إمبابة

 - كل منطقة وليها موقف الا امبابة وليها مطار.. امبابة يا دولة.

= بس هي علي فكرة اسمها انبابة.

- ايه انبابة دي بقي انتي هتغلطي ولا ايه.

= لا لا ربنا ميجيبش غلط هو كان اصل اسمها انبابة، الجبرتي في كتاب عجائب الآثار كان بيذكرها بإسم انبابة، وغالبا استمدت اسمها من "سيدي إسماعيل بن يوسف الإنبابي" اللي كان عايش فيها، واللي نسبه زي ما قال المقريزي في كتاب جني الأزهار، بيرجع ل "سعد بن عبادة" سيد قبيلة الخزرج وقت هجرة رسول الله صلي الله عليه وسلم. 

- واتغير اسم انبابة لامبابة بعد كده، مش كده؟

= مش بالظبط، زي ما انت عارف، امبابة بتطل علي الشاطئ الغربي من النيل، وزمان مكنش فيه لسه قناة السويس، فكان التجار بيوصلوا ببضايعهم لميناء اسكندرية ويكملوا بالمراكب الشراعية في النيل، لحد امبابة ومنها ينقلوا بضايعهم في القطر لكل محافظات مصر، أو العكس لو فيه بضاعة جاية من الصعيد تاخد الطريق العكسي، فكانت دي الطريقة اللي بتوصل البضايع من والي مصر، عن طريق امبابة. من ضمن البضايع دي كانت الجمال اللي بتوصل من السودان والحبشة، وتتمركز في امبابة عكس باقي البضايع، فالتجار الاحباش اطلقوا عليها "امبابة"، وده لان وقتها كانت امبابة مليانة نخل، وامبابة في اللغة الأمهرية للحبشة معناها نخلة الدوم المصرية.

- ايوه سوق الجمال موجود لحد دلوقتي في امبابة.

= الحقيقة ان منطقة "امبابة" في الوقت ده كانت قرية ريفية، بتضم أربع كفور وهم كفر كردك وكفر الشوام وكفر تاج الدول وكفر سيدي إسماعيل الإنبابي، اللي كان له مولد سنوي بيزوره فيه مئات من الناس. وفضلت امبابة ليها عمدة كقرية لحد سنة 1940م، لما ما قررت وزارة الداخلية اعتمادها كبندر، وانشأ فيها قسم شرطة امبابة. 

جت ذكر امبابة في كتب التاريخ لما دارت فيها أشهر معركة بين المماليك والحملة الفرنسية، والتي اتعرفت باسم "معركة امبابة" سنة 1789م. واللي كانت دليل علي تخلفنا الشديد، في الوقت ده كانت مصر تابعة للخلافة العثمانية، ومسلمانا تسليم أهالي للماليك، المهم ان المعلوم بيوصل للباب العالي وخلاص، والناس عايشة في جهل ومرض وفساد وظلم، عايشين زي الانعام ياكلوا ويشربوا وكل همهم يحافظوا علي حياتهم وبيتهم وعرضهم من المماليك ويدفعوا المعلوم خلاص. لما دخلت الحملة الفرنسية مصر، بكل تقدمها وترسانة اسلحتها ومدفعياتها التقيلة، كان قدامها شوية مماليك لسه محتفظين بالسيف والفروسية، لدرجة ان نظرتهم لاستخدام المسدسات والبنادق انه جبن، والشجاعة في الحرب بالسيوف وبس. وكانت النتيجة ان الفرنسيين رشوهم زي البيرسول ما بيترش ع الناموس، وده كان في امبابة. قال الجبرتي ان الحرب دارت لحد العصريعني في حدود 3 ساعات، وانتهت بالهزيمة ساحقة للماليك.

وبما ان امبابة كانت محطة وصل مهمة مابين النيل وسكة الحديد، فكانت ملتقي الناس من وجه بحري وقبلي وكل اللي كان بيحلم بفرصة عمل ومعيشة افضل بعيد عن النجوع. وأشهرهم كان واحد من محافظة قنا اسمه "عبد النعيم" ونزل في امبابة وجه وراه قرايبه ومعارفه لحد ما عملوا مجتمع خاص بيهم في امبابة اتسمي علي اسمهم "عزبة الصعايدة" والعزبة موجودة لحد الآن، وفيهم أحفاد "عبد النعيم". امبابة كانت مشهورة كمان بعصير القصب، فكان فيها آلة بخارية لعصر القصب - طبعا ده ايام محمد علي - وكانت مشهورة بصناعة البشاكير والفوط، و بالزلابية، وخصوصا الترمس. وأهل امبابة كانوا بيشتغلوا مراكبية وصيادين سمك من النيل، وفيه منهم الصباغين والحدادين والنجارين وتجار الغلال. وجه في كتاب الجبرتي عجائب الآثار، ان كان فيه في امبابة قصر للأمير "سليمان أغا السلحدار" وكان له بستان كبير وسواقي، متحاوط بسور عالي خد حجارته من البيوت والوكائل اللي اتهدت من بولاق، أثناء ثورة بولاق ضد الفرنسيين سنة 1800م. وهتلاقي احداث الثورة دي من ضمن قصص كتابي أساطير حية.

مينفعش نكون بنتكلم عن امبابة ومنحكيش حكاية أشهر معالم القاهرة في العصر الحديث وهو كوبري امبابة. في سنة 1890م، عرض الاستشاري المهندس الفرنسي "دافيد ترامبلي" علي "الخديو توفيق" مشروع اقامة كوبري امبابة. والغرض منه هو سهولة التنقل للناس والبضايع، وزي ما قولنا ان امبابة كانت محطة وصل مهمة من المراكب اللي بتوصل من النيل للسكة الحديد. فكانت فيه مراكب بتوصل روض الفرج تفرغ حمولتها علي المعدية او مراكب صغيرة لحد امبابة وتركب القطر، فكانت الرحلة شاقة وفيه بضايع اكيد بتدمر في الشيل والحط. وهنا اتصمم الكوبري اللي بيربط مابين روض الفرج وامبابة، وكانت فكرته عبقرية وجريئة جدا في الوقت ده ان القطر- واللي اتسمي قطر الصعيد لانه من القاهرة للصعيد - ذات نفسه يمشي علي كوبري. واتصمم الكوبري كله من الحديد بشكل جمالي ومعمول من دورين، دور للقطر والدور التاني للمشاه، وكمان فيه خاصية الفتح والغلق عشان المراكب الشراعية تعدي. واتعملت حفلة افتتاح كبيرة بحضور "الخديو عباس حلمي الثاني" سنة 1892م، للكوبري اللي يعتبر نقلة كبيرة جدا في الهندسة المعمارية والتخطيط في مصر. وبعد سنوات بسبب الزيادة السكانية كان لازم الكوبري يتغير ويتجدد عشان يستحمل الأحمال، وفعلا اتغير واتعدل سنة 1927م، واتاخد جزء منه لدمياط. وللمرة التالتة بيتعاد اصلاحه وتجديده، وافتتاحه في 3 يوليو 2020م.

مروة طلعت

12 / 2 / 2023

#عايمة_في_بحر_الكتب

#بتاعة_حواديت_تاريخ

المصادر:-

عجاب الآثار في التراجم والأخبار الجزء الخامس - عبد الرحمن الجبرتي.

جني الأزهار من الروض المعطار- المقريزي

تقويم النيل - أمين سامي - دار الكتب المصرية.