صحن غبن

 . لما زرت المتحف الاسلامي في باب الخلق لفت نظري طبق خزفي كبير وجميل منقوش عليه نقوشات اسلامية ومكتوب عليه اسم الحاكم بأمر الله الفاطمي وعرفت ان اسم الطبق ده هو "صحن غبن" – غبن مش جبن لأنه لو كان جبن كنت مشيت ومركزتش أهو طبق جبنة وخلاص – طبعا لفت نظري اسمه الغريب وحبيت اعرف معناه وياريتني ماعرفت، طبعا معروف عن الحاكم بأمر الله أنه شخصية غريبة ولحد الآن عليها كلام كتير فيه اللي بيقول عليه مجنون واللي يقول عالم واللي يقول مفتري عليه وكل ده بسبب أحكامه الغريبة زي مثلا تحريمه لأكل الملوخيا والسمك الذى لا قشر له والمنع من الملاهى ومنع النساء من حضور الجنائز والمنع من بيع العسل وقلب نظام اليوم يعني العمل والبيع في الليل والنوم نهارا، نرجع بقي لحكاية "صحن غبن" الطبق ده اتسمي علي اسم غبن قائد قواد الخليفة الحاكم بأمر الله الفاطمي، غبن ده كان خادم أسود من خدامه ويظهر كده كان من النوع اللي بيمسح جوخ ومطبلاتي محترف عرف يوصل لثغرات الخليفة وجاراه في جنونه لحد ما الخليفة حبه وقربه منه ففى سنة 402هـ/1011م واداه  لقب "قائد القواد" وأهداه سيفا وعشرة أفراس بسروجها ولجامها . وفى نفس السنة فضل غبن يطبل بالقوي لحد ما كيف الخليفة لدرجه انه لما تعب مرة زاره الخليفه في بيته يطمن عليه وولاه شرطة القاهرة وشرطة مصر(الفسطاط والعسكر والقطائع)وكذلك الحسبة –والحسبة وظيفة يقوم صاحبها بالأمر بالمعروف والنهى عن المنكر- وكان مما كلفه به تنفيذ قوانينه الأجتماعية الغريبة اللي حكينا عنها في أول البوست، لحد هنا والدنيا زبادي في الخلاط لغبن لكن اللي مكنش عامل حسابه ان الخليفة عنده شعره ساعة تروح وساعة تيجي، كان معروف عن الحاكم بأمر الله أنه يعمل العملة ويعكسها ويدي القرار ويعمل عكسه ويحبك ويكرهك ويرجع يحبك وتاني يكرهك. وفي يوم ملوش ملامح الخليفة صحي من النوم كاره غبن وراح عزله من جميع وظايفه ومش بس كده يامؤمن لا وأمر يقطع ايده - ليه طيب اهو كده كيفي كده – وبعد ثلاث سنوات وشهر صحي الخليفة من النوم برده مدايق قالهم غبن لسه موجود قالوله اه قالهم ايده وحشتني هاتولي ايده التانية وهوب دبل كيك أمر بقطع ايده التانية وجابوله ايد غبن التانية في الطبق ده عشان كده بقي اسمه "صحن غبن" – يلا يستاهل عشان يعرف يطبل كويس – وبعد ماجابوله ايده قلب الخليفة الحنين صعب عليه غبن وبعتله الأطباء تداويه وكمان الاف القطع الذهبيه تراضيه، ولسه غبن بيقول هيييييه تقريبا نغمة الهيييه معجبتش الخليفة راح أمر بعد عشر أيام يقطعوله لسان غبن – هو مفيش غير الراجل ده في البلد ولا ايه – وبرده الخليفة عمل اللي عليه وبعتله الأطباء يعالجوه وبعدها بعتله الحرس قتلوه ولفوه في الحصير وجابوه كله للخليفة – زهق بقي كل شوية قطع غيار قال يجيب الهيكل كله – وعقبال كل المطبلاتية.

يعد طبق غبن من أكبر الأطباق الخزفية فى العالم الأسلامى اذ يبلغ قطره نصف متر وعمقه عشرة سنتيمترات وهو من الخزف ذى البريق المعدنى الذهبى على ارضية بيضاء عاجية ويتكون من ثمانى مناطق متساوية تمتد من حافة الطبق نحو المركز . ويشتمل حافة الطبق على طراز من الكتابة بالخط الكوفى يلتف حول محيطها ولم يتبق من كلماتها سوى ست كلمات فقط تحمل ثلاثة القاب لغبن "استاذ الأستاذين"قائد القواد"مولا أمير المؤمنين" 

٤ / ٢ / ٢٠٢١

#عايمة_في_بحر_الكتب