طروادة

مفيش دخان من غير نار.

مفيش حكاية بتتحكي، أو رواية بتتكتب، أو أسطورة بتتروي، الا وفيها نسبة حتي لو ضئيلة من الحقيقة.

سواء كان الحقيقة دي زمنية أو مكانية أو اجتماعية أو .. أو .. أو..

طب ايه اللي يخليني اقول كده. ده اللي أثبته كتير من الاكتشافات، لمجموعة من الاساطير اللي الناس عاشوا قرون فاكرينها خيالية صرف، مكنتش خيالية ١٠٠٪. 

قبل كده اتكلمنا عن ام الاساطير، أسطورة ايزيس واوزوريس في مقال مفصل قبل كده وحاولنا نوضح انها مش أسطورة خيالية تماما، وفيها اقتباسات كتير من الحقيقة. لو حابب تقرا المقالة هتلاقيها هنا 👇

https://m.facebook.com/story.php?story_fbid=pfbid0fcY6BDmoMicBkWf8vKpBwQVDF57pAk4J6LmrJSRdi4AHpY8XRG8Sv5Sbdk413TPEl&id=100149945682155 سمعت عن اشهر أسطورة في التاريخ الاغريقي، واللي اترفعت لمصاف الملاحم، ملحمتي الالياذة والأوديسة. لا سمعت عنها بس اكيد نسيت ده احنا درسناها ياراجل في تاريخ اعدادي. مالك دماغك اتفرمتت، ولا حتي شفتها فيلم، وشوفتهم وهم بيجروا حصان طروادة اللي الجنود مستخبيه فيه. ولا حتي سمعت عن أخيل وكعب رجله اللي وداه في داهية.طيب مشوفتش فيلم اوديسيوس اللي فضل تايه في البحار ومش عارف يرجع بلده الا بعد عشرين سنة. برده مشوفتش ولا سمعت، لا انت حالتك صعبة اوي. نبقي نحكيهم بالتفصيل في مقال تاني عشان خاطر عيونك.

نرجع لكلامنا ونقول إن من ٢٩ قرن تقريبا في سنة ٨٥٠ ق.م انكتب محلمتي الالياذة والأوديسة علي ايد الشاعر الاغريقي هوميروس. وبعيدا عن أن فيه جدل حوالين حقيقة شخصية هوميروس نفسه إذا كان حقيقي كتبها ولا مكنش ليه وجود اصلا_ ملناش دعوة يا موهي_ إلا أن الحقيقة المؤكده أن طوال ال ٢٩ قرن دول والملحمتين قالبين العالم من جمالها وسحرها. وخرجت من عبايتها كتير من الحكايات والافلام والروايات، تقدر تقول إن الالياذة والأوديسة هما أم الاساطير الغربية. وفضل كتير من الدارسين لأجيال وأجيال بيدرسوها ويحللوها من شدة جمالها وتكاملها الادبي أصبحت ركن أساسي لدارسي الادب. وطبعا كل من كان يقراها يتصور أنها أسطورة خيالية وده لكترة الآلهة والحروب ما بينهم، فطبيعي الوعي الجمعي لقرون، كان مقتنع أن طروادة دي مدينة خيالية مش موجودة علي أرض الواقع.

لحد ما جه ثري ألماني مغامر، عاشق الالياذة والأوديسة، اسمه هينديش شلسمان. في سنة ١٨٧١ م في وسط سخرية المحيطين، شال معوله وكتاب الالياذة، وانطلق يدور علي طروادة، وكان دليل بحثه هي الالياذة فقط. والعجيب أن الالياذة فعلا دلته علي مكان طروادة المفقودة بمنتهي الدقة.

وفي منطقة هيسارليك في شمال غرب تركيا وفي نفس المكان اللي حدده هوميروس في الالياذة، كشف شليمان عن بقايا طروادة. ووسط ذهول العالم انتشل شليمان طروادة من بين الأنقاض ومن تحت الرمال والرمان. وكان سبب دمار طروادة فعلا زي ما كتب هوميروس في ملحمة الالياذة حرب عظيمة حصلت وانهزم فيها الطرواديين، وكانت النتيجة قتل جميع سكانها ودمار المدينة كلها وانهيارها. لكن طبعا هوميروس حط التاتش بتاعه وزود من خياله الخصب ابطال واحداث وأسباب للمعركة. 

الحدث الصادم ده خلي الباحثين وعلماء الآثار يهتموا بالاساطير التاريخية والحكايات الشعبية، لأنهم أدركوا أن فيه احتمال كبير تكون المدن الخيالية المذكورة دي تكون حقيقة وانطمست تحت الركام زي طروادة. ومن أهم المدن اللي انشغل الباحثين بيها من بعد اكتشاف طروادة حتي الآن، هي قارة أطلانتس. ودي بقي لينا معاها لقاء اخر قريب.

مروة طلعت

١٧/٦/٢٠٢٢

#عايمة_في_بحر_الكتب

#عالم_الأساطير