المومياء الصارخة
عارفين فيلم The Mummy وشفنا منظر المومياء وهي في التابوت وكأنه مات بيصرخ٬ وطبعا طلعت مومياء ملعونة وكانت مغامرات مرعبة معاها. وعرفنا من الفيلم ان ده كان عقابه قبل مايموت نتيجة جريمة قتل ارتكبها انه يندفن حي عشان كده مات بيصرخ وفضل وشه علي الحال ده. كان فيلم حلو اوي ابقي شوفه.
الموُياء دي فضلت لغز لفترة لحد ما أيقن العلماء ان المومياء دي خاصة بالأمير "بنتاؤر" ابن الملك "رمسيس التالت". وده عرفوها من بردية تورين القضائية او بردية مؤامرة الحريم.
بس الأحلي بقي ان فيه مومياء فعلا وحقيقي موجوده ومتحنطة وعلي وجهه انطباع الصرخة٬ وكانت معروضة في المتحف المصري.
حريم 🤔 هو الموضوع فيه حريم 😏. الله مستغرب ليه ياسيد هو مش نابليون قالك ابحث عن المرأة 😄.
تعالي معايا كده وارجع لحدوتة ثورة الحرافيش هتلاقي ان أيام الملك رمسيس التالت سنة ۱۱۹٥ ق.م حصلت ثورة من الموظفين والعمال ضده لما الرواتب إتأخرت. ها روحت للحدوتة وقريتها ولا لسه🤔. طيب تعالي أكملك هنا باقي الحدوتة.
الملك "رمسيس التالت" كان متجوز طبيعي أكتر من سيده٬ وكان منهم واحدة غلاوية شوية وهي الملكة "تي" أم الأمير "بنتاؤر". كان نفسها تكون الملكة الأم وتخل إبنها ياخد العرش من بعد أبوه الملك "رمسيس التالت" وده طبعا مش هيحصل لأنه مش الابن الأكبر.
وجت الاضطرابات والثورة في مصلحتها٬ وراحت مسكت في الفرصة دي بايديها وسنانها والملك والوزراء والأمن مشغولين. وأكيد بفلوسك وبمالك تنول اللي في بالك٬ اتفقت مع اتنين من كبار الموظفين وعشرة من رجال البلاط ونسائهم ومجموعة من الجواري علي قتل الملك "رمسيس التالت" وتعيين ابنها "بنتاؤر" مكانه ملك علي مصر. بردية المؤامرة مكشفتش لينا اذا كان تم قتل الملك رمسيس ولا لا. بس من خلال فحص مومياء الملك "رمسيس التالت" ظهرت أدلة بتقول أنه توفى فى الـ 60 من عمره وأنه كان عنده التهاب بالمفاصل، لكنه ممتش نتيجة لكبر سنه، لكن بسبب ان شخص فاجأه من الخلف بطعنه فى الرقبة بسلاح حاد ومدبب كالخنجر. وده معناه إن المؤامرة نجحت بقتل الملك "رمسيس التالت".
والغريب بقي ان سر المؤامرة انكشف بعد مقتل الملك٬ انكشف ازاي الله اعلم البرديات مكشفتش الجزء ده. واتقبض علي كل المتهمين والمتورطين في المؤامرة ومن ضمنهم الملكة "تي" والأمير "بنتاؤر". وده دليل ان مصر القديمة كانت من النزاهه بحيث إن لا أحد يعلو فوق القانون مهما كانت درجته أو سطوته.
واتعرض المتهمون علي محكمة مدنية _ في مصر القديمة كان فيه تنوع في اختصاص المحاكم زي دلوقتي _ وكانت المحكمة فيها ۱٤ قاضي كما ذكرت بردية تورين. وفي ليلة من ليالي المحاكمة قدرت مجموعة من نساء المتهمين يجذبوا ۳ من القضاه ضعاف النفوس وقضاء ليلة مشبوهه للتأثير علي حكمهم في القضية. ولكن الأمر انكشف فتحول ال ۳ قضاه الي متهمين آخرين في القضية _ خش في حضن اخوك يا فواز 😂 _ واتحكم علي القضاه الفاسدين بجدع الأنف _ قطعها يعني وده كان حكم منتشر في مصر القديمة للمذنبين _ لكن واحد منهم انتحر بعد سماعه الحكم بساعة٬ يلا أهو ريح.
نيجي بقي لأهم جزئية في المحاكمة اللي بتشير لحاجة مهمة اوي كلنا فهمنها غلط عن مصر القديمة. في اثناء التحقيقات وسير المحاكمة ثبت ان المتهمين استعملوا السحر. طب وايه يعني دول بيستخدموا السحر اكتر ما بيشربوا المية. لا حضرتك السحر كان ممنوع في مصر القديمة الا علي الكهنة بس وفي حالات خاصة جدا.
واتحولت القضية للمحكمة اللاهوتية الخاصة بأمور السحر. محكمة مخصوص للسحر🙄 مش قولتلك انه كان محرم وممنوع.
واخيرا حكمت المحكمة اللاهوتية بالإعدام للأمير "بنتاؤر"٬ و۳ تانيين وجدع الأنف لضباط الجيش المشتركين في المؤامرة٬ اما مصير الملكة "تي" وباقي المتهمين مفيش مصادر بتتكلم عن مصيرهم.
وتم شنق الأمير "بنتاؤر" ودفنه بخبيئة المومياوات الملكية بالدير البحري، ومكنتش ملفوفة بلفائف الكتان الأبيض الفاخر كعادة المومياوات الأخرى، ولقوا ايده ورجليه مربوطين بحبال من الجلد وكمان متحنطش نتيجه جريمته يادوب اكتفوا بتجفيفه في ملح النطرون وصب الراتنج داخل فمه المفتوح.
مروة طلعت
٥ / ٧ / ۲۰۲۱
#عايمة_في_بحر_الكتب
تعليقات
إرسال تعليق