ذات الهمة

- مسلسل ذات ده مسلسل رائع.

- أحلي حاجة فيه انه مسلسل واقعي جدا بتشوف فيه نفسك وامك وابوك وجدودك بجد.

- بس انا مش عارف ليه اسمها غريب كده، عدمت الاسامي.

- متهيقلي هو اسقاط علي اسم الأميرة "ذات الهمة".

- ايوه كان فيه حوار، ابوها قال فيها كده. بس انا مش عارف مين الاميرة "ذات الهمة".

- الأميرة "ذات الهمة" دي أميرة عربية من أصل فلسطيني وقبيلتها عاشت في الحجاز، عاصرت الخلافة الاموية والعباسية، وكانت أميرة محاربة، وليها حكاية طويلة جدا، حتي اتحكت في القصص الشعبية والحكايات زي سيرة "أبو زيد الهلالي" و "عنترة بن شداد" وكده، بس حكايتها كانت أكبر وأعظم، لدرجة انها اتصنفت أطول حكاية شعبية عربية في التاريخ.

- يسلام، معقولة حكاية كبيرة وعظيمة زي ما بتقولي كده، ومحدش سمع عنها، اشمعني يعني عارفين "أبو زيد الهلالي" وهي لا. 

- حكاية "ذات الهمة" كانت معروفة أوي، والاجيال بيتناقلوها، واحتلت مكانة بارزة في الوجدان العربي، وسيرتها مكتوبة في نسخة ضخمة بمتحف برلين مكونة من 23 ألف صفحة.

- سيرة مكتوبة في 23 ألف صفحة، ليه هي عملت ايه؟!

- من ناحية عملت ايه فهي عملت كتير، عندك وقت تسمع؟

- ادي التليفزيون نقفله، ها احكي كلي آذان صاغية.

"ذات الهمة" هي الأميرة "فاطمة بنت مظلوم بن الصحصاح بن الحارث الكلابي"، من قبيلة بني كليب. جدها "الصحصاح بن الحارث"، كان فارس عظيم شارك في حرب الروم علي اعتاب القسطنطينية، ايام الخلافة الأموية. "الصحصاح" كان له ولدين "ظالم ومظلوم" - طبعا اساميهم كانت اسقاط علي حياتهم - وغالبا هم كانوا توأم، عشان حصل خلاف مابينهم، مين فيهم ياخد حكم القبيلة من بعد أبوهم. وهنا حب "الصحصاح" يحل الاشكالية، فقالهم اللي يخلف فيكم ولد عيكون حكم القبيلة من بعدي له. وفضل "ظالم ومظلوم" مستنين زوجاتهم تولد بالسلامة عشان يعرفوا مين كبير القبيلة. وهنا بتولد مرات "ظالم" الولد وسماه "الحارث"، ومرات "مظلوم" بتولد بنت وسماها "فاطمة".

في الوضع اللي حطهم فيه ابوهم "الصحصاح"، حس "مظلوم" ان بنته هي السبب في ضياع فرصة الحكم من ايده، ونفسه قفلت منها، ومبقاش عاوز يشوفها قدامه. وعشان أمها تخلص من نكد "مظلوم" في البيت، ادت "فاطمة" لجارية عندها اسمها "أم مرزوق". فخدتها "أم مرزوق" تربيها في خيمتها في الصحرا، وكل ليلة كانت تيجي لستها في السر بالبنت، عشان تشوفها وترضعها وتطمن عليها. عاشت "فاطمة" مع "أم مرزوق" في الصحرا، لمدة 6 سنين، وكل يوم كانت تقعد معاها الجارية نحكيلها عن بطولات جدها "الصحصاح" وتحكيلها عن أمجاد أهلها في بني كليب، لحد ما البنت توحدت مع قصص جدها، وبقت تحلم وتتمني تكون زيه، بطلة فارسة. 

