياست الكل، مش زي منتي متخيلة، اللي جه سكن فيها هم الفلاحين لانها اصبحت مكان ريفي مناسب جدا للزراعة، انما معظم الناس كانوا في القاهرة اللي كانت حدودها مابين المقطم والنيل.

- ازاي يسيبوا مكان هلو كده علي النيل.

- طبيعة البشر ياست داليدا انها دايما تحب تسكن حوالين الحاكم، ووقتها العواصم كانت الفسطاط ثم القطائع ثم القاهرة الفاطمية، وكل دول كانوا بعاد جدا عن شبرا.

لحد ما جه "محمد علي باشا" اللي كان له نظرة مبعدية وقالك هي ليه الناس كلها زانقة في بعضيها كده حوالين المقطم وراح واقف فوق أسوار قلعة الجبل _ قلعة صلاح الدين الايوبي _ وبص كده وقال ما فيه هناك اهو مناطق واسعة وجميلة. وراح نازل داخل قصر القلعة بتاع الحكم ونادي علي وزرائه ومهندسيه وطلب منهم عمل قاعدة تعميرية وتخطيط جديد للسكان.

قالوله ياباشا الناس مابتحبش تبعد عن الحاكم عشان خدماتهم بتبقي جنبه واكل عيشهم هيبقي بعيد.

قالهم بس كده بسيطه انتوا جيتوا في جمل، من النهارده الحاكم هيبقي ليه مكان وخدمات ومحلات ومعيشة في كل مكان في البلد.

وراح الباشا المستبد المستنير ينفذ مبدأ تخطيطي بانشاء احياء جديدة تبدأ ببناء قصر للحاكم حواليه خدمات ومصالح ادارية ومستشفي ومدرسة ومحلات وكل مايخص الناس. وابتدا بالاسكندرية راح لاقصي مكان فيها وبني قصره قي راس التين وفعلا ظهر حي راس التين.

وراح نازل علي منطقة وبني قصر القبة وظهر حي القبة - حدايق القبة وكوبري القبة - وراح ل "شبرا" ونفذ فيها نفس المبدأ وبني فيها قصر محمد علي باشا اللي اتسمي بقصر الفسقية سنة 1809م. وأستولي علي القري اللي كانت فيها علي مساحة 50 فدان فغرس البساتين والاشجاروالسواقي اللي بتروي البساتين ودي اتكسرت من الفيضان سنة 1816م. وكان محمد علي مهتم جدا ببساتين شبرا لدرجه انه بعت مهندسين زراعيين يدرسوا بره مخصوص للعناية بالبساتين دي. واستخدم القصر والبساتين لحقول تجارب زراعية ونقل جنبها مدرسة الزارعة - كلية الزراعة - سنة 1837م والمدرسة البيطرية.

وفي سنة 187م كانت بداية شبرا الحقيقية كمنطقة من مناطق القاهرة، حيث ان الباشا أمر بتمهيد طريق واسع بين القاهرة وشبرا.

- وهنا ابتدت الناس تسكن في شبرا.

- انا مش فاهم انتي مستعجلة علي سكن الناس ليه، ياستي صبرك بالله، الناس زمان كانت رايقة وهادية وكل خطوة بتيجي براحتها.

_ امال ليه الباشا عمل شبرا كده؟!

- حلو السؤال ده، محمد علي باشا مكنش عاوز شبرا منطقة سكنية للعامة ده عامله كومباوند للباشاوات.

_ يعني ايه كومباوند دي.

_ اه لامؤاخذة انا ناسي انك موتي في التسعينات، يعني محمد علي كان عاوز شبرا مكان لقصور الباشاوات وبساتينهم وبالمرة يبقي مكان اشبه بالحدائق العامة لو الناس حبت تغير جو. كانت سياحية يعني. لدرجه ان أمر برش شارع شبرا مرتين في اليوم عشان يلطف الجو للناس وهي بتتفسح في شارع شبرا.

_ شارع شبرا مين بتاعتنا؟!

_  والله مش متأكد الكلام ده علي شارع شبرا ولا الشانزلزية، سبحان مغير الأحوال.

ما علينا، في سنة 1827م أمر محمد علي باشا بحفر ترعة لري اراضي وضواحي القاهرة وبالفعل اتحفرت الترعة البولاقية وكانت بتمتد حاليا من كوبري 6 اكتوبر وميدان عبد المنعم رياض وشارع الجلاء وشارع الترعة اللي اتسمت علي اسمها، وكان الغرض منها ري أراضي ضواحي القاهرة وبولاق وجزيرة بدران ومنية السيرج وشبرا في الايام اللي ميبقاش فيها فيضان.

وفضلت شبرا حي الباشاوات لحد أيام الخديوي اسماعيل وحفر قناة السويس سنة 1859م، اللي كان ليه الفضل في تمهيد مدخل القاهرة الزراعي من عند نهاية شبرا الرئيسي اللي مودي علي القليوبية. فخلق حركة سير جديدة لكل اللي عاوز يطلع علي الطريق الزراعي لازم يمشي في شارع شبرا الاول.

ومن هنا زادت الكثافة السكانية لشارع شبرا بعد ما أصبح شارع حيوي لعامة الناس.

_ اد كده شارع شبرا ده عظيم.

_ شارع شبرا مش عظيم بتاريخ نشأته وبس شارع شبرا عظيم بناسه اللي غزلوا التاريخ فيه واساميهم محفورة في اسم كل منطقة في شبرا.

والكلام ده هيكون في قعدة تانية هنعرف فيها عظمة ناس شبرا.

_اما أنا من شبرا في مصر واولادها الطعمين زي القمر بعيون سمرا لابسين عقود فل وياسمين والنيل بيضحك ويغني فاكرني وبيسأل عني أروحله القاه مستني وجنب منه أحسن ناس ..... احسن ناااااااس.

مروه طلعت

2 /6 / 2021

#عايمة_في_بحر_الكتب