الكيت كات

 _ كيت كات ياسطي.

_ اركب ياباشا.

_ ألا قولي ياباشا هو انت من الكيت كات أصل شكلك غريب عنها.

_ليه هو انت تعرف كل اللي من الكيت كات.

_ أمال ياباشا ده انا مولود فيها ابا عن جد.

_ أحسن ناسز منطقة شعبية عريقة الكيت كات دي.

_ عيشت ياباشا.

_ طيب بما انك عشري كده وحافظ الكيت كات كده، عارف قبة سيدي المغربي وجامع خالد بن الوليد.

_ معلوم ياباشا مين في امبابة كلها ميعرفهمش.

_ طيب انت عارف ليه اتسمت الكيت كات.

_ ها، الكدب خيبة يابيه، لا معرفش.

_ الكيت كات ياسطي اسمها الأصلي كيتي كات والناس حرفوها وبقيت الكيت كات.

_ وتطلع ايه كيتي دي ياباشا ولامؤاخذة.

_ زمان أيام الحملة الفرنسية علي مصر.

_ بتاعة بونابرتة دي يا باشا.

_ أيوه حملة نابليون بونابرت سنة 1798م، الحملة دي كانت جاية ومعاها كافة شئ، جنود وأسلحة وذخيرة ومدافع ومعاهم أسطول من العلماء بأدواتهم ومحابرهم ومطابعهم، وطبعا بما انها حملة غزو في بلد جديد وناويين يقعدوا فيها ويرحرحوا فمنسيوش يجيبوا معاهم عنصر الترفيه، ومن ضمن العنصر ده راقصة فرنسية اسمها "كيتي الفونس فرانسوا".

لما أستقرت الدنيا شوية مع الفرنسيين ودخلوا القاهرة جت "كيتي" وخدت لها لفة كده في المحروسة لحد ما عجبها مكان ع النيل شرح وبرح ويرد الروح وراحت بانية فيه ماخور _ كبارية يعني أو نايت كلاب _ وبما ان كان فيه في مصر أجانب كتير من جنسيات مختلفة من قبل حتي دخول الحملة الفرنسية مصر، كانوا تجار في منطقة الظاهر، مصدقوا ان حاجة زي كده تفتح في المحروسة ولما شافوا كيتي وصفوها انها زي القطة وبقي اسمها كيتي كات، وبقت دي وجهتهم كل ليلة في ماخور كيتي كات.

علي الجانب الآخر، المصريين أول مره يشوفوا عربدة فاجرة بالمنظر ده فدمهم الشرقي غلي في عروقهم _ يعني مش كفاية محتلين وكمان هتنشروا رذيلتكم عندنا _ وخصوصا راجل كبير سنا ومقاما اسمه "ابراهيم المغربي". الراجل ده كان مهاجر مع أهله من المغرب وهو صغير وعاش عمره كله في مصر. كان راجل تقي بتاع ربنا وتاجر قماش، لما عرف بموضوع الماخور نخوته مخلتوش يعرف ينام الا لما يخلص البلد منهم. وفعلا بقي كل يوم يأجر بلطجية عشان يهجموا ع الماخور ويكسروه ويعملوا مشاكل فيه.

لحد ما حصلت معركة امبابة في نفس السنة مابين جيش نابليون وجيش المماليك بقيادة "مراد بك" و "ابراهيم بك" واللي وصفها الجبرتي  (ثم إن الطابور الذي تقدم لقتال مراد بك انقسم علي كيفية معلومة عندهم في الحرب وتقارب من المتاريس بحيث صار محيطاً بالعسكر من خلفه وأمامه ودق طبوله وأرسل بنادقه المتتالية والمدافع واشتد هبوب الريح وانعقد الغبار وأظلمت الدنيا من دخان البارود وغبار الريح وصمت الأسماع من توالي الضرب بحيث خيل للناس أن الأرض تزلزلت والسماء عليها سقطت).

استغل "ابراهيم المغربي" دربكة الحرب دي اللي كانت دايرة قريبة منهم بالمناسبة، وراح لامم فتوات وجدعان امبابة وطلعوا علي ماخور كيتي كات _ وكان صعب علي لسان جدعان البلد نطق اسم بالدلع ده فحرفوه وبقا اسمه الكيت كات _ وراحوا دوه وساووه بالأرض، وطلعت كيتي تجري هربانه مش من المنطقة بس لا من مصر كلها وهربت علي بلدها.

وامعانا في تطهير الأرض من الدنس اللي كان فيها بني أهل امبابة مكان الماخور "جامع خالد بن الوليد" أكبر مساجد امبابة. بس فضلت المنطقة شايلة اسم الكيت كات كدليل علي نخوة وجدعنة ولاد امبابة.

_ يعني ياباشا قبة المغربي دي مدفون تحتها "ابراهيم المغربي" الراجل المجدع ده.

_ ايوه ياسطي لما مات "ابراهيم المغربي" الناس زعلت عليه وعملوله المقام ده اكرام ليه وتقدير.

_ ياه ياباشا ده انت طلعت تعرف الكيت كات أكتر مني.

_ لو كل واحد عرف أن الارض اللي بيمشي عليها دي مليانة حكايات وبطولات هيعرف اد ايه اننا شعب معدنه أصيل، ومهما غلبتنا المحن أكيد أصلنا هيغلب علينا.