لحد ما جه اليوم اللي هجم فيه بعض قبائل اليمن بريادة قبيلة "بني طيء"، ووقعت "فاطمة" أسيرة في ايديهم وهي بنت 6 سنين. واتباعت جارية هي و"أم مرزوق" واشتراهم الأمير "البجير". وكانت شغلانة "فاطمة" كجارية هي رعاية وتربية الخيول والجمال في الصحرا، وجاتلها شغلانتها دي علي الطبطاب، لانها كانت حابة العيشة دي والجو ده، علي عكس طبيعتها كأنثي، كانت بتحب الحياة في الطبيعة الخشنة زي الرجال. وساعدتها حياتها البرية دي، انها تتعلم أساليب الحرب من مدافعة وممانعة. ومش بس كده، دي كانت لبقة في الكلام وعندها حجة ومنطق، وكشفت شخصيتها عن الكثير من العجب والانبهار، لكل اللي يشوفها أو سمع عنها، حتى إنها بقت محط  أنظار الشباب والفرسان، غيرة وحسد واعجاب، والعرب كلها عرفتها باسم "داهية بني طئ".

وبدأ الخطاب والعرسان يقفوا بالطوابير علي باب بيت الأمير "البجير"، يطلبوا ايد جاريته الاسطورة "فاطمة" - ايه ده انتي فارسة ومقاتلة شرسة طيب انا هلجمك واقعدك في البيت - ومن ضمنهم كانوا أمراء ومن قبائل تانية جايين ع السمع، وكل واحد شايل معاه شئ وشويات عشان العطا يرسي عليه. وكل ما كان يتقدم شخص كانت "فاطمة" ترفض بشدة، يقولولها يعني هتقعديلنا كده من غير جواز، ترد وتقول: "فاعلم أنني ما خُلِقت إلا للنزال،

لا للفراش ولا للزواج، ولا يضاجعني سوى سيفي وعدة حربي … وكحل غبار النجع

مرادي".  لحد ما في يوم الأمير "البجير" عند علي عندها، وقرر يجوزها بالعافية، وده كان أغبي قرار ياخده مع واحدة زي "فاطمة".

يوم ما قرر الأمير تزويجها، اخدت "أم مرزوق" وحصانها وسيفها، وهربت برا القبيلة وعاشت في قلب الصحرا. واشتغلت قطاعة طرق - ايوه هتبهرك دلوقتي اصبر - وبقت تهجم علي القوافل وتقلب رزقها، ويوم ورا التاني بقي ليها تابعين وعملتلها عصابة حلوة كده، وهي الزعيمة. وفي يوم تقرر تغير علي قبيلة "بني كليب"، ويتحول ليلهم لنهارويخرج زعيم القبيلة "ظالم" يدافع عن قبيلته - وتيجي اللحظة الحاسمة اللي شفتها في الف فيلم هندي قبل كده - تبارز فيها "فاطمة" عمها "ظالم"، وكانت خلاص هتقتله، تروح داخلة امها وتقولها اوعي يا فاطمة هتقتلي عمك. مش عارفة هي امها عرفت ازاي انها بنتها يمكن قلب الام مثلا، او "أم مرزوق" راحتلها مثلا، طب من باب اولي كانت قالت ل"فاطمة" من الاول ان دول اهلك، ملناش دعوة يا موهي هي السيرة كده. 

وعلقت الزينات، وصدحت الزغاريد، بعودة "داهية بني طئ" لأهلها "بني كليب" من تاني. لكن أول ما شافها ابن عمها "الحارث بن ظالم"، وقع في حبها من أول نظرة لحد الجنون، وبقي صبحه وليله يزن علي ابوه يجوزهاله، وكان رد "فاطمة" واحد مبيتغيرش، ولما حسوا انها بدأت تقفش، خافوا لتهرب منهم وسكتوا، بس "الحارث" مسكتش. عاشت "فاطمة" وسط "بني كليب" سيدة وسط قومها، بتحضر جلسات الرجال واجتماعاتهم، زيها زيهم، لابسة لبس الرجال وسيفها في حزامها، وكلامها وأرائها بيتاخدوا بعين الاعتبار، وتقريبا اصبحت الشورة شورتها.

في الوقت ده كانت دولة بني العباس - الخلافة العباسية - لسه جديدة، ولما كانت سمعة "فاطمة" بين القبائل زي الطبل، اكيد كانت وصلت لآذان الخليفة "المنصور"، اللي بعت يطلبها في مجلسه. وفعلا بقت "فاطمة" واحد من مستشاري الخليفة العسكريين في جيشه. وتبدأ تشجع الخليفة علي الجهاد، المسيطر عليها من حكاوي جدها "الصحصاح"، وتحمسه بإعادة محاولة فتح القسطنطينية. وبدأ الخليفة يعد الجيش، و"فاطمة" اللي اتسمت ب "ذات الهمة"، قاعدة وسط الاجتماعات تحط خطط الحرب مع القادة.

وفي يوم كانت في اجتماع مع الخليفة، تلاقي ابن عمها "الحارث" بيستأذن للدخول، ويطلب من الخليفة ايد بنت عمه "ذات الهمة". وهنا تسكت "ذات الهمة" توقير ومهابة للخليفة، اللي بيأمر ان فرحها علي ابن عمها "الحارث" علي حسابه، وهيشهد عليه بنفسه. وفعلا بيعقد "الحارث" قرانه علي بنت عمه وحلم عمره، لكن فرحته لن تكتمل - علي رأي محيي اسماعيل - وده لان العروسة بتهرب قبل دخلتها.  

فضلت "ذات الهمة" هربانة لا عريسها ولا أهلها ولا الخليفة نفسه عارفينلها مكان. وفضلت مختفية، لحد ما حصل هجوم من قوات الروم علي قطعة من اراضي المسلمين. وهنا اقتحمت "ذات الهمة" مجلس الخليفة بسلاحها ولبسها العسكري ودروعها. واتحرك الجيش ومن ضمنهم "ذات الهمة" وحاربت في الصفوف الاولي من الجيش، وتوالت الانتصارات والفتوحات اللي شاركت فيهم "ذات الهمة" بكل بسالة وقوة. لحد ما رجعت تاني مع الجيش مكللة بالانتصارات. 

هنا بقي كان "الحارث" المغدور قاعد مستنيها، ونفسه تطولها ايديه، وعارف ومتأكد انها بعد انتصاراتها دي مش هيقدر عليها، ولا هيكون لحد كلمة عليها. "ذات الهمة" مكنتش ليها حد في الدنيا تثق فيه ثقة عمياء غير اتنين، "أم مرزوق" وابنها "مرزوق" اخو "ذات الهمة" في الرضاعة والنشأة ودراعها اليمين. راح "الحارث" ل"مرزوق"، وقعد يشكيله من حبه ل "ذات الهمة" وهجرانها ليه وهي تعتبر مراته مع وقف التنفيذ، وان كده ميصحش والقبائل كلت وشه، وكلام كتير كده كل عقل "مرزوق" بيه واقنعه وخلاه واقف في صفه. وفي يوم "ذات الهمة" قعدت زي كل يوم تتغدي مع "مرزوق" أخوها، اتاريه حطلها في الأكل منوم، وكلت "ذات الهمة" من هنا ونامت، فشالها "مرزوق" ونيمها علي سريرها، وفتح الباب لل "الحارث" وخرج وسابهم.

وللحديث بقية .....

ملحوظة: السيرة الشعبية بتبقي عاملة زي المسلسل كده بيختلط فيها الواقع بالخيال. 

مروة طلعت

16 /  2 / 2023

#عايمة_في_بحر_الكنب

#مروة_طلعت

#بتاعة_حواديت_تاريخ

المصادر:-

"الأميرة ذات الهمة: أطول سيرة عربية في التاريخ" - شوقي عبد الحكيم.

"مجلد الأدب الشعبي من موسوعة التراث الشعبي" -  سلسلة الدراسات الشعبية - الهيئة العامة لقصور الثقافة - د. محمد الجوهري.

"مائة شخصية من التاريخ" - عبد الستار سليم.

"بطولات الأميرة ذات الهمة" - محمد سليمان الطيب.

"تاريخ الطبري" جزء 